ޔުއެފާ ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގައި ރަށުން ބޭރުގައި ރެއާލް ބަލިކޮށް މެންޗެސްޓާ ސިޓީން ކުއާޓާ ފައިނަލަށް ދަތުރުކުރުމުގެ އުންމީދު އާކޮށްފި އެވެ.

ރެއާލް މެޑްރިޑް ދަނޑުގައި ކުޅުނު މި މެޗު ސިޓީން ކާމިޔާބުކުރީ 2-1 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މި މެޗުގެ ފުރަތަމަ ހާފުގައި ދެ ޓީމަށް ވެސް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ. ފުރަތަމަ ހާފުގައި ރެއާލްއަށް ލިބުނު އެންމެ ހުސް ފުރުސަތު މެޗުގެ 30 ވަނަ މިނެޓުގައި ލިބުނީ އިތުބާރު ފޯވާޑް ކަރިމް ބެންޒެމާ އަށެވެ. ނަމަވެސް ހުސްކޮށްހުރެ އޭނާ ބޮލުން ފޮނުވައިލި ބޯޅަ ސިޓީގެ ކީޕަރު ވަނީ ހުށިޔާރު ކަމާއެކު ދިފާއު ކޮށްފައެވެ.

މެޗުގެ ފުރަތަމަ ހާފު ނިމިގެންދިޔައީ 0-0 ގެ ނަތީޖާއަކުންނެވެ.

ދެވަނަ ހާފު ފަށައިގެން ދެ ޓީމުން ކުރަމުން ގެންދިޔަ އެޓޭކުތައް އިތުރަށް ވަރުގަދަކުރި އިރު މެޗުގައި ލަނޑު ޖަހާ ފުރަތަމަ ލީޑު ނެގީ ރެއާލް މެޑްރިޑުންނެވެ. މި ލަނޑު މެޗުގެ 60 ވަނަ މިނެޓުގައި އެޓީމަށް ކާމިޔާބުކޮށްދިނީ މިޑްފިލްޑަރ އިސްކޯ އެވެ. އޭނާ މި ލަނޑު ކާމިޔާބުކުރީ ވިނިސަސް ޖޫނިއާގެ އެހީތެރިކަމާއެކުގައެވެ.

އެކަމަކު އޭގެ 18 މިނެޓު ފަހުން ސިޓީ އިން ވަނީ ލަނޑު ޖަހާ ނަތީޖާ އެއްވަރުކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ގެބްރިއަލް ޖީސަސް އެވެ. އޭނާ މި ލަނޑު ކާމިޔާބުކުރީ މިޑްފިލްޑަރ ކެވިން ޑިބްރައިނާގެ އެހީތެރިކަމާއެކުގައެވެ. މެޗުގައި ސިޓީން ލީޑު ނެގީ މެޗުގެ 83 ވަނަ މިނެޓުގައެވެ. މި ލަނޑު ލިބުނު ޕެނަލްޓީއަކުން އެޓީމަށް ކާމިޔާބުކޮށްދިނީ ކެވިން ޑިބްރައިނާ އެވެ.

މިއީ ސިޓީއިން ޗެމްޕިއަންސް ލީގުގައި ރެއާލް މެޑްރިޑް ބަލިކުރި ފުރަތަމަ ފަހަރެވެ. މި ދެޓީމު ބައްދަލުކުރާ ދެވަނަ ލެގުގެ މެޗު ކުޅުމަށް ހަމަޖެހިފައިވަނީ މާރޗް މަހުގެ 18 ވަނަ ދުވަހު ސިޓީގެ ދަނޑުގައެވެ.