މާލެ ސިޓީގެ މޭޔަރު ކަމަށް އިދިކޮޅު ޕީޕީއެމުން ކުރިމަތިލައްވަނީ މުއިއްޒު
ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ކުރީގެ ހައުސިން މިނިސްޓަރ ޑރ.މުހައްމަދު މުއިއްޒު،
މި މާލެ މިފަހުން ހަލާކުކޮށްލުމުގައި އެންމެ އިސްކޮށް ހަރަކާތްތެރިވީ މިފަހަރުގެ އިންތިހާބުގައި މާލެ ސިޓީގެ މޭޔަރު ކަމަށް އިދިކޮޅު ޕީޕީއެމުގެ ފަރާތުން ކުރިމަތިލައްވާ ޑރ. މުހައްމަދު މުއިއްޒު ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކުރިޔަށް އޮތް ލޯކަލް ކައުންސިލް އިންތިޚާބުގެ ކެމްޕެއިން އިފްތިތާހުކުރުމަށް އެމްޑީޕީން ބޭއްވި "ރަށްވެހި ފަތިސް" ޖަލްސާގައި ވާހަކަފުޅުދައްކަވަމުން ރައީސް ޔާމީނުގެ ވެރިކަމުގައި ލާމަރުކަޒީ ގާނޫނަށް ފަސްފަހަރު ބަދަލުގެނައިކަން ފާހަގަކުރައްވާ ނަޝީދު ވިދާޅުވީ އެ ފަސް އަހަރު ކައުންސިލްތަކުން ބާރުތައް ނަގާ، އެބާރުތައް އަނެއްކާވެސް އަލުން ރައިސުލްޖުމްހޫރިއްޔާގެ މުށުތެރެއަށް ގެންނެވި ކަމަށެވެ.
ރައީސް ޔާމީންގެ ސަރުކާރުގައި ހައުސިންގ މިނިސްޓަރަކަށް ހުންނެވި ޑރ. މުއިއްޒުއަށް ރައީސް ނަޝީދު ވަނީ ވަރުގަދަ ބަހުގެ ހަމަލާތަކެއް ދެއްވާފައެވެ. އަދި ވަޒީރުކަމުގައި ހުންނަވައިގެން މާލެއަށް ކުރެއްވި ކަންތައްތައް ދިވެހި ރައްޔިތުންގެ ހަނދާނުން ފިލައިގެން ދާނެތޯ ނަޝީދު ސުވާލު ކުރެއްވިއެވެ. ނަޝީދު ވިދާޅުވީ ފަސް އަހަރު ވަންދެން ސިޓީ ކައުންސިލްގެ ހުރިހާ ބާރެއް ނެގުމަށްފަހު ކައުންސިލް އިންތިހާބަށް ކުރިމަތިލައްވަން މުއިއްޒު ލަދުގަންނަން ޖެހޭނެ ކަމަށެވެ.
ނަޝީދު ވިދާޅުވީ މުއިއްޒުއަކަށް މާލެ މީހަކު ވޯޓެއް ނުދޭނެ ކަމަށާއި އެއީ މާލެ ހަލާކު ކޮށްލުމުގެ މޭސްތިރިޔަކީ އޭނާ ކަމަށް ވާތީ ކަމަށެވެ. ގޯތި ދިނުމުގެ ލިސްޓުގެ މައްސަލައާއި މުއިއްޒުގެ "އައުވާނުންނަށް'" 7000 ގޯތި ދިން މައްސައަށް އިޝާރާތްކުރައްވާ ނަޝީދު ވިދާޅުވީ އެކަންކަން "އޯކޭ" އެއް ނޫން ކަމަށެވެ.
