އޭރޯފްލޮޓް ރަޝިއަންގެ، ބޮއެން 777 ގެ ފްލައިޓްތައް ރާއްޖެއަށް ދަތުރު ފަށައިފި
ރާއްޖޭގައި އޭރޯފްލޮޓްގެ ފްލައިޓް އޮޕަރޭޓް ކުރާތާ 10 އަހަރު ވަނީ ވެފައި
އޭރޯފްލޮޓްގެ ބޮއިން 777 ގެ ފްލައިޓް
ރަޝިއަން އެއަރލައިން ނުވަތަ އޭރޯފްލޮޓް ރަޝިއަންގެ ބޮއިން 777 ގެ ފްލައިޓްތަކުގެ ޚާއްޞަ ދަތުރުތަކެއް ރާއްޖެއަށް ފަށައިފިއެވެ.
ރާއްޖެއަށް ޒިޔާރަތްކުރާ ރަޝިޔާގެ ފަތުރުވެރިންގެ މިންވަރު އިތުރުކުރުމުގެ މަޤްޞަދުގައި ކުރިޔަށްގެންދާ ކެމްޕޭނެއްގެ ދަށުން ބޮއިން 777 ގެ ފްލައިޓްތައް ފަށާފައިވަނީ ހޮނިހިރު ދުވަހު (މިއަދު) އެވެ.
ރާއްޖެއަށް މި ފްލައިޓް އޮޕަރޭޓް ކުރާ ދިވެހިރާއްޖޭގެ އެޖެންޓް މޯލްޑިވިއާނާ އެއަރލައިން ސަރވިސް ޕްރައިވެޓް ލިމިޓެޑުން ބުނީ، އޭރޯފްލޮޓް ރަޝިއަންގެ ބޮއިން 777ގެ ފްލައިޓްތަކުގެ ތާވަލު ދަތުރުތައް އަންނަ މާރޗް މަހުގެ ނިޔަލަށް ކުރިޔަށްގެންދިއުމަށް ހަމަޖެހިފައިވާކަމަށެވެ. އެގޮތުން ކޮންމެ ދުވަހަކުވެސް ރަޝިޔާގެ ވެރިރަށް މޮސްކޯ އާއި ރާއްޖެ އާއި ދެމެދު ތާވަލު ދަތުރުތައް ކުރާނެކަމަށެވެ.
މޯލްޑިވިއާނާ އެއަރލައިން ސަރވިސް ޕްރައިވެޓް ލިމިޓެޑުގެ ފްލައިޓް އޮޕަރެޝަންސް، އިސްމާއިލް އިބްރާހިމް ވިދާޅުވީ ހޮނިހިރު ދުވަހު ރާއްޖެ އާއި މޮސްކޯއާއި ދެމެދު ދަތުރުތައް ފަށާފައިވަނީ "އީއާރ 300- ބޮއެންގ777" އެއަރކްރާފްޓެއްގައި ކަމަށާއި، މި ފްލައިޓްގައި 402 ސީޓް ހުންނަ ކަމަށެވެ.
ރަޝިއަން އެއަރލައިނުން މިހާވެސް ޔޫރަޕުގެ ގިނަ ޢަދަދެއްގެ ފަތުރުވެރިން ރާއްޖެ އަންނަކަން ފާހަގަ ކުރައްވާ އިސްމާއިލް ވިދާޅުވީ މި ފްލައިޓް އޮޕެރޭޓް ކުރަމުންދަނީ ޔޫރަޕުގެ ޤައުމުތަކަށް ޓާގެޓްކޮށްގެން ކަމަށެވެ. ބޮޑު ފްލައިޓެއް އޮޕްރޭޓް ކުރުމުގެ މަޤުސަދަކީ ރާއްޖެ އަންނަ ފަތުރުވެރިން އިތުރުކުރުން ކަމަށް އޭނާ ވިދާޅުވިއެވެ.
ރަޝިއަން އެއަރލައިން ނުވަތަ ޢާންމު ނަމުން ނަަމަ، އޭރޯފްލޮޓް ރަޝިއަންގެ ޕްލައިޓްތައް އޮޕްރޭޓް ކުރާ ދިވެހިރާއްޖޭގެ އެޖެންޓް އެއަރލައިން ސަރވިސް ޕްރައިވެޓް ލިމިޓެޑުން އޭރޯފްލޮޓް ރަޝިއަންގެ ފްލައިޓުތައް އޮޕަރޭޓު ކުރަމުންދާތާ މިއީ 10 ވަނަ އަހަރެވެ.
