މާޒީ އިޔާދަކުރަން ބޭނުންނުވާ އެމްޑީޕީއަށް ވޯޓުދޭންޖެހޭ: މިނިސްޓަރު އަސްލަމް
22 ފެބުރުއަރީ 2020 | ހޮނިހިރު 04:56ރައްޔިތުން އެދޭގޮތަށް މަސައްކަތް ކުރެވޭނީ އެމްޑީޕީގެ ކެންޑިޑޭޓުންނަށް
އައްޑޫގައި ކުރިއަށް ގެންދިޔަ ޖަލްސާގެ ތެރެއިން
މާޒީ އިޔާދަކުރަން ބޭނުންނުވާނަމަ ކުރިއަށް އޮތް ލޯކަލް ކައުންސިލް އިންތިޚާބުގެ މެޖޯރިޓީ އެމްޑީޕީއަށް ދޭންޖެހޭ ކަމަށް މިނިސްޓަރ އޮފް ނެޝަނަލް ޕްލޭނިންގ އެންޑް އިންފްރާސްޓަކްޗަރ މުޙައްމަދު އަސްލަމް ވިދާޅުވެއްޖެއެވެ.
"ރަށްވެހި ފަތިސް" ކެމްޕޭން ފެށުމަށް އައްޑޫ ސިޓީ ހިތަދޫގައި ބޭއްވި ޖަލްސާ ޝަރަފުވެރިކޮށްދެއްވާ މިނިސްޓަރު އަސްލަމް ވިދާޅުވީ އިންސާނުންނަކީ މާޒީގައި ހަޔާތުގައި ދިމާވެފައިވާ ކަންކަމުގެ ތަޖުރިބާގައި މުސްތަގުބަލް ބިނާ ކުރާ ބައެއް ކަމަށާއި، މަޒީގެ ތެރެއިން ފުދޭ ވަރަކަށް ކަންކަން ތަޖުރިބާ ކުރެވިފައިވާ ކަމަށެވެ. މިތަޖުރިބާތަކުގެ ކަންކަން އިސްލާހުކޮށް ރައްޔިތުން އެދޭގޮތަށް މަސައްކަތް ކުރެވޭނީ އެމްޑީޕީގެ ކެންޑިޑޭޓުންނަށް ކަމަށެވެ.
މިހާރު ވެސް ބައެއް ރަށްރަށުން އެމްޑީޕީގެ ކެނޑިޑޭޓުންނަށް ގޮނޑި ކަށަވަރުވެފައިވާތީ އެކަމަށް އަލިއަޅުއްވާލައްވާ މިނިސްޓަރު އަސްލަމް ވިދާޅުވީ އިދިކޮޅު ސިޔާސީ ޕާޓީތަކުގެ ކެނޑިޑޭޓުންގެ ކިބައިގައި ވާދަކުރާނެ ހިތްވަރު ނެތް ކަމަށެވެ.
މިނިސްޓަރު އަސްލަމް ވިދާޅުވީ އަޅުގަނޑުމެން ކުރަމުން އައި އުންމީދު ފުރިހަމަ ކުރަންޖެހޭ ދުވަސް އައިސްޖެހިފައިވާ ކަމަށާއި، ރައްޔިތުންގެ ހުވަފެންތަކުގައި ހަގީގީ ކުލަޖެއްސުމަށް ލޯކަލް ކައުންސިލް އިންތިޚާބުގެ މެޖޯރިޓީ އެމްޑީޕީއަށް ލިބެންޖެހޭ ކަމަށެވެ.
މިނިސްޓަރު އަސްލަމް ވިދާޅުވީ ރާއްޖެ އެމްޑީޕީގެ ފިކުރަށް ބަދަލުކޮށްފައިވާ ކަމަށެވެ. އެގޮތުން ވެރިކަން ކުރުމުގެ ބާރާއި، ގާނޫނު ހެދުމުގެ ބާރުދީފައިވާކަން މިނިސްޓަރު ފާހަގަކުރެއްވިއެވެ. އަދި ވިދާޅުވީ ދެން އޮތީ ކަންކަން ތަންފީޒުކުރުން ކަމަށާއި، އެބާރުވެސް އަދި އެޒިންމާވެސް އެމްޑީޕީއަށް ފުރިހަމަ ގޮތުގައިދީގެން މެނުވީ ކަންކަން ހާސިލް ނުވާނެ ކަމަށެވެ.
މިނިސްޓަރު އަސްލަމް ވިދާޅުވީ ގާނޫނުތަކުގެ ތެރެއިން ދިވެހިރާއްޖޭގެ މިލިޓަރީ ދައުލަތެއް ސިފަތައް ދަމަހައްޓާފައިހުރި ނަމަވެސް އެމްޑީޕީން އެކަން ނިމުމަކަށް ގެނެސްފައިވާ ކަމަށެވެ. ރައްޔިތުންނަށް ރައްޔިތުން ބޭނުންވާފަދަ ޚިދުމަތްތައް ފޯރުކޮށްދިނުމުގައި ރައްޔިތުން އިހުތިޔާރުކުރާ ބަޔަކު ލައްވާ އެކަން ކުރުވުމަށް ގާނޫނީ މަގު ހުޅުވާލަދީފައިވާ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ މުސްތަގުބަލަށްޓަކައި، މިފުރުސަތުގެ ބޭނުން ހިފައި މިފަހަރުގެ ލޯކަލް ކައުންސިލް އިންތިޚާބުގެ ވޯޓު އެމްޑީޕީގެ ކެންޑިޑޭޓުންނަށްދޭންޖެހޭ ކަމަށެވެ.
