އިޓާލިއަން ލީގުގެ ފަސް މެޗެއް ސަޕޯޓަރުން ނުވައްދާ ކުޅެނީ
މި މެޗުތަކަށް ސަޕޯޓަރުން ނުވައްދަން ނިންމީ އިޓަލީގައި ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން
އިންޓަ މިލާނާއި ޔުވެންޓަސް ބައްދަލުކުރި މެޗެއްގެ ތެރެއިން
އިޓަލީގެ އުތުރު ހިސާބުތަކުގައި ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން، އިޓާލިއަން ލީގުގެ ފަސް މެޗަކަށް ސަޕޯޓަރުން ނުވައްދަން ނިންމައިފި އެވެ.
ކޮރޯނާވައިރަހުގެ ސަބަބުން މީގެ ކުރިން އިޓާލިއަން ލީގުގެ ބައެއް މެޗުތައް ފަސްކޮށްފައިވާއިރު، އިތުރު ފަސް މެޗެއް ސަޕޯޓަރުން ނުވައްދާ ކުޅެން މިހާރު ވަނީ ނިންމާފައެވެ. ސަޕޯޓަރުން ނުވައްދާ ކުޅުމަށް ނިންމި މެޗުތަކަކީ މި ހަފުތާގައި ޔުވަންޓަސް އާއި އިންޓަ މިލާން ބައްދަލުކުރާ މެޗާއި، އުދިނީޒް އާއި ފިއޮރެންޓީނާ ބައްދަލުކުރާ މެޗާއި، އޭސީ މިލާނާއި ޖެނޯއާ ބައްދަލުކުރާ މެޗާއި، ޕާމާ އާއި ސްޕަލް ބައްދަލުކުރާ މެޗުގެ އިތުރުން ސަސުއޯލޯ އާއި ބްރެޝިއާ ބައްދަލުކުރާ މެޗެވެ.
މީގެ ކުރިން ވަނީ އިންޓަ މިލާނާއި ސަމްޕްޑޯރިއާ ބައްދަލުކުރާ މެޗާއި، ވެރޯނާ އާއި ކަގްލިއާރީ ބައްދަލުކުރާ މެޗުގެ އިތުރުން އެޓަލާންޓާ އާއި ސަސުއޮލޯގެ މެޗު ފަސްކޮށްފައެވެ.
މިހާތަނަށް އިޓަލީގެ އުތުރު ސަރަހައްދުގައި ކޮރޯނާވައިރަހަށް 229 މީހުން ޓެސްޓް ކޮށްފައިވާއިރު، މިބަލީގައި ހަތް މީހަކު ވަނީ މަރުވެފައެވެ. އިޓަލީގެ މީޑިއާ ރިޕޯޓުތައް ބުނާގޮތުން ކޮރޯނާވައިރަސް ޖެހުނު މީހުންގެ އަދަދު އިތުރުވީ ކުއްލިއަކަށެވެ. އަދި މި ވައިރަސްގެ ސަބަބުން މިލާން ހިމެނޭ ލޮމްބާޑީ ސަރަހައްދުގެ ގިނަ އަވަށްތައް މިހާރު ވަނީ ބަންދުކޮށްފައެވެ.
އިޓާލިއަން ލީގުގެ އިތުރުން ޔުރޮޕާ ލީގުގައި އިޓަލީގެ އިންޓަ މިލާނާއި ބަލްގޭރިއާގެ ލުޑޮގޮރެޓްސް ބައްދަލުކުރާ މެޗުވެސް ސަޕޯޓަރުން ނުވައްދާ ކުޅޭ ގޮތަށް ވަނީ ހަމަޖައްސާފައެވެ. އިންޓަ އާއި ލުޑޮގޮރެޓްސް ބައްދަލުކުރާ ދެވަނަ ލެގުގެ މެޗު ކުޅޭނީ އަންނަ ބުރާސްފަތި ދުވަހުގެރޭ މިލާނުގައެވެ.
