އިޓާލިއަން ލީގުގެ މެޗުތައް އަނެއްކާވެސް ފަސްކޮށްފި

އިޓަލީގައި ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން އިޓާލިއަން ލީގުގެ މެޗުތައް އަނެއްކާވެސް ފަސްކޮށްފިއެވެ.

ކޮރޯނާވައިރަހުގެ ސަބަބުން މީގެ ކުރިން ވެސް އިޓާލިއަން ލީގުގެ މެޗުތައް ފަސްކޮށްފައިވެއެވެ.

މިކަން އިއުލާންކޮށް އިޓަލީގެ ބޮޑުވަޒީރު ޖޮސެޕީ ކޮންޓޭ ވިދާޅުވީ އިޓަލީގައި މިހާރު ފެތުރެމުންދާ ކޮރޯނާ ވައިރަހުގެ ސަބަބުން އިޓަލީގެ ލޮމްބާޑީ އާއި ވެނެޓޯ ސަރަހައްދުގައި ތާވަލުކޮށްފައިވާ ހުރިހާ ކުޅިވަރެއް ވަގުތީ ގޮތުން ފަސްކުރުމަށް ކުޅިވަރާ ބެހޭ ވުޒާރާއިން ނިންމައިފައިވާ ކަމަށެވެ. ބޮޑުވަޒީރު މިހެން ވިދާޅުވިއިރު ލޮމްބާޑީ ސަރަހައްދުގެ ގިނަ އަވަށްތައް މިހާރު ވަނީ ބަންދުކޮށްފައެވެ.

އިޓާލިއަން ލީގުގައި ފަސްކުރި މެޗުތަކުގެ ތެރޭގައި ތާވަލުގެ އެއްވަނައިގައި އޮތް ޔުވެންޓަސް އަދި ތިންވަނައިގައި އޮތް އިންޓަ މިލާން ބައްދަލުކުރާ މެޗާއި، އުދެނީސް، އޭސީ މިލާން، ޕާރމާ ގެ މެޗުތައް ހިމެނެއެވެ.

އަދި މި މެޗުތައް މިހާރު ކުޅުމަށް ތާވަލު ކުރެވިފައިވަނީ 13 މެއި ގައެވެ.

އިޓަލީގައި މިހާތަނަށް ކޮރޯނާވައިރަހުގެ 1000 އަށް ވުރެގިނަ ކޭސް ފެނިފައިވާއިރު ވައިރަހުގެ ސަބަބުން 20 މީހުން ވަނީ މަރުވެފައެވެ.

ކޮރޯނާވައިރަހުގެ ސަބަބުން ބައިނަލްއަގުވާމީ ފުޓުބޯޅަ މެޗުތައް ފަސްކުރަން ޖެހިދާނެ ކަމަށް ފީފާގެ ރައީސް ޖިއާނީ އިންފަންޓީނޯ ވެސް ވަނީ ވިދާޅުވެފައެވެ.

އިޓަލީގެ އިތުރުން ޔޫރަޕްގެ ގިނަ ގައުމުތަކުން ކޮރޯނާ ވައިރަސް ފެނިފައިވާއިރު، ގިނަ ގައުމުތަކުން އަންނަނީ ސަލާމަތީ ފިޔަވަޅުތައް ވަރުގަދަ ކުރަމުންނެވެ. އެގޮތުން ކްލަބު ލެވެލްގެ ގިނަ މެޗުތައް ސަޕޯޓަރުން ނުވައްދައި ކުޅެންވެސް މިހާރު ވަނީ ނިންމާފައެވެ. އަދި ބައެއް މެޗުތައް މިހާރު ވަނީ ފަސްކޮށްފައެވެ.

ކޮރޯނާ ވައިރަސް އެންމެ ފުރަތަމަ ފެނުނު ޗައިނާގައި މިހާރު އޮތީ ވަގުތީ ގޮތުން ހުރިހާ ފުޓްބޯޅަ ހަރަކާތެއް ހުއްޓާލާފައެވެ