ލޯކަލް ކައުންސިލްތަކުގެ އިންތިޚާބުގައި ވާދަކުރުމަށް 3000 އަށް ވުރެ ގިނަ ފޯމު ހުށަހަޅައިފި
20 ފެބުރުއަރީ 2020 | ބުރާސްފަތި 13:51ވޯޓު ކަރުދާހުގައި ހަތަރު ވޯޓު ހިމެނޭނެ، އެހެންނަމަވެސް ކެންޑިޑޭޓުންގެ ނަމްބަރުތައް ތަކުރާރެއް ނުވާނެ
އިލެކްޝަންސް ކޮމިޝަންގެ ބައެއް މެމްބަރުން
ލޯކަލް ކައުންސިލްތަކުގެ އިންތިޚާބުގައި ވާދަ ކުރުމަށްޓަކައި ހުޅުވާލި ފުރުޞަތު ބުރާސްފަތި ދުވަހު (މިއަދު)ގެ ހަވީރު 4:00 އަށް ސުންގަޑި ހަމަވީއިރު 3،000 ވުރެ ގިނަ ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަނުގެ ރައީސް އަޙްމަދު ޝަރީފް އާއި، އެކޮމިޝަނުގެ ނައިބު ރައީސް އަޙްމަދު އަކްރަމް "ރާއްޖެޓީވީ"އަށް ބުރާސްފަތި ދުވަހު ދެއްވި ޚާއްޞަ އިންޓަވިއުއެއްގައި ވިދާޅުވީ، ލޯކަލް ކައުންސިލްތަކުގެ އިންތިޚާބުގައި ވާދަކުރުމަށް ކެންޑިޑޭޓުންގެ ފޯމު ހުށަހެޅުމުގެ ސުންގަޑިއަކީ، ބުރާސްފަތި ދުވަހުގެ 15:00 ކަމަށެވެ. ނަމަވެސް، ބައެއް ފަރާތްތަކުގެ އެދިލެއްވުމުގެ މަތިން އެއްގަޑިއިރު އިތުރުކޮށް، ހަވީރު 04:00 ޖަހަންދެން ފޯމު ބަލައިގަތް ކަމަށެވެ.
ޝަރީފް ވިދާޅުވީ ލޯކަލް ކައުންސިލްތަކުގެ އިންތިޚާބަށް ކުރިމަތިލުމަށް ހުޅުވާލި ފުރުޞަތުގައި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބަށް ކުރިމަތިލުމުގެ ފުރުޞަތުވެސް ހުޅުވާލި ކަމަށެވެ. ނަމަވެސް އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގައި ވެސް ސިޔާސީ ޕާޓީތަކުން ވާދަ ކުރުމަށް ބޭނުންވާތީއާއި ޕްރައިމަރީ ބާއްވަން ޖެހޭތީ، އަންހެނުންގެ ތަރައްޤީއަށް މަސައްކަތްކުރާ ކޮމެޓީއަށް ކުރިމަތިލުމަށް ފޯމު ހުށަހެޅުމުގެ ސުންގަޑިއަކީ މިމަހުގެ 24 ވަނަ ދުވަސް ކަމަށްވެސް ޝަރީފް ވިދާޅުވި އެވެ.
ޝަރީފް ވިދާޅުވީ ލޯކަލް ކައުންސިލްތަކުގެ އިންތިޚާބުގެ 982 މަޤާމަށް 3000 އެއްހާ ފޯމު މިވަގުތާ ހަމައަށް އިލެކްޝަންސް ކޮމިޝަނަށް ހުށަހަޅާފައިވާ ކަމަށެވެ.
އިލެކްޝަންސް ކޮމިޝަނުގެ ނައިބު ރައީސް އަޙްމަދު އަކްރަމް ވިދާޅުވީ، ލޯކަލް ކައުންސިލްތަކުގެ އިންތިޚާބާ ގުޅޭ ކަންކަން އިލެކްޝަނާއި ބެހޭ ޤާނޫނާއި، އަދި އެ ކޮމިޝަނުން ކަންކަން ތަރުތީބު ކޮށްފައިވާ ގޮތަށް ކުރިއަށްދާ ކަމަށެވެ.
މީގެއިތުރުން އަކްރަމް ވިދާޅުވީ ލޯކަލް ކައުންސިލްތަކުގެ އިންތިޚާބަށް ކުރިމަތިލި ކެންޑިޑޭޓުންގެ ނަންތައް އަންނަ މަހުގެ ހަތަރު ވަނަ ދުވަހު އިޢުލާން ކުރާނެ ކަމަށެވެ. އަދި ހަތަރު ވަނަ ދުވަހު ކެންޑިޑޭޓުންގެ ގުރުއަތުލުންވެސް ކުރިއަށް ދާނެ ކަމަށްވެސް އަކްރަމް ވިދާޅުވި އެވެ.
އަންނަ އޭޕްރީލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލްތަކުގެ އިންތިޚާބަކީ ލަމަރުކަޒީ ޤާނޫނަށް ބޮޑެތި ބަދަލުތަކެއް ގެނައުމަށްފަހު ބޭއްވޭ ވަރަށް ތަފާތު އިންތިޚާބެކެވެ. މީގެކުރިން ބޭއްވި ލޯކަލް ކައުންސިލްތަކުގެ އިންތިޚާބާ ތާފަތުކޮށް، މި އިންތިޚާބުގައި ސިޓީތަކުގެ މޭޔަރު ކަމުގެ މަޤާމާއި، އަތޮޅު ކައުންސިލްގެ ރައީސްގެ މަޤާމާއި، ރަށު ކައުންސިލްގެ ރައީސް ކަމުގެ މަޤާމަށް ބޭފުޅުން އިންތިޚާބު ކުރާނީ، އެ މަޤާމުތަކަށް ކުރިމަތިލި ކެންޑިޑޭޓުންނަށް ވޯޓުދީގެން ނެވެ. އަންހެނުންނަށް ކައުންސިލްތަކުގެ 33 އިން ސައްތަ ޚާއްޞަކޮށްފައިވާއިރު، ބޮޑެތި ބާރުތަކެއްވެސް ކައުންސިލްތަކަށް ދީފައިވެއެވެ. އަދި މާލީ ބާރުވެރިކަން ވެސް ކައުންސިލްތަކަށް ދީފައިވާއިރު، ކައުންސިލްތަކުގެ އުމުރު ވެސް ވަނީ ތިން އަހަރުން ފަސް އަހަރަށް އިތުރުކޮށްފަ އެވެ.
