ހެލްތު މިނިސްޓްރީގެ ޕަރމަނަންޓް ސެކްރެޓަރީ (ޕީއެސް) ޚަދީޖާ ޢަބްދުއްސަމަދު ޢަބްދުﷲ މަޤާމުން ވަކި ކުރަން، ސިވިލް ސަރވިސް ކޮމިޝަން (ސީއެސްސީ) އިން ނިންމައިފިއެވެ.
ޚަދިޖާ މަޤާމުން ވަކިކުރިކަން ސީއެސްސީގެ ޑިރެކްޓަރ ޖެނެރަލް ޢަބްދުﷲ ސަޢީދު ވަނީ ރާއްޖެ.އެމްވީ އަށް ކަށަވަރު ކޮށްދީފައެވެ. ޢަބްދުﷲ ސަޢީދު ވިދާޅުވީ، ޚަދީޖާ ވަކި ކޮށްފައިވަނީ އޭނާއާ ބެހޭ ގޮތުން އަމިއްލަ ފަރާތަކުން އެ ކޮމިޝަނަށް ހުށައެޅި މައްސަލަ އެއް ބެލުމަށް ފަހު ކަމަށެވެ. އެކަމަކު އެއީ ކޮން މައްސަލައަކާއި ގުޅިގެން ކަމެއް އޭނާ ހާމައެއް ނުކުރައްވައެވެ.
ރާއްޖެ.އެމްވީ އަށް އެނގިފައިވާ ގޮތުން ޚަދީޖާ ވަކިކޮށްފައިވަނީ، މިދިޔަ ރިޔާސީ އިންތިޚާބުގެ ދުވަސްވަރު ހެލްތު މިނިސްޓްރީގެ ބައެއް މުވައްޒަފުން މަސައްކަތް ކުރާތަން ނޫން އެހެންތަނަށް ސިޔާސީ ނުފޫޒު ބޭނުންކޮށްގެން ބަދަލުކުރަން މަސައްކަތް ކުރުމުންނެވެ. ސީއެސްސީން ވަނީ ޕީއެސްއަކު ހޯދުމަށް އިޢުލާންކޮށްފައެވެ.
