ބޮރޫޝިއާ ޑޯޓްމުންޑުން ޖަރުމަން މިޑްފީލްޑަރު އެމްރޭ ޗޭންގެ އެއްބަސްވުން ދާއިމީ ކޮށްފިއެވެ.

މިދިޔަ ޖެނުއަރީ މަހުގެ ފަހުކޮޅު ޗޭން ޑޯޓްމުންޑަށް ބަދަލުވީ ޔުވެންޓަސްއިން ލޯނު އެއްބަސްވުމެއްގެ ދަށުންނެވެ. އެ އެއްބަސްވުން ދާއިމީ ކުރުމަށް ޑޯޓްމުންޑުން ވަނީ ޔުވެންޓަސްއަށް 25 މިލިއަން ޔޫރޯ ދައްކާފައެވެ.

ޑޯޓްމުންޑަށް ބަދަލުވުމަށްފަހު އެޓީމާއެކު ޗޭން މިހާތަނަށް ތިން މެޗު ކުޅެފައިވާއިރު، އޭނާ ކުޅުނު ފުރަތަމަ މެޗުގައި ވެސް ވަނީ ލަނޑު ޖަހާފައެވެ.

ޑޯޓްމުންޑުގެ ސްޕޯޓްސް ޑިރެކްޓަރު މައިކަލް ޒޯޗް މީގެ ކުރިން ވިދާޅުވީ ޗޭންއަކީ އެޓީމަށް ވަރަށް މުހިންމު ކުޅުންތެރިއެއް ކަމަށެވެ. އެގޮތުން އެޓީމުގެ މެދުތެރެއާއި ފަހަތުގައިވެސް ޗޭންގެ ބޭނުން ހިފޭނެ ކަމަށްވެސް ވިދާޅުވި އެވެ.

ބަޔާން މިއުނިކާއި ބަޔާ ލެވަކޫސަންއަށްވެސް މީގެ ކުރިން ކުޅުނު ޗޭން އެންމެ ފުރަތަމަ ވިދާލީ ލިވަޕޫލުންނެވެ. 2014 ވަނަ އަހަރު ލިވަޕޫލަށް ބަދަލުވެ އެޓީމުގައި މޮޅު ކުޅުމެއް ދެއްކިއިރު، އޭނާ ޔުވެންޓަސްއަށް ބަދަލުވެފައިވަނީ އެއްބަސްވުން ހަމަވުމުން 2018 ވަނަ އަހަރު އެވެ.

ޔުވެންޓަސް އަށް ބަދަލުވެ 45 މެޗު ކުޅެދިން ނަމަވެސް، އޭގެ ފަހުން ޔުވެންޓަސްގެ ފުރަތަމަ އެގާރައިން އޭނާއަށް ފުރުސަތު ގެއްލުނެވެ. އެގޮތުން މި ސީޒަނުގެ ޗެމްޕިއަންސް ލީގުގެ ގްރޫޕް ސްޓޭޖަށް ޔުވެންޓަސް އިން އެކުވާލި ސްކޮޑުން ޖާގަ ނުލިބުމުން ކްލަބު ދޫކޮށްލަން ބޭނުންވާކަން ޗޭން ހާމަކުރި އެވެ.

ޖަރުމަންގެ ގައުމީ ޓީމަށްވެސް މިހާތަނަށް 25 މެޗު ކުޅެދީފައިވާ ޗޭން ވަނީ ޔުވެންޓަސްއާއެކު މިދިޔަ ސީޒަނުގެ އިޓާލިއަން ލީގު ކާމިޔާބުކޮށްފައެވެ.