ދީނުގެ ނަމުގައި ބޮންގޮއްވައި މީހުންގެ ފުރާނައަށް ގެއްލުންދެނީ ދީން ނޭނގޭތީ: ޚުތުބާ

އިސްލާމް ދީނުގެ ނަމުގައި ބޮން ގޮއްވައި މީހުންގެ ފުރާނައާއި ގެދޮރަށް ގެއްލުންދެނީ އިސްލާމް ދީން ރަނގަޅަށް ނޭނގޭތީ ކަމަށާއި، އެފަދަ ޢަމަލުތައް ހިންގާ މީހުންނާ އިސްލާމް ދީނާ އެއްވެސް ގުޅުމެއް ނެތް ކަމަށް މިއަދުގެ ހުކުރު ޚުތުބާގައި ބުނެފިއެވެ.

"އިސްލާމް ދީނަކީ ސަމާހަތުގެ ދީނެވެ" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނީ، އިސްލާމް ދީނުގައި ދީނާއި، ފުރާނައާއި، ބުއްދިއާއި، މުދަލާއި އަދި އަބުރު ޙުރުމަތްތެރި ކުރެވިގެންވާ ކަމަށެވެ. އެގޮތުން މި 5 ކަންތައް ހިމާޔަތް ކުރުމަކީ ސަމާވީ (ﷲ ބާއްވައިލެއްވި) ހުރިހާ ޝަރީއަތްތަކެއްގެ މައިގަނޑު އަސާސް ކަމަށް ޚުތުބާގައި ބުނެފައިވެއެވެ.

ވުމާއެކު ބިމުގައި ފަސާދަ އުފައްދައި ލޭއޮހޮރުވާ މީހުންނާއި، ދީނުގެ ނަމުގައި އެހެން މީހުންގެ ޙައްޤުތަކަށް އަރައިގަންނަ މީހުން އެކަން ކުރަނީ ދީން ރަނގަޅަށް ނޭނގޭތީކަމަށް ޚުތުބާގައި ބުނެފައިވެއެވެ. އެގޮތުން އެފަދަ ޢަމަލުތައް ހިންގާ މީހުންނަކީ އޯގާތެރިކަމެއް ނެތް ރަޙުމުކުޑަ ބައެއް ކަމަށާއި، އެއީ އިސްލާމް ދީނަށްވެސް ހުރި ހުތުރެއްގެ ގޮތުގައި ޚުތުބާގައި ވަނީ ސިފަކޮށްފައެވެ.

ޚުތުބާގައި އިތުރަށް ބުނީ، އިސްލާމް ދީނަކީ މަޖުބޫރު ކުރުވައިގެން މީހުން ދީނަށް ވައްދަން ގޮވާލާ ދީނެއް ނޫން ކަމަށެވެ. އެގޮތުން އިސްލާމް ދީން ދުނިޔޭގެ މަޝްރިޤާއި މަޢްރިބަށް އަދި ދުނިޔޭގެ ހަ ބިތަށްވެސް ފޯރާފައިވަނީ ކަނޑިބަޑީގެ ޒަރިއްޔާރިން ނޫންކަން ފާހަގަކޮށް ޚުތުބާގައި ބުނީ، އިސްލާމް ދީން ފަތުރާފައިވަނީ ދީނުގެ މަތިވެރި ޙުލްޤު ފެނި އެއީ އެންމެ ޙައްޤުކަން ބޮޑު ދީންކަން މީސްތަކުންނަށް ވިސްނިގެން ކަމަށެވެ.

އޭގެ އިތުރުން، އިސްލާމް ދީން ގޮވާލަނީ މުސްލިމުން ނޫން މީހުންނަށްވެސް އޯގާތެރިވުމަށްކަން ފާހަގަކޮށް ޚުތުބާގައި އިތުރަށް ބުނީ، ޢައިރު މުސްލިމުންނާއި ޢަދާވަތްތެރިންނާމެެދުވެސް ޢަދުލުވެރި ވާން ޖެހޭނެ ކަމަށެވެ.

ޚުތުބާގައި އިތުރަށް ބުނީ، ސަރުކާރުން ނުވަތަ ކުންފުންޏަކުން ނޫނީ ޢާންމު ރައްޔިތަކުވެސް ޢައިރު މުސްލިމަކަށް އަމާންކަން ދީފިނަމަ އެމީހަކަށް ރައްކާތެެރިކަން ދިނުމަކީ އެންމެންގެ މައްޗަށްވެސް ވާޖިބުވެގެންވާ ކަމެއް ކަމަށެވެ.

އެގޮތުން އިސްލާމް ދީނުގައި ހުންނަ މިފަދަ ރިވެތި އުސޫލުތަކާއި ޙުލްޤުތަކަށް ޒުވާނުން އަހުލުވެރި ކުރުވައި ދަސްކޮށްދިނުމުގެ މުހިއްމުކަން ޚުތުބާގައި ފާހަގަކޮށްފައިވެއެވެ.