މިނިމަމް ވޭޖާއި ސަރވިސް ޗާރޖުގެ މައްސަލަ ހައްލުކުރާނަން، އެއީ އެހެން ޕާޓީއަކަށް ވާނެ ކަމެއް ނޫން: ރައީސް ނަޝީދު
22 ފެބުރުއަރީ 2020 | ހޮނިހިރު 11:49ރިސޯޓްތަކުގެ މުވައްޒަފުންގެ އުއްމީދުތައް އޮތީ އެމްޑީޕީގެ ސިޔާސަތުތަކާއި ގުޅިފައި
ލޯކަލް ކައުންސިލްތަކުގެ އިންތިހާބުގެ ޕޯސްޓަރު ހަރުކުރުމުގެ ކެމްޕެއިން ފެއްޓެވުމުގެ ރަސްމިއްޔާތުގެ ތެރެއިން
މިނިމަމް ވޭޖާއި ސަރވިސް ޗާރޖުގެ މައްސަލަ ޙައްލު ކުރައްވާނެ ކަމަށާއި، އެއީ އެހެން ސިޔާސީ ޕާޓީއަކަށް ކުރެވޭނެ ކަމެއް ނޫންކަމަށް އެމްޑީޕީގެ ރައީސް، ރައީސް މުޙައްމަދު ނަޝީދު ވިދާޅުވެއްޖެ އެވެ.
ލޯކަލް ކައުންސިލްތަކުގެ އިންތިޚާބުގެ އެމްޑީޕީގެ ކެމްޕެއިން ލޯންޗު ކުރި ޖަލްސާއަށް ފަހު، ހޮނިހިރު ދުވަހު އެމްޑީޕީގެ ކެމްޕެއިން މައި އޮފީހުގެ ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ އެމްޑީޕީގެ ސިޔާސަތު ބިނާވެފައި އޮންނާނީ ރިސޯޓުތަކުގައި އުޅޭ މުވައްޒަފުންގެ އުއްމީދުތައް ހަޤީޤަތަކަށް ހަދާދިނުމަށް ކަމަށެވެ.
ރައީސް ނަޝީދު ވިދާޅުވީ އެމްޑީޕީން ދެކަމެއްގެ ވާހަކަ އަބަދުވެސް ދައްކަމުން އަންނަކަމަށާއި، އެއްކަމަކީ އެންމެ ކުޑަ އުޖޫރައެއް ކަނޑައެޅުން ކަމަށާއި، އަނެއް ކަމަކީ ސަރވިސް ޗާރޖު ބަރާބަރަށް ދެވޭނެގޮތް ހޯދުން ކަމަށެވެ. ރައީސް ނަޝީދު ވިދާޅުވީ އެ ދެކަންތައް ކަނޑައެޅުމުގައި ލަސްވެފައި ވަނީ، ފުރަތަމަ ކަމަކަށް ޖުޑީޝަރީ އިޞްލާޙު ކުރުން ހިމެނޭތީ ކަމަށެވެ.
ރައީސް ނަޝީދު ވިދާޅުވީ ސުޕްރީމް ކޯޓުން ދިޔައީ، ރައްޔިތުންގެ މަޖިލީހުން ފާސްކުރާ ބައެއް ޤާނޫނުތައް ބާޠިލުކޮށް، ސުޕްރީމް ކޯޓުގެ އިހުތިޞާޞުން ބޭރުން ރައްޔިތުންގެ މަޖިލީހުގެ ބާރުގެ ތެރެއަށް ވަންނަމުން ކަމަށްވާތީ، ފުރަތަމަ ކަމަކަށް ޖުޑީޝަރީ އިޞްލާޙު ކޮށްގެން ނޫންގޮތަކަށް ކުރިއަށް ވަޑައިގެންނެވެން ނެތް ކަމަށެވެ. އެހެންކަމުން ސުޕްރީމް ކޯޓަށް ބޮޑެތި ބަދަލުތަކެއް ގެނެސް، އަދި ޖުޑީޝަލް ސަރވިސް ޤާނޫނަށް ވެސް ބޮޑެތި ބަދަލުތަކެއް ގެނެވިފައިވާ ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ މިނިމަމް ވޭޖަކީ އެހެން އެއްވެސް ސިޔާސީ ޕާޓީއެއްގެ ވަޢުދެއް ނޫން ކަމަށެވެ. އަދި އިދިކޮޅު ޕީޕީއެމް ސަރުކާރުގެ ފަސް އަހަރު އެޕާޓީން ގެންގުޅުނު، ރިސޯޓުތަކުގެ މުވައްޒަފުންނާ ގުޅޭ ސިޔާސަތަކީ ރިސޯޓުތަކުގެ ޙިއްސާ ރިސޯޓުތަކުގެ މުވައްޒަފުންނަށް ދޭން ބުނި ވަޢުދު ކަމަށާއި ނަމަވެސް ޕީޕީއެމްގެ ފަސް އަހަރުގެ ދައުރު ނިންމާލިއިރު އެކަން ނުވި ކަމަށެވެ.
ރައީސް ނަޝީދު ވިދާޅުވީ ކޮންމެ އިންތިޚާބެއްގައި ވެސް އެމްޑީޕީއަށް ރިސޯޓުތަކުގެ މުވައްޒަފުންގެ ވަރަށް ބޮޑު ތާޢީދެއް ލިބިފައިވާ ކަމަށެވެ. އަދި ރިސޯޓުތަކުގެ މުވައްޒަފުންގެ އުއްމީދުތައް ޙާޞިލުކޮށްދޭނެ ބަޔަކީވެސް އެމްޑީޕީ ކަމަށާއި، އެމްޑީީޕީގެ ސިޔާސަތުތައް ވެސް ރިސޯޓުތަކުގެ މުވައްޒަފުންގެ އުއްމީދުތަކާ ވަރަށް ބޮޑަށް ގުޅިފައިވާ ކަމަށް ރައީސް ނަޝީދު ވިދާޅުވި އެވެ. އެހެންކަމުން ރިސޯޓުތަކުގެ މުވައްޒަފުންގެ އުއްމީދުތައް އެމްޑީޕީގެ "އެޖެންޑާ 19"ގެ ދަށުން ޙާޞިލު ކޮށްދެއްވާނެ ކަމަށް ވެސް ރައީސް ނަޝީދު ވިދާޅުވި އެވެ.
