ސަރުކާރުގެ ތައުލީމީ ސިޔާސަތަކީ ހުނަރުވެރި ޖީލެއް ބިނާކުރުން: ރައީސް ސޯލިހު
19 ފެބުރުއަރީ 2020 | ބުދަ 20:59ސްކޫލު މަރުހަލާގައި ދަރިވަރުންގެ ހުނަރާއި ފަންނުތައް ދެނެގަނެގަތުން މުހިންމު
ރައީސް ސޯލިހު ދ. ރިނބިދޫއަށް ވަޑައިގެން، އެ ރަށު ރައްޔިތުންނާއި ސަލާމްކުރައްވަނީ
ސަރުކާރުގެ ތައުލީމީ ސިޔާސަތުގެ މައިގަނޑު އަމާޒަކީ، ޒަމާނީ ތައުލީމް އުނގެނި، އީޖާދީ އުފެއްދުންތެރިކަމަށް ވިސްނުން ހިންގާ، ހުނަރުވެރި ޖީލެއް ބިނާކުރުންކުރުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލީހް ވިދާޅުވެއްޖެއެވެ.
ރައީސް ސޯލިހު މިހެން ވިދާޅުވީ ރިނބިދޫ ސްކޫލުގެ ރަންޔޫބީލް ފާހަގަކުރުމުގެ ގޮތުން ބުދަ ދުވަހުގެރޭ އެސްކޫލުގައި ބޭއްވި ޖަލްސާ ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ ސާނަވީ އާއި މަތީ ސާނަވީ ތައުލީމުން މަތީ ދަރަޖައިގައި ފާސްވާ ދަރިވަރުންނަށް، ވަރަށް ގިނަ ގައުމުތަކުގެ ޔުނިވަރސިޓީތަކުން ކިޔެވޭނެ ފުރުސަތު ސަރުކާރުން ހަމަޖައްސައިދިނީ ވެސް މި މުހިންމު މަގުސަދު ހާސިލްކުރުމުގެ ބޭނުމުގައި ކަމަށެވެ. މިޒަމާނުގެ ތައުލީމަކީ، މަސައްކަތުގެ ހުނަރާ އެކުގައި އުނގެނޭ ތައުލީމެއްކަން ފާހަގަކުރައްވައި ރައީސް ސޯލިހު ވިދާޅުވީ ސްކޫލު މަރުހަލާގެ އެންމެ މުހިންމުއެއް ކަމަކީ، ދަރިވަރުންގެ ކިބައިގައި ހުންނަ ހުނަރާއި ފަންނުތައް ދެނެގަނެ، އެހުނަރާއި ފަންނުތައް އިތުރަށް ތަރައްގީކުރެވޭނެ ގޮތަކަށް އަމާޒުކޮށްގެން ކިޔަވައިދިނުންކަމަށެވެ. އެހެންކަމުން މައިންބަފައިން ވެސް، ދަރިންނަށް ކިޔަވައިދިނުމުގައި މި ކަންކަމަށް ސަމާލުކަން ދެއްވުމުގެ މުހިންމުކަން އެމަނިކުފާނު ފާހަގަކުރެއްވިއެވެ.
މީގެ އިތުރުން ރައީސް ސޯލިހު ވިދާޅުވީ ގައުމު މިއަދު ބޭނުންވަނީ އީޖާދީ އުފެއްދުންތެރި ޒުވާނުންތަކެއް ކަމަށާއި، ރިނބުދޫ ސްކޫލުގެ ދަރިވަރުން ވެސް އަމާޒު ހިފަންވީ، ސްކޫލް މަރުޙަލާ ނިންމުމަށް ފަހު، ރާއްޖެއަށް އެންމެ ބޭނުންތެރި ދާއިރާތަކުން، މަތީ ތައުލީމް ހާސިލްކޮށް، ގައުމުގެ ތަރައްގީގައި އަމަލީ ގޮތުން ބައިވެރިވާނެ ޒުވާނަކަށް ވުމަށް ކަމަށެވެ. ރިނބުދޫ ސްކޫލުގެ 50 އަހަރުގެ ދިގު މާޒީގައި އެ ސްކޫލަކީވެސް ރައްޔިތުންގެ އަމިއްލަ މަސައްކަތުން އުފެދި ކުރިއަރައިދިޔަ ސްކޫލެއްކަން ފާހަގަކުރައްވައި ރައީސް ސޯލިހު ވަނީ ރަން ޔޫބީލްގެ މި މުނާސަބާގެ ތަހުނިޔާއާ ހެޔޮއެދުންތައް ސްކޫލްގެ އިސް ވެރިންނަށާއި ސްކޫލްގެ މުވައްޒަފުންނަށާއި ދަރިވަރުންނަށް، ބެލެނިވެރިންނަށް އަރިސްކުރައްވާފައެވެ. އަދި ރިނބުދުއަކީ ހުނަރުވެރި ބަޔަކު ދިރިއުޅޭ ރަށެއްކަމާއި އެގޮތުން އެރަށަކީ ޚާއްސަކޮށް ތިލޭރުކަމަށް ރާއްޖެއަށް މަޝްހޫރު ރަށެއްކަން ފާހަގަކުރައްވައި ޒުވާނުންނަށް ތިލޭރުކަން ދަސްކޮށްދީ އެ މަސައްކަތް ދިރުވައި އާލާކުރުމަށް، ކައުންސިލުން އިސްނަންގަވައިގެން މަސައްކަތްކުރައްވަމުން ގެންދަވާތީ އެކަމަށްޓަކައި ރިނބުދޫ ކައުންސިލަށް ރައީސް ސޯލިހު ޝުކުރު އަދާކުރެއްވިއެވެ.
ރިނބުދޫގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް އަލިއަޅުއްވާލައްވައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ އަތޮޅުތަކުގައި ސަރުކާރުން އެޅުމަށް ރާވާފައިވާ ހައުސިންގ ޔުނިޓުތައް އެޅުމުން މިމައްސަލައަށް ވެސް ހައްލެއް ލިބިގެންދާނެކަމަށެވެ. އަދި ރިނބުދުއަކީވެސް ރަށްގިރުމުގެ މައްސަލަ ވަރަށްބޮޑަށް ކުރިމަތިވެފައިވާ ރަށެއްކަން ފާހަގަކުރައްވައި ރައީސް ސޯލިހު ވިދާޅުވީ ރިނބިދުއަކީ ރަށް ގިރުމުގެ މައްސަލަ ހައްލުކުރުމުގައި އެންމެ ބޮޑަށް އިސްކަން ދޭންޖެހިފައިވާ ރަށްތަކުގެ ލިސްޓުގައި ހިމެނޭ ރަށެއްކަމަށެވެ.
ބޯފެނާއި ނަރުދަމާ ނިޒާމު ގާއިމުކުރުމުގެ މަޝްރޫއު މިއަހަރުގެ ބަޖެޓްގައި ހިމަނައިގެން، އެކަން ފެށުމަށް މިހާރު އެމަސައްކަތް ޓެންޑަރ ކުރެވިފައިވާކަމަށް ރައީސް ސޯލިހު ވިދާޅުވިއެވެ. އަދި ރިނބުދޫގެ ކަރަންޓުގެ ޚިދުމަތް ތަރައްގީކުރުމުގެ މަޝްރޫއުވެސް މިއަހަރު ކުރިޔަށްދާނެކަން އެމަނިކުފާނު ފާހަގަކުރެއްވިއެވެ
ރައީސް ސޯލިހު ވިދާޅުވީ ސަރުކާރުން ރައްޔުތުންނަށް ވެފައިވާ ވައުދުތަކާ އެއްގޮތަށް، ރާއްޖެ ތަރައްގީކުރުމުގެ މަސައްކަތް ސަރުކާރުން ކުރައްވަމުން ގެންދަވާނެކަމަށާއި އެކަންކަންވެސް ކުރިޔަށްގެންދަވާނީ ރައްޔިތުންގެ ޚިޔާލާއި މަޝްވަރާ ހޯއްދަވައިގެން، ރައްޔިތުންގެ ވިންދާ އެއްގޮތަށް ކަމަށެވެ.
ރިނބިދޫ ސްކޫލަށް ދިގު މުއްދަތެއްގައި މެދު ނުކެނޑި ޚިދުމަތް ކުރައްވާފައިވާ ފަރާތްތަކުގެ އަގުވަޒަންކުރުމުގެ ގޮތުން ދެއްވި ޚިދުމަތުގެ އެވޯޑް އެފަރާތްތަކާ ހަވާލުކޮށްދެއްވީ ރައީސް ސޯލިހެވެ. މިޖަލްސާގައި ރިނބިދޫ ސްކޫލުގެ ފަރާތުން ރައީސް ސޯލިހު ވަނީ ހަނދާނީ ފިލަޔެއް ހަދިޔާކުރައްވާފައެވެ.
