މި އަހަރުގެ ޒީރޯ ޕްލާސްޓިކް ރަން ނިންމާލައިފި
29 ފެބުރުއަރީ 2020 | ހޮނިހިރު 03:45ހަރަކަތުގެ މަޤްސަދަކީ ޕްލާސްޓިކުން ކުރާ ނޭދެވޭ އަސަރުތަކާމެދު ހޭލުންތެރިކަން އިތުރުކުރުން
މި އަހަރުގެ ޒީރޯ ޕްލާސްޓިކް ރަން ގެ ތެރެއިން
2019 ވަނަ އަހަރުން ފެށިގެން ބާއްވަމުން އަންނަ "ޒީރޯ ޕްލާސްޓިކް ރަން" ގެ މިއަހަރުގެ ދުވުން ކާމިޔާބުކަމާއެކު ނިންމާލައިފިއެވެ.
ޕްލާސްޓިކުން ކުރާ ނޭދެވޭ އަސަރުތަކާމެދު ހޭލުންތެރިކަން އިތުރު ކުރުމުގެ މަޤްސަދުގައި ކުރިއަށްގެންދާ މި ހަރަކާތަކީ އިންސައިޓް ކޮންސަލްޓަންސީ ސަރވިސަސް (އައިސީއެސް) އިން އިންތިޒާމުކޮށްގެން ކުރިއަށްގެންދިޔަ ހަރަކާތެކެވެ.
ހުކުރު ދުވަހު ބޭއްވި މި ދުވުމުގައި ގިނަ އަދަދެއްގެ އާންމުންވެސް ބައިވެރިވެފައިވާއިރު، މި ދުވުން ފެށީ ހުޅުމާލޭ ސެންޓްރަލް ޕާކުގައި ހުކުރު ދުވަހުގެ ހެނދުނު 07:00 ގައެވެ.
މި ދުވުމުގައި ފަރސްޓްލޭޑީ ފަޒްނާ އަޙްމަދުވެސް ބައިވެރިވެ ވަޑައިގެންނެވިއެވެ.
މި ދުވުމުގައި ބައިވެރިވި އާންމު ފަރާތަކުން ބުނީ، މިއީ ދިވެހިން ހޭލުންތެރިކުރުވުމަށް ވަރަށް މުހިންމުކަމެއް ކަމަށާއި، ދުވުމުގެ ތެރެއިން ވަރަށް ބައިވަރު ޕްލާސްޓިކް ރައްކާ ކުރެވިފައިވާ ކަމަށެވެ. މި ދުވުމުގައި ގިނަ އަދަދެއްގެ ކުޑަކުދިންނާއި، ބިދޭސީން ބައިވެރިވިއެވެ.
ކޮންމެ އަހަރަކު ވެސް މި ހަރަކާތް ބޭއްވުމަށް ހަމަޖެހިފައިވާއިރު، އައު ސަރުކާރުގެ 100 ދުވަހުގެ އަމާޒަކީ ސަރުކާރުގެ ވުޒާރާތަކާއި އޮފީސްތަކުގައި އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް މަދުކުރުމެވެ. ސަރުކާރުގެ މި އަމާޒާއެކު ރާއްޖޭގެ ގިނަ ގެސްޓް ހައުސްތަކާއި ކެފޭތައް އަދި އެނޫންވެސް ތަންތަނުން ވަނީ ޕްލާސްޓިކް ނައްތާލުމުގެ މަސައްކަތް ފަށާފައެވެ.
