ސިއްރު ހެކިބަސް ނެގުމާމެދު ގޮތެއް ނިންމުން ލަސްވުމާއި ގުޅިގެން ޖިނާޢީ މައްސަލަތައް ލަސްވުމަކީ ކަންބޮޑުވާކަމެއް: ޕީޖީ
20 ފެބުރުއަރީ 2020 | ބުރާސްފަތި 12:50އެ މައްސަލަ ފެންމަތިވީ ފަނޑިޔާރު އަބްދުﷲ ސައީދުއަށް ކުރި ޙުކުމް، ހައިކޯޓުން ބާޠިލުކުރުމާ ގުޅިގެން
ޕްރޮސެކިއުޓަރ ޖެނެރަލް ހުސައިން ޝަމީމް
ޖިނާޢީ މައްސަލަތަކުގައި މިހާރު އޮންނަ ގޮތުން ސިއްރުން ހެކިބަސް ނުނެގޭނެ ކަމަށް ހައިކޯޓުން ނިންމި ނިންމުން އިލްތިމާސް ކޮށްފައިވާއިރު، އެކަމާ ގުޅޭގޮތުން ގޮތެއް ނިންމުން ލަސްވުމަކީ ކަންބޮޑުވެވަޑައިގަންނަވާ ކަމެއް ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ސިއްރު ހެއްކާ ބެހޭ ބައި އުނިކުރުމަށް ޕްރޮސެކިއުޓަރ ޖެނަރަލް އޮފީހުން ސުޕްރިމް ކޯޓަށް ހުށައަޅާފައިވަނީ ކުރީގެ ރައީސް ޢަބްދުﷲ ޔާމީނުގެ ދައުރުގައި ޖަލަށް ލެވުނު ކުރީގެ އުއްތަމަ ފަނޑިޔާރު ޢަބްދުﷲ ސަޢީދުގެ މައްޗަށް ދައުލަތުން ކުރި ޢަދުލު އިންސާފު ޤާއިމުކުރަން ހުރަސްއެޅުމުގެ ދަޢުވާ ސާބިތުވެ ކުރި ޙުކުމް، ހައިކޯޓުން ބާޠިލުކުރުމާ ގުޅިގެންނެވެ.
ޕީޖީން ބުނީ ދިވެހިރާއްޖޭގެ ހައިކޯޓުގެ ޤަޟިއްޔާގައި ސިއްރު ހެއްކާބެހޭގޮތުން ކަނޑައެޅުއްވި އުޞޫލު، ޤާނޫނީ ގޮތުން ރަނގަޅުކަމަށް ނުފެންނަ ކަމަށެވެ.
އެގޮތުން 1976 ވަނަ އަހަރު ޢަމަލުކުރަން ފެށި ހެއްކާއި ބެހޭ ޤާނޫނަށް މިހާތަނަށްވެސް އިސްލާޙެއް އައިސްފައިނުވާއިރު، އެ ޤާނޫނުގައި ހެކިބަސް ދޭމީހުން ޙިމާޔަތްކޮށް ރައްކާތެރިކަން ކަށަވަރު ކުރެވޭ ގޮތަށް ހެކިބަސް ނެގުމަށް ކަނޑައަޅާފައިވާ ގޮތެއް ނެތްކަން ޙުކުމުގައި ބަޔާންކޮށްފައިވެއެވެ.
އޭގެ އިތުރުން، ޖިނާއީ އިޖުރާޢަތު ޤާނޫނުގެ 149 ވަނަ މާއްދާގެ (ހ) އާއިއެކު، ޤާނޫނުގެ 119، 131 އާއި 134 ހިމަނައި، މުޅި ޤާނޫނު އެކުގައި ކިޔާއިރު ސިއްރު ހެކިބަހުގެ އުޞޫލު ރަނގަޅުކަމަށް ނުފެންނާތީ ޙުކުމުގެ އެބައި ސުޕްރީމް ކޯޓަށް ހުށަހަޅަން ނިންމާފައިވާކަމަށް ޕީޖީވެސް ވިދާޅުވެފައިވެއެވެ.
އެކަމާ ގުޅޭގޮތުން "ރާއްޖެއެމްވީ"އަށް މަޢުލޫމާތު ދެއްވަމުން ޕީޖީ ހުސައިން ޝަމީމް ވިދާޅުވީ، ސިއްރު ހެކިން ހިމެނޭ ޖިނާޢީ މައްސަލަތައް ލަސްވުމަކީ ކަންބޮޑުވެވަޑައިގަންނަވާ ކަމެއް ކަމަށާއި، އެ މައްސަލަ ސުޕްރީމް ކޯޓުގައި އިލްތިމާސް ކޮށްފައިވާއިރު، މައްސަލަ އަވަސް ކޮށްދެއްވުން އެދި ކޯޓަށް ސިޓީވެސް ހުށައަޅާފައިވާ ކަމަށެވެ.
ހައިކޯޓުގެ ޙުކުމް އިލްތިމާސް ކޮށްފައިވާތީ ޖިނާޢީ ބޮޑެތި މައްސަލަތަކުގައި ސިއްރުން ހެކިންގެ ހެކިބަސް ނެގުން ކްރިމިނަލް ކޯޓުންވެސް ވަނީ މަޑުޖައްސާލާފައެވެ. އެގޮތުން ލިޓަސް ސަރވިސް ސެންޓަރުގައި މަރާލާފައިވާ މުޙައްމަދު އަނަސްގެ މަރުގެ މައްސަލައިގައި ދާދި ފަހުން ބޭއްވި އަޑުއެހުމުގައިވެސް ދިފާޢީ ވަކީލުން ވަނީ އެކަމުގެ ކަންބޮޑުވުން ޝަރީޢަތަށް ޙިއްސާކޮށްފައެވެ. އަދި ދައުލަތުންވެސް ވަނީ އެ މައްސަލައާ މެދު ގޮތެއް ނިންމުން އަވަސް ކޮށްދިނުމަށް ސުޕްރީމް ކޯޓުގައި އެދިފައިވާކަން ފާހަގަކޮށްފައެވެ.
