ރާއްޖެ ލާމަރުކަޒުކުރުން: ހެލްތު މިނިސްޓްރީގެ 20 ޕްރޮޖެކްޓެއް 20 ރަށެއްގެ ކައުންސިލްއާ ހަވާލުކޮށްފި
1 މާރިޗު 2020 | އާދީއްތަ 06:3920 ޕްރޮޖެކްޓެއް ވަނީ ހަވާލުކޮށްފައި
ހެލްތް މިނިސްޓްރީގައި ބޭއްވި ރަސްމިއްޔާތުގެ ތެރެއިން
ލާމަރުކަޒީ ގާނޫނަށް ގެނެވުނު އިސްލާހުތަކާއެކު ކައުންސިލްތައް ބާރުވެރިކުރުމުގެ ގޮތުން ހެލްތު މިނިސްޓްރީގެ 20 ޕްރޮޖެކްޓެއް 20 ރަށެއްގެ ކައުންސިލްއާ ހަވާލުކޮށްފިއެވެ.
އާދިއްތަ ދުވަހުގެ ހެނދުނު ހެލްތް މިނިސްޓްރީގައި ބޭއްވި ރަސްމިއްޔާތުގައި، މި އެއްބަސްވުމުގައި ސޮއި ކުރައްވާފައިވަނީ ކޮންމެ ރަށެއްގެވެސް ކައުންސިލް މެމްބަރަކާއި އެރަށެއްގެ ސިއްހީ މަރުކަޒުގެ އިސްބޭފުޅެކެވެ.
ހެލްތް މިނިސްޓްރީގެ ޕްރޮޖެކްޓްތައް ލާމަރުކަޒީކޮށް ކައުންސިލްތަކާއި ހަވާލުކުރުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރ އަބްދުﷲ އަމީން ވިދާޅުވީ ލާމަރުކަޒީ ގާނޫނަށް ގެނެވުނު 8 ވަނަ އިސްލާހާއެކު، ސިއްހީ ދައިރާގެ އިސްލާހުތަކުގެ ތެރޭގައި ހިމެނެ ހުރިހާ މަޝްރުއެއް ކައުންސިލާއި ހަވާލުކުރުމަށް ނިންމަފައިވާކަމަށެވެ. މިނިސްޓްރީން އިސްނަގަނީ ރައީސުލްޖުމްހޫރިއްޔާ އިބްރާޙިމް މުހައްމަދު ސޯލިހު ރާއްޖޭގެ ތަރައްގީ އާއި މުސްތަގްބަލަށް ދެކޭ އުންމީދު ، ލާމަރުކަޒީ ޖަޒީރާ ރާއްޖޭގެ ހުވަފެން ހަގީގަތަކަށް ހެދުމުގައި ނަމޫނާއަކަށް ވުމަށްޓަކައިކަމަށް މިނިސްޓަރ އަމީން ވަނީ ވިދާޅުވެފައެވެ. މިނިސްޓަރ ވިދާޅުވީ ކައުންސިލްތަކާއި މަސައްކަތް ހަވާލުމިކުރަނީ ، ބީއޯކިއު އިއުލާންކުރުމަށްޓަކައި ވާންޖޭހޭ ހުރިހާ ތައްޔާރީތަކެއް ނިމި މިއަދުވެސް އިއުލާންކުރެވޭ ހިސާބަށް ގެނެސްދިނުމަށްފަހު ކަމަށެވެ. އެގޮތުން ލަސްނުވެ މި މަޝްރޫއުތައް ނިމިގެންދާނެކަމަށް ކަށަވަރުކުރާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ކައުންސިލްތަކަށް ހަވާލުކުރެވުނީ އަތޮޅުތެރޭގެ ސިއްހީ ކަންކަން އިސްލާހުކޮށް ރަނގަޅުކުރުމަށް ރައީސުލްޖުމްހޫރިއްޔާ ފައްޓަވާފައިވާ މަޝްރޫއުގެ ތެރެއިން ސިއްހީ ހިދުމަތުގެ ވަސީލަތް އިތުރުކޮށް ރަނގަޅުކުރުމަށްޓަކައި ކުރެވޭ މުހިންމު މަސައްކަތްކަމަށެވެ. މާލެ އަސް ސިއްހީ ހިދުމަތް ހޯދުމަށް އަންނަ އައުން މަދުކޮށް އަތޮޅުތެރޭގައި ފެންވަރު ރަނގަޅު ހިދުމަތް ދިނުމަކީ ސަރުކާރުގެ އެންމެ މުހިންމު އަސާސީ އެއް އަމާޒެވެ.
ސިއްހީ ހިދުމަތް ތަރައްގީކުރުމަށް މަޝްރުއޫތަށް ހަވާލުކުރެވުނު ރަށްތަކުގެ ތެރޭގައި، ހއ.މާރަންދޫ، ހއ.ފިއްލަދޫ، ހައ.ވަށަފަރު، ހދ.ވައިކަރަދޫ، ހދ.މަކުނުދޫ، ހދ.ފިނޭ، ނ.ކެނދިކުޅުދޫ، ތ.ހުޅުދުއްފާރު، ރ.ވާދޫ، އއ.ފެރިދޫ، އދ.ދިގުރަށް، އދ.ދަނގެތި، މ.މުލަށް، ލ.މާމެންދޫ، ގއ.މާމެންދޫ، ގއ.ދެއްވަދޫ، ގއ.ނިލަންދޫ، ގދ.ފިޔޯރީ، ގދ.މަޑަވެލި އަދި ސ.ހުޅުދޫގެ ހިމެނެއެވެ. މިނިސްޓަރ ވަނީ ކައުންސިލްތަކަށް ރައްޔިތުން އެދޭ ގޮތަށް އެ އަވަސް މިނުގައި މަސައްކަތް ކުރިޔަށް ގެންދިޔުމަށް އެދިވަޑައިގެންފައެވެ. އަދި މިނިސްޓްރީގެ ފަރާތުން ދެވެން ހުރި ހުރިހާ އެއްބާރުލުން ދޭނެކަމަށް ވިދާޅުވެފައެވެ.
ސިއްހީ ދައިރާގެ ޕަބްލިކް އިންވެސްޓްމެންޓް ޕްރޮގްރާމްތައް (ޕީއެސްއައިޕީ) ޕްރޮޖެކްޓްތަކެއް 20 ކައުންސިލާއި ހަވާލުކުރެވިފައިވާއިރު، މި ގެނުވުނު ބަދަލާއިއެކު މަރުކަޒުތަކުގެ ޖާގަ އިތުރުވެ ހިދުމަތުގެ ފެންވަރު ރަނަގަޅުކުރެވި މުވައްޒަފުންނާއި ހިދުމަތް ހޯދުމަށް އަންނަ ފަރާތްތަކަށް ބޮޑު ފަސޭހަކަމެއް ލިބިގެންދާނެކަމަށް ހެލްތް މިނިސްޓްރީން ވަނީ ބުނެފައެވެ. މި މަޝްރޫއުތައް ނިމިގެން ދާއިރު ސިއްހީ ނިޒާމަށް ބޮޑެތި ބަދަލުތަކެއް އަންނާނެކަމަށާއި ހަވާލުކުރެވިގެންދިޔަ މަޝްރޫއުތަކަށް ބަލާއިރު އެނގިގެންދާ ހަގީގަތަކީ އާބާދީ ކިތަންމެ ކުޑަޔަސް ހައްގުތަކާއި ވަސީލަތްތަކުގެ ގޮތުން އެއްވެސް ރަށެއް އަދުގެ ސަރުކާރުން ބާކީ ނުކުރާކަންކަމަށެވެ.
