މާލޭގައި ރޯގާއާއި، ފާނަބަސަންދު ފެތުރެނީ
ފާނަބަސަންދު ބަލީގެ ވެކްސިންގެ ދެ ޑޯޒް ފުރިހަމަނުކުރާ ފަރާތްތަކަށް ބަލި ޖެހުމުގެ ފުރުސަތު ބޮޑު
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)
މިދުވަސްވަރު މާލޭގައި ރޯގާ އަދި ފާނަބަސަންދު ފެތުރޭތީ، އެކަމަށް ސަމާލުވުމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން އިލްތިމާސްކޮށްފިއެވެ.
ހޮނިހިރު ދުވަހު އައިޖީއެމްއެޗުން ނެރުނު އިޢުލާނުގައި ބުނެފައިވަނީ، މިދުވަސްވަރަކީ މާލޭގައި ރޯގާ އަދި ފާނަބަސަންދު ފެތުރޭ ދުވަސްވަރަކަށްވާތީ ކުޑަކުދިންނާއި، ދިފާޢީ ނިޒާމު ބަލިކަށި ފަރާތްތަކާއި، އުމުރުން ދުވަސްވީ މީހުންގެ އިތުރުން، ރޯގާޖެހި ހުންއައިސް ނުވަތަ ކެއްސާ މީހުން ހޮސްޕިޓަލަށް ޒިޔާރަތް ނުކުރުމަށް އިލްތިމާސްކުރާ ކަމަށެވެ.
އޭގެ އިތުރުން، ފާނަބަސަންދު ޖެހިފައިވާ މީހަކު އުޅޭ ގެއެއްގައި އުޅޭ މީހުންގެ ތެރެއިން ކުރިން މި ބަލި ޖެހިފައިނުވާ އަދި ފާނަބަސަންދު ބަލީގެ ވެކްސިންގެ ދެ ޑޯޒް ފުރިހަމަކޮށްފައި ނުވާ ފަރާތްތަކަށްވެސް ބަލި ޖެހުމުގެ ފުރުޞަތު ބޮޑުކަން އައިޖީއެމްއެޗުން ވަނީ ފާހަގަކޮށްފައެވެ.
އައިޖީއެމްއެޗުން ވަނީ ބަލިން ރައްކާތެރިވުމަށާއި، ބަލި ފެތުރުން ހުއްޓުވުމަށް ސަމާލުކަން ދިނުމަށް އިލްތިމާސްކޮށްފައެވެ. އެގޮތުން އިންފްލުއެންޒާ ވެކްސިން، ފާނަބަސަންދު ވެކްސިން އަދި އެމްއާރްއެމް ވެކްސިން ނުޖަހާ ތިބި ފަރާތްތަކުން، ޞިއްޙީ މާހިރުންގެ ލަފައާ އެއްގޮތައް ވީ އެންމެ އަވަހަށް ޑޯޒްތައް ފުރިހަމަކުރުމަށް އައިޖީއެމްއެޗުން އެދިފައިވެއެވެ.
އޭގެ އިތުރުން، މިހާރު ދުނިޔޭގެ އެކި ކަންކޮޅުތަކުގައި ނުރައްކާތެރި ވައިރަސްއެއް ކަމަށްވާ ނޮވެލް ކޮރޯނާވައިރަސް (ކޮވިޑް-19) ފެތުރެމުންދާތީ، ކޮންމެހެން ދާންޖެހިއްޖެ ޙާލަތެއްގައި ނޫނީ، މި ދުވަސްވަރު ހޮސްޕިޓަލްތަކަށް ޒިޔާރަތް ނުކުރުމަށް ޑޮކްޓަރުން ވަނީ ލަފާދެއްވާފައެވެ.
