19 އަހަރުން ދަށުގެ ޓީމުގެ ކޯޗަކަށް ލެޓްވިއާގެ އީގޯ ހަމަޖައްސައިފި

ރާއްޖޭގެ 19 އަހަރުން ދަށުގެ ގައުމީ ފުޓްބޯޅަ ޓީމުގެ ކޯޗަކަށް އާސެނަލަށް ކުރިން ކުޅުނު ލެޓްވިއާގެ އީގޯ ސްޓެފަނޯސް ހަމަޖައްސައިފި އެވެ.

ޒުވާން ގައުމީ ޓީމާ ހަވާލުވި ލެޓްވިއާގެ އީގޯ އަކީ އާސެނަލުން 2003 ވަނަ އަހަރު މެޗަކުން ބަލިނުވެ އިނގިރޭސި ޕްރިމިއާ ލީގުގެ ޗެމްޕިއަންކަން ހޯދި ޓީމުގެ މެމްބަރެކެވެ.

19 އަހަރުން ދަށުގެ ގައުމީ ޓީމުގެ ކޯޗަކަށް އީގޯ ހަމަޖެއްސީ ބުދަ ދުވަހު އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމެއްގައެވެ.

ޒުވާން ގައުމީ ޓީމާ ހަވާލުވުމަށްފަހު އީގޯ ބުނީ ރާއްޖޭގެ ޒުވާން ޓީމާ ހަވާލުވީ ފައިސާގެ ސަބަބުން ނޫން ކަމަށެވެ. އަދި މި ޓީމުގައި ކުރަން އޮތް މަސައްކަތަކީ އޭނާ ޝައުގުވެރިވާށ މަސައްކަތެއް ކަމަށާއި، މިއީ ދުރުރާސްތާއަކަށް ބަހާލައިގެން ކުރިއަށް ގެންދެވޭނެ މަޝްރޫއެއް ކަމަށްވެސް ވަނީ ބުނެފައެވެ.

މި ބައްދަލުވުމުގައި އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ ޒުވާން ޓީމަށް ބިދޭސީ ކޯޗެއް ގެނައުމުގެ އެއް ބޭނުމަކީ ޔޫރަޕްގެ ތަޖުރިބާކާރު ކޯޗެއްގެ ފަރާތުން ރާއްޖޭގެ ކުޅުންތެރިންނަށް ތަމްރީންތަކުގައި އައު ރަހައެއް ގެނެސްދިނުމާއި ރާއްޖޭގެ ލޯކަލް ކޯޗުންނަށް ވެސް ރަނގަޅު ފުރުސަތުތަކެއް ހޯދައިދިނުން ކަމަށެވެ. އަދި މި އަހަރު ނިމުމުގެ ކުރިން 16 އަހަރުން ދަށުގެ ޓީމަށް ވެސް ބޭރުގެ ކޯޗެއް ގެނައުމަކީ ވަރަށް ބޮޑު އަމާޒެއް ކަމަށް ވަނީ ވިދާޅުވެފައެވެ.

19 އަހަރުން ދަށުގެ ގައުމީ ޓީމުގެ ކޯޗަކަށް އީގޯ ހަމަޖެއްސިއިރު، މިއީ ޒުވާން ޓީމާ ބިދޭސީ ކޯޗަކު ހަވާލުވި ފުރަތަމަ ފަހަރެވެ. 19 އަހަރުން ދަށުގެ ގައުމީ ޓީމުގެ ކޯޗުގެ މަގާމުގައި އެންމެ ފަހުން ހުރީ އަހުމަދު ނާޝިދު (ނާދު) އެވެ. ނާދުގެ އިރުޝާދުގެ ދަށުން ޒުވާން ޓީމު ވަނީ މުޅިން އަލަށް ދެވަނަ ޑިވިޝަން ފުޓްބޯޅަ މުބާރާތުގައި ވާދަކޮށްފައެވެ. ނާދުގެ ކުރިން މި ޓީމަށް އިރުޝާދުދިނީ ކޯޗު މުހައްމަދު ޝާޒްލީ (ޝާޒް) އެވެ. އަދި ޝާޒްގެ އިރުޝާދުގެ ދަށުން ޒުވާން ޓީމު ވަނީ މިދިޔަ އަހަރު ސާފް ޗެމްޕިއަންޝިޕްގެ ލޯ މެޑަލް ހޯދާފައެވެ.