18 އަހަރުވީ ހަނގުރާމަ ހުއްޓާލުމަށް އެމެރިކާ އާއި ތާލިބާން ތާރީޚީ އެއްބަސްވުމަކަށް

އަފްޣާނިސްތާނުގައި ހިނގަމުންދާ 18 އަހަރުވީ ހަނގުރާމަ ހުއްޓާލުމަށް އެމެރިކާ އާއި ޠާލިބާނުން އެއްބަސްވުމަކާ ހަމައަށް އައިސްފިއެވެ.

ހޮނިހިރު ދުވަހު ވެވުނު މި ތާރީޚީ އެއްބަސްވުމުގައި ވަނީ އަފްޣާނިސްތާނުގައި ޙަރަކާތްތެރިވާ އެމެރިކާގެ އަސްކަރީ ފައުޖުތައް އެ ޤައުމުން ބޭލުމަށެވެ. މިއީ، މިފަހުން އެމެރިކާގެ އަސްކަރީ ފައުޖުތަކެއް އެމެރިކާއިން ބޭރުގައި ތިބެގެން މިހާ ގިނަ ދުވަހު ހަނގުރާމަ ކޮށްފައިވާ ފަހަރެވެ. މި އެއްބަސްވުމުގައި ސޮއިކޮށްފައިވަނީ ޙަމަލާތައް ހުއްޓާލުމުގެ ވާހަކަތައް ކުރިޔަށްގެންދިޔަ ޤަތަރުގެ ދޯހާގަ އެވެ.

މި އެއްބަސްވުމުގައި އެމެރިކާގެ ފަރާތުން ސޮއިކުރައްވާފައިވަނީ، އަފްޣާނިސްތާނުގެ ރީކައުންސިލިއޭޝަން އަށް ކަނޑައަޅުއްވާފައި ހުންނަވާ އެމެރިކާގެ ޚާއްޞަ މަންދޫބު ޒަލްމޭ ޚާލިޒަދް އެވެ. އަދި މިއީ ޠާލިބާނާއި، އެމެރިކާ އާ ދެމެދު ކުރިޔަށްދިޔަ ވާހަކަތަކުގައި އެންމެ އިސްކޮށް ޙަރަކާތްތެރިވި ފަރާތްވެސް މެއެވެ. މި އެއްބަސްވުމުގައި ޠާލިބާންގެ ފަރާތުން ސޮއިކޮށްފައިވަނީ އެ ޖަމާޢަތުން އެންމެ އިސްކޮށް މި ވާހަކަތައް ދެއްކުމުގައި އުޅުއްވި މުއްލާ އަބްދުލްޣަނީ އެވެ. މި އެއްބަސްވުމުގައި ސޮއިކުރުމުގެ ރަސްމިއްޔާތުގައި އެމެރިކާގެ ޚާރިޖީ ވަޒީރު މައިކް ޕޮމްޕެއޯ އާއި ޠާލިބާން ޖަމާޢަތުގެ ލީޑަރުން ބައިވެރިވިއެވެ.

މި އެއްބަސްވުމުގެ ދަށުން އެމެރިކާ އާއި ޠާލިބާނުންވެސް ކަންތައްތަކެއް ކުރުމަށް ޖެހެއެވެ. އެގޮތުން ދާއިމީގޮތަކަށް ޙަމަލާ ބަދަލުކުރުން ހުއްޓާލުމަށް ދެ ފަރާތުންވެސް ކަންތައްތަކެއް ކުރަންޖެހެއެވެ. އެއްބަސްވުން ބުނާގޮތުން 14 މަސްދުވަހުގެ މުއްދަތެއް ވަނީ އެމެރިކާގެ ފައުޖުތަކާއި، އެ ޤައުމާ ގުޅިފައިވާ އެހެން ޤައުމުތަކުގެ އަސްކަރީ ފައުޖުތަކާއި، ނޮން ޑިޕްލޮމެޓިކް މީހުންނާއި، ޢާންމުންނާއި، ޕްރައިވެޓް ސެކިޔުރިޓީންނާއި، ޓްރެއިނަރުންނާއި، އެޑްވައިޒަރުންނާއި، ސަޕޯޓިން ޚިދުމަތްތައް ދޭ މީހުން އަފްޣާނިސްތާނުން ބޭލުމަށް ދީފައެވެ. އަދި ފުރަތަމަ 135 ދުވަހުގެ ތެރޭގައި އަފްޣާނިސްތާނުގައި ތިބި 8600 ސިފައިން އެ ޤައުމުން ބާލާނެއެވެ.

ހަތަރު ޞަފުޙާގެ މި އެއްބަސްވުން ބުނާގޮތުން އަފްޣާނިސްތާނުގެ ބިމުގައި އެމެރިކާ އާއި އެމެރިކާއަށް ވާގިވެރިވާ އެއްވެސް ޤައުމަކަށް ނުރައްކާކުރުމުގެ އެއްވެސް ފުރުޞަތެއް ޠާލިބާނުން ދީގެންނުވާނެ އެވެ. އަދި އެފަދަ އެއްވެސް ކަމެއް ނުކުރުމަށް ޠާލިބާނުން އެޖަމާޢަތުގެ ހުރިހާ މެންބަރުންނަށާއި، އެމީހުންނަށް ވާގިވެރިވާ އެންމެންނަށް އަންގަންޖެހޭއިރު އެފަދަ އެއްވެސް ބަޔަކަށް ޠާލިބާނުން ވާގިވެރިވެގެންވެސް ނުވާނެކަމަށް މިއެއްބަސްވުމުގައި ބުނެފައިވެ އެވެ. މީގެއިތުރުން އެމެރިކާ އާ ދެކޮޅަށް ޙަމަލާދިނުމަށް މީހުން ތަމްރީނުކުރުމާއި، ފައިސާ އެއްކުރުމާއި، އެފަދަ މީހުން ރެކްރޫޓްކުރުމުގެ އެއްވެސް ކަމެއް ޠާލިބާނުން ކޮށްގެން ނުވާނެކަމަށް މިއެއްބަސްވުމުގައި ބުނެފައިވެއެވެ.

މިއެއްބަސްވުމުގައި ސޮއިކުރުމަށް ފަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޕޮމްޕެއި ވިދާޅުވީ ޠާލިބާނުން މި އެއްބަސްވުމާއި ޚިލާފުވެއްޖެނަމަ، އަޅަންޖެހޭ ކޮންމެ ފިޔަވަޅެއް އެޅުމުގައި އެމެރިކާއިން ފަހެއް ނުޖެހޭނެއެވެ. އެމެރިކާގެ ރައްޔިތުން ދިފާޢުކުރުމަށް އަޅަންޖެހޭ ކޮންމެ ފިޔަވަޅެއް އަޅާނެކަމަށް ޕޮމްޕެއި ވަނީ ވިދާޅުވެފަ އެވެ. އަދި މި އެއްބަސްވުމަކީ އަފްޣާނިސްތާނުގެ ބިން ޓެރަރިސްޓް ޢަމަލުތައް ހިންގުމުގެ ހާއްޔަކަށް ނުހެދުމަށް އެޅުނު މުހިންމު ފިޔަވަޅެއްކަމަށް ޕޮމްޕެއި ވަނީ ވިދާޅުވެފައެވެ.

އެމެރިކާ އިން އަފްޣާނިސްތާނަށް އެރީ ސެޕްޓެންބަރު 2001 ގައި އަލް-ޤައިދާ އިން ނިއު ޔޯކަށް ދިން ޓެރަރިސްޓް ޙަމަލާ އަށް ފަހުއެވެ. އަފްޣާން ހަނގުރާމައިގައި އެމެރިކާގެ 2،400 އަށް ވުރެ ގިނަ ސިފައިން ވަނީ މަރުވެފައެވެ. އެމެރިކާގެ 12،000 އަށް ވުރެ ގިނަ ސިފައިން އަފްޣާނިސްތާނުގައި މިހާރު ވެސް ޙަރަކާތްތެރިވަމުންދާ ކަމަށް ރިޕޯޓުތައް ބުނެއެވެ.