ލޯކަލް ކައުންސިލްތަކުގެ އިންތިޚާބުގައި ވާދަ ކުރުމަށްޓަކައި ހުޅުވާލި ފުރުޞަތު ބުރާސްފަތި ދުވަހު (މިއަދު)ގެ ހަވީރު 4:00 އަށް ސުންގަޑި ހަމަވީއިރު 3،000 ވުރެ ގިނަ ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަނުގެ ރައީސް އަޙްމަދު ޝަރީފް އާއި، އެކޮމިޝަނުގެ ނައިބު ރައީސް އަޙްމަދު އަކްރަމް "ރާއްޖެޓީވީ"އަށް ބުރާސްފަތި ދުވަހު ދެއްވި ޚާއްޞަ އިންޓަވިއުއެއްގައި ވިދާޅުވީ، ލޯކަލް ކައުންސިލްތަކުގެ އިންތިޚާބުގައި ވާދަކުރުމަށް ކެންޑިޑޭޓުންގެ ފޯމު ހުށަހެޅުމުގެ ސުންގަޑިއަކީ، ބުރާސްފަތި ދުވަހުގެ 15:00 ކަމަށެވެ. ނަމަވެސް، ބައެއް ފަރާތްތަކުގެ އެދިލެއްވުމުގެ މަތިން އެއްގަޑިއިރު އިތުރުކޮށް، ހަވީރު 04:00 ޖަހަންދެން ފޯމު ބަލައިގަތް ކަމަށެވެ.
ވޭތުވެދިޔަ އިންތިޚާބުތަކާ ތަފާތުކޮށް ސިޔާސީ ޕާޓީތަކުން މިފަހަރު ވަރަށް ސިސްޓަމެޓިކްކޮށް ފޯމު ހުށަހެޅިކަން އަޅުގަނޑުމެންނަށް ފާހަގަކުރެވުނު. އެއީ އެންމެފަހު ވަގުތަށް މަޑުނުކޮށް، ހަމަ މަޑުމަޑުން ގެނެސްގެން ހުރިހާ ފޯމުތަކެއް ސިޔާސީ ޕާޓީތަކުން ދިޔައީ ފޯމް ހުށަހަޅަމުން،އިލެކްޝަންސް ކޮމިޝަނުގެ ރައީސް އަހުމަދު ޝަރީފް
ޝަރީފް ވިދާޅުވީ ލޯކަލް ކައުންސިލްތަކުގެ އިންތިޚާބަށް ކުރިމަތިލުމަށް ހުޅުވާލި ފުރުޞަތުގައި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބަށް ކުރިމަތިލުމުގެ ފުރުޞަތުވެސް ހުޅުވާލި ކަމަށެވެ. ނަމަވެސް އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގައި ވެސް ސިޔާސީ ޕާޓީތަކުން ވާދަ ކުރުމަށް ބޭނުންވާތީއާއި ޕްރައިމަރީ ބާއްވަން ޖެހޭތީ، އަންހެނުންގެ ތަރައްޤީއަށް މަސައްކަތްކުރާ ކޮމެޓީއަށް ކުރިމަތިލުމަށް ފޯމު ހުށަހެޅުމުގެ ސުންގަޑިއަކީ މިމަހުގެ 24 ވަނަ ދުވަސް ކަމަށްވެސް ޝަރީފް ވިދާޅުވި އެވެ.
ކައުންސިލްތަކުގެ އިންތިޚާބާއި އެކީގައި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބަށްވެސް ހުޅުވާލި، އެހެންނަމަވެސް ވަރަށްފަހުން އަޅުގަނޑުމެން އިލެކްޝަންސް ކޮމިޝަނުން ނިންމާފައިވާނީ ސިޔާސީ ޕާޓީތަކުންވެސް އެ އިންތިޚާބަށް މެންބަރުން ނެރެވިދާނެކަން. އެހެންވެގެން ޕާޓީތަކަށް ޕްރައިމަރީތައް ބޭއްވުމާއި އަދި އެހެން ކަންކަމަށް މަގުފަހި ކޮށްދިނުމުގެ ގޮތުން މިމަހުގެ 24 އާހަމައަށް ފުރުޞަތު ހުޅުވާލާފައިވަނީއިލެކްޝަންސް ކޮމިޝަނުގެ ރައީސް އަހުމަދު ޝަރީފް
ޝަރީފް ވިދާޅުވީ ލޯކަލް ކައުންސިލްތަކުގެ އިންތިޚާބުގެ 982 މަޤާމަށް 3000 އެއްހާ ފޯމު މިވަގުތާ ހަމައަށް އިލެކްޝަންސް ކޮމިޝަނަށް ހުށަހަޅާފައިވާ ކަމަށެވެ.
982 މަޤާމަށް 3000 ވަރަކަށް އެޕްލިކޭޝަން ފޯމު ހުށަހެޅިފައި އެބަހުރި. ޤާނޫނުގައި އެބަބުނޭ އިލެކްޝަންސް ކޮމިޝަނަށް ފޯމު ހުށަހަޅާތާ 24 ގަޑި އިރު ތެރޭގައި އިލެކްޝަންސް ކޮމިޝަނުން އެފޯމާ ދޭތެރޭގައި ގޮތެއް ނިންމަންޖެހޭނޭ، އެއީ ބަލައިގަންނަ އެޕްލިކޭޝަނެއްތޯ ނުވަތަ ޤާނޫނުގައި ބުނާ އެއްވެސް ކަމެއް ފުރިހަމަ ނުވަތީ ރިޖެކްޓް ކުރާ ފޯމެއްތޯ. އެހެންވީމާ ކޮންމެ ގޮތެއް ހަދާފައިވެސް 24 ގަޑިރުތެރޭގައި އަޅުގަނޑުމެން އެއަށް ޖަވާބު ދޭންޖެހޭ. ޖަވާބު ނުދެވިއްޖެ ކަމަށްވާނަމަ އޮޓަމެޓިކަލީ އެފޯމު ވާނީ ބަލައިގަންނަ ފޯމަކަށް. އެހެންވީމާ، ޝަރުޠު ފުރިހަމަނުވާ ފޯމެއްވެސް 24 ގަޑިއިރު ތެރޭގައި ޖަވާބު ނުދެވިއްޖެއްޔާ ވާނީ ބަލައިގަންނަ ފޯމަކަށް. ދެން ފޯމު ބާޠިލު ކުރަންޏާ ޖެހޭނީ ކޯޓަށް ހުށަހަޅަންއިލެކްޝަންސް ކޮމިޝަނުގެ ރައީސް އަހުމަދު ޝަރީފް
އިލެކްޝަންސް ކޮމިޝަނުގެ ނައިބު ރައީސް އަޙްމަދު އަކްރަމް ވިދާޅުވީ، ލޯކަލް ކައުންސިލްތަކުގެ އިންތިޚާބާ ގުޅޭ ކަންކަން އިލެކްޝަނާއި ބެހޭ ޤާނޫނާއި، އަދި އެ ކޮމިޝަނުން ކަންކަން ތަރުތީބު ކޮށްފައިވާ ގޮތަށް ކުރިއަށްދާ ކަމަށެވެ.
އަންނަ މަހުގެ 4 ވަނަ ދުވަހު ކެންޑިޑޭޓުންގެ މެދުގައި، ކެންޑިޑޭޓް ނަންބަރު ގުރު ނެގުން އޮންނާނެ. އެކަން ކުރިއަށްދާނީ ކޮންމެ ރަށެއްގައި. ކޮމިޝަނުގެ މެންބަރުން ވަޑައިގަންނަވާނެ ރާއްޖޭގެ ހުރިހާ ސިޓީތަކަކަށް. ކޮމިޝަނުން މަސައްކަތްކުރަން މީޑިއާތައް މެދުވެރިކޮށް، ރާއްޖޭގެ 4 ސިޓީގައި އެއްވަގުތެއްގައި މީޑިއާތަކުން ލައިވް ކުރެވޭނެ އިންތިޒާމު ހަމަޖެއްސޭތޯ.އިލެކްޝަންސް ކޮމިޝަނުގެ ނާއިބު ރައީސް އަހުމަދު އަކްރަމް
މީގެއިތުރުން އަކްރަމް ވިދާޅުވީ ލޯކަލް ކައުންސިލްތަކުގެ އިންތިޚާބަށް ކުރިމަތިލި ކެންޑިޑޭޓުންގެ ނަންތައް އަންނަ މަހުގެ ހަތަރު ވަނަ ދުވަހު އިޢުލާން ކުރާނެ ކަމަށެވެ. އަދި ހަތަރު ވަނަ ދުވަހު ކެންޑިޑޭޓުންގެ ގުރުއަތުލުންވެސް ކުރިއަށް ދާނެ ކަމަށްވެސް އަކްރަމް ވިދާޅުވި އެވެ.
ކެންޑިޑޭޓުންގެ ނަންތައް އިއުލާން ކުރާނަން އަންނަ މަހުގެ ހަތަރު ވަނަ ދުވަހު.... އަޅުގަނޑުމެން މިފަހަރު ކެންޑިޑޭޓުންގެ ނަންތައް ތަރުތީބު ކުރާއިރު، އެއްވޯޓު ކަރުދާހުގައި ތަފާތު ހަތަރު ވޯޓެއް އޮންނާތީ، ވަރަށް ގިނަ ކެންޑިޑޭޓުން ތިބޭނެ ކަމަށް އަޅުގަނޑުމެން ބަލަން. އެހެންވީމާ އަޅުގަނޑުމެން މިބަލަނީ ކެންޑިޑޭޓުންނަށް އަދި ވޯޓުލާން ވަޑައިގަންނަވާ ބޭފުޅުންނަށް ފަސޭހަވާނެ ގޮތަށް ނަމްބަރުތައް ރިޕީޓް ނުވާނެ ގޮތަށް ތަރުތީބު ކޮށްލަން. އެހެންވީމާ މިފަހަރު އިރާދަކުރެއްވިއްޔާ ހަތަރު ވޯޓެއް އެއް ކަރުދާހެއްގައި އޮތްކަމަކު އެއްވެސް ނަމްބަރެއް ރިޕީޓް (ތަކުރާރު)ވެގެން ނުދާނެ، އެހެންވީމާ ވަރަށް ފަސޭހަވާނެ ކެންޑިޑޭޓުންނަށް ތިމަންނަ މިއީ މިވެނި ނަމްބަރެކޭ ބުނެލަން. އެނަމްބަރުގެ އިތުރު މީހެއް އެވޯޓު ކަރުދާހުގައި ނޯންނާނެ،އިލެކްޝަންސް ކޮމިޝަނުގެ ނާއިބު ރައީސް އަހުމަދު އަކްރަމް
އަންނަ އޭޕްރީލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލްތަކުގެ އިންތިޚާބަކީ ލަމަރުކަޒީ ޤާނޫނަށް ބޮޑެތި ބަދަލުތަކެއް ގެނައުމަށްފަހު ބޭއްވޭ ވަރަށް ތަފާތު އިންތިޚާބެކެވެ. މީގެކުރިން ބޭއްވި ލޯކަލް ކައުންސިލްތަކުގެ އިންތިޚާބާ ތާފަތުކޮށް، މި އިންތިޚާބުގައި ސިޓީތަކުގެ މޭޔަރު ކަމުގެ މަޤާމާއި، އަތޮޅު ކައުންސިލްގެ ރައީސްގެ މަޤާމާއި، ރަށު ކައުންސިލްގެ ރައީސް ކަމުގެ މަޤާމަށް ބޭފުޅުން އިންތިޚާބު ކުރާނީ، އެ މަޤާމުތަކަށް ކުރިމަތިލި ކެންޑިޑޭޓުންނަށް ވޯޓުދީގެން ނެވެ. އަންހެނުންނަށް ކައުންސިލްތަކުގެ 33 އިން ސައްތަ ޚާއްޞަކޮށްފައިވާއިރު، ބޮޑެތި ބާރުތަކެއްވެސް ކައުންސިލްތަކަށް ދީފައިވެއެވެ. އަދި މާލީ ބާރުވެރިކަން ވެސް ކައުންސިލްތަކަށް ދީފައިވާއިރު، ކައުންސިލްތަކުގެ އުމުރު ވެސް ވަނީ ތިން އަހަރުން ފަސް އަހަރަށް އިތުރުކޮށްފަ އެވެ.
