ރާއްޖެ-ޗައިނާ މެޗު ތައިލެންޑަށް ބަދަލުކޮށްފި

ފީފާ ވޯލްޑް ކަޕް އަދި އޭއެފްސީ އޭޝިއަން ކަޕްގެ ޖޮއިންޓް ކޮލިފިކޭޝަނުގައި އަންނަ މާޗު މަހު 26 ވަނަ ދުވަހު ޗައިނާގައި ރާއްޖެ އާއި ޗައިނާ ކުޅެން ހަމަޖެހިފައި އޮތް މެޗު، ތައިލެންޑަށް ބަދަލުކޮށްފި އެވެ.

ޗައިނާގައި ކުޅެން ހަމަޖެހިފައި އޮތް މެޗު ތައިލެންޑަށް ބަދަލުކުރީ އެ ގައުމުގައި ފެތުރެމުން އަންނަ ކޮރޯނާ ވައިރަހުގެ ސަބަބުންނެވެ. އޭއެފްސީން ހުކުރު ދުވަހު ނެރުނު ބަޔާނެއްގައި ބުނެފައިވަނީ ޗައިނާގެ އެދުމުގެ މަތިން މި މެޗު ތައިލެންޑުގެ ބުރިއަމް ޕޮރޮވިންސްގައި ހުންނަ ޗޭންގް އެރީނާގައި ކުޅުމަށް ނިންމާފައިވާ ކަމަށެވެ. އެ ދަނޑަކީ 32،600 މީހުންގެ ޖާގައިގެ ދަނޑެކެވެ.

ރާއްޖެ އާއި ޗައިނާ މެޗުގެ އިތުރުން ގުއާމް އާއި ޗައިނާ ބައްދަލުކުރުމަށް ހަމަޖެހިފައި އޮތް މެޗުވެސް މިހާރު ކުޅުމަށް ނިންމާފައިވަނީ ތައިލެންޑުގައެވެ.

ޗައިނާ މެޗަށް ތައްޔާރުވުމަށް ގައުމީ ޓީމުން ވަނީ ފަރިތަކުރުންތައް ފަށާފައެވެ. އެގޮތުން މިހާރު ވަނީ 31 ކުޅުންތެރިންގެ ސްކޮޑެއްވެސް އެކުލަވާލާފައެވެ.

އަންނަ މާޗު މަހު 26 ވަނަ ދުވަހު ޗައިނާއާ ދެކޮޅަށް ރާއްޖެ ނުކުންނައިރު، ރާއްޖޭގައި ކުޅުނު މެޗުން ޗައިނާ ވަނީ 5-0 އިން ރާއްޖެ ބަލިކޮށްފައެވެ. އެކަމަކު އޭގެ ފަހުން ސީރިއާ އަތުން 2-1 އިން ޗައިނާ ބަލިވުމުން އެ ޓީމުގެ ކޯޗު އިޓަލީގެ މާސެލޯ ލިއްޕީ ވަނީ މަގާމުން އިސްތިއުފާ ދީފައެވެ.

ކޮލިފައިންގައި ރާއްޖެ އޮތް ގްރޫޕް އޭގެ އެއްވަނައިގައި ސީރިއާ އޮތީ 54 މެޗުންވެސް މޮޅުވެ 15 ޕޮއިންޓާއެކު އެވެ. ދެވަނައިގައި އޮތް ޗައިނާއިން ވަނީ 4 މެޗުން 7 ޕޮއިންޓް ހޯދާފައެވެ. ތިންވަނައިގައި އޮތް ފިލިޕީންސް ވެސް ވަނީ 5 މެޗުން 7 ޕޮއިންޓް ހަމަކޮށްފައެވެ. ހަތަރުވަނައިގައި އޮތް ރާއްޖެއަށް 5 މެޗުން ލިބިފައިވަނީ 6 ޕޮއިންޓެވެ. އެންމެ ފުލުގައި އޮތް ގުއާމަށް އަދި ޕޮއިންޓެއް ނުލިބެ އެވެ.