އެންމެ ކުޑަ އުޖޫރަ ކަނޑައެޅުމާއި ގުޅޭގޮތުން އިކޮނޮމިކް މިނިސްޓްރީން އެކުލަވާލި ރިޕޯޓް މަޖިލީހަށް ފޮނުވައިފި

އެންމެ ކުޑަ އުޖޫރަ ކަނޑައެޅުމާއި ގުޅޭގޮތުން އިކޮނޮމިކް މިނިސްޓްރީން އެކުލަވާލި ރިޕޯޓް ރައްޔިތުންގެ މަޖިލީހަށް ފޮނުވައިފި އެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވީ މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒު އިސްމާޢީލް މިނިމަމް ވޭޖް ކަނޑައެޅުމަށްޓަކައި ސެލަރީޒް އެންޑް ވޭޖް އެޑްވައިޒަރީ ބޯޑުން ހުށަހަޅާފައިވާ ރިޕޯޓާއި އިންޓަނޭޝަނަލް ލޭބަރ އޯގަނައިޒޭޝަނުން އެމިނިސްޓްރީއަށް ހުށަހަޅާފައިވާ ރިޕޯޓް އަދި ސްޓޭކް ހޯލްޑަރުންނާއެކު އެމިނިސްޓްރީން ބޭއްވި ބައްދަލުވުންތަކުގެ ރިޕޯޓެއްގެ މައްޗަށް ބެލުމަށްފަހު އެންމެ ކުޑަ އުޖޫރަ ކަނޑައެޅުމާއި ގުޅޭގޮތުން އެމިނިސްޓްރީއަށް ފާހަގަކުރެވުނު ކަންތައްތައް ހިމެނޭ ކަރުދާހެއް މަޖިލީހަށް ފޮނުވާފައިވާ ކަމަށެވެ.

މިނިސްޓަރ މިރިޕޯޓް ފޮނުއްވާފައިވަނީ އެންމެ ކުޑަ އުޖޫރަ ކަނޑައެޅުމުގެ ކަންތަކުގައި ރައްޔިތުންގެ މަޖިލީހުން ދެކެވަޑައިގަންނަވާ ގޮތެއް ސާފުކުރެއްވުމަށް ބޭނުންފުޅުވާތީ ކަމަށް ރައީސް ނަޝީދު ވިދާޅުވި އެވެ. އަދި މިރިޕޯޓް ދިރާސާކުރުމަށް އިޤްތިޞާދީ ކޮމިޓީއަށް ފޮނުއްވާކަމަށް ރައީސް ނަޝީދު ވިދާޅުވި އެވެ.

މި ހިނގާ ފެބްރުއަރީ މަސް ނިމުމުގެ ކުރިން އެންމެ ކުޑަ އުޖޫރަ ކަނޑައަޅާނެ ކަމަށް މިނިސްޓަރ އޮފް އިކޮނޮމިކް ޑިވެލޮޕްމެންޓް ފައްޔާޒް އިސްމާއިލް ވަނީ މިމަހުގެތެރޭގައި ވިދާޅުވެފަ އެވެ.

މިނިސްޓަރ ކުރެއްވި ޓްވީޓެއްގައި ވަނީ މި މަސް ނިމުމުގެ ކުރިން ރާއްޖޭގައި ފުރަތަމަ ފަހަރަށް އެންމެ ކުޑަ އެޖޫރައެއް ކަނޑައެޅިގެންދާނެ ކަމަށެވެ. މިނިސްޓަރ ވިދާޅުވީ ވަޒީފާއާއި ބެހޭ ޤާނޫނަށް އިޞްލާޙު ގެނައުމާއި އެންމެ ކުޑަ އުޖޫރަ ކަނޑައެޅުމާއި ގުޅުމެއް ނެތް ކަމަށެވެ.

އެންމެ ކުޑަ އުޖޫރަ ކަނޑައެޅުމާއި ގުޅޭގޮތުން މިހާރު މަޖިލީހަށް ހުށަހަޅާފައިވާ އިޞްލާޙުތަކުގައި ބުނެފައިވަނީ އިޞްލާޙުތަކުގައި ބުނާ ގޮތުން ޤާނޫނު ތަޞްދީޤުވާތާ 30 ދުވަސް ތެރޭގައި މިނިމަމް ވޭޖު އެޑްވައިޒަރީ ބޯޑެއް އުފައްދަން ޖެހެއެވެ. އަދި އެ ބޯޑުން ހަތް ދާއިރާއަކަށް ވަކިވަކިން ރިޢާޔަތްކޮށް، މިނިމަމް ވޭޖު ކަނޑައެޅުމަށް މިނިސްޓަރަށް ލަފާ ދޭންޖެހެއެވެ.

އެ ދާއިރާތަކަކީ މަސްވެރިކަމާއި ދަނޑުވެރިކަމުގެ ދާއިރާ، ފަތުރުވެރިކަމުގެ ދާއިރާ، ކޮންސްޓްރަކްޝަން ދާއިރާ، ދަތުރުފަތުރުގެ ދާއިރާ، ޞިއްޙީ ޚިމަތުގެ ދާއިރާ، ތަޢުލީމީ ޚިދުމަތުގެ ދާއިރާ އަދި ކުދި އަދި މެދުފަންތީގެ ވިޔަފާރިތަކުގެ ދާއިރާއެވެ.

ބިލުގައި ބުނެފައިވަނީ ކޮންމެ ދެ އަހަރަކުން އެންމެ ކުޑަމިނުން ދެވޭ އުޖޫރަ މުރާޖަޢާ ކުރަން ޖެހޭނެ ކަމަށެވެ. އަދި ބަދަލެއް ގެންނަން މިނިމަމް ވޭޖް އެޑްވައިޒަރީ ބޯޑަށް ފެންނަ ނަމަ ބޯޑުން މިނިސްޓަރަށް ލަފާ އަރުވަން ޖެހޭނެ ކަމަށްވެސް ބިލުގައި ވަނީ ބުނެފަ އެވެ.

އެންމެ ކުޑަ އުޖޫރައެއް ކަނޑައެޅުމަކީ މިސަރުކާރުގެ ރިޔާސީ ވަޢުދަކަށްވާއިރު މިދިޔަ އަހަރުގެ ތެރޭގައި އެންމެ ކުޑަ އުޖޫރަ ކަނޑައެޅުމުގެ ކަންކަން ކުރުމުގެ މަސައްކަތް ރައްޔިތުންގެ މަޖިލީހުން ވަނީ ކޮށްފަ އެވެ.