ކުރިއަށް އޮތް ލޯކަލް ކައުންސިލް އިންތިހާބުގައި 12 ރަށެއްގެ އެކި މަގާމުތަކަށް ކުތރިމަތިލި މީހުންގެ ތެރެއިން 15 ގޮނޑިއަށް ގާނޫނީ އަދަދަށްވުރެ އިތުރަށް ކުރިމަތިލާފައި ނުވާތި އެ 15 މީހުން އިންތިހާބުވެފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަންސް ކޮމިޝަނުން ހޮނިހިރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ 12 ރަށެއްގެ 15 ގޮނޑިއަށް ގާނޫނީއަދަދަށް ކުރިމަތިލާފައިވާ ކަމަށާއި، އެމީހުން ވަނީ އެ ގޮނޑިތަކަށް ހޮވިފައި ކަމަށެވެ. އަދި އެމީހުން ނަން އަނބުރާ ނުގެންދާނަމަ މި މަހުގެ 4 ވަނަ ދުވަހު ބާއްވާ މާލެސިޓީގެ ގުރުއަތުލުގައި އެކަން ރަސްމީކޮށް އިއުލާން ކުރާނެ ކަމަށެވެ. މީގެ ތެރޭގައި މާލެ ސިޓީގެ ދާއިރާއަކާއި އައްޑު ސިޓީގެ ދާއިރާއެއް ވެސް ހިމެނެއެވެ.

މީގެ އިތުރުން އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގެ 22 ރަށަކަށް ކޮމިޓީއަށް މެންބަރުން އިންތިހާބުކުރަންޖެހޭ އަދަދަށް މީހުން ކުރިމަތިލާފައިވާތީ އެ ފަރާތްތަކަށް ވެސް ގޮނޑި ކަށަވަރުވެފައިވާ ކަމަށް ޝަރީފް ވިދާޅުވިއެވެ. މީގެ އިތުރުން 3 ރަށެއްގައި ކުރިމަތިލާންޖެހޭ އަދަދަށްވުރެ މަދުން ކުރިމަތިލާފައިވާ ކަމަށާއި، ކުރިމަތިލި މީހުންނަށް ގޮނޑި ކަށަވަރުވެފައިވާ ކަމަށެވެ.

މީގެ އިތުރުން ވ. ރަކީދޫ އަދި އދ. ރަތްމަންދޫއިން އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް އެއްވެސް ފަރާތަކުން ކުރިމަތިލާފައި ނުވާ ކަމަށް ޝަރީފް ވިދާޅުވިއެވެ. އަދި އަދަދު ހަމަނުވާ ވަރަށް ކުރިމަތިލާފައިވާ ތިން ރަށަކީ ހދ. ނޮޅިވަރަމް، ކ. ދިއްފުށި އަދި އއ. ފެރިދޫއިންނެވެ.

ޝަރީފް ވިދާޅުވީ މި ރަށްތަކުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް މެންބަރުން ހަމަކުރުމަށް އަލުން މެންބަރުން ނެގުމަށް އިއުލާންކޮށް އިންތިހާބެއް ބާއްވާނީ އެޕްރީލް 4 ވަނަ ދުވަހު ބާއްވާ އިންތިހާބަށް ފަހު މަގާމްތަކަށް މެންބަރުން އައްޔަންކުރާތާ 90 ދުވަސް ފަހުން ކަމަށެވެ.