މުހިންމު މައްސަލަތައް ބެލުން ލަސްކުރަމުންދާކަމަށް ވިދާޅުވެ އާޒިމްގެ ފާޑުކިޔުން އޭސީސީއަށް
މަޖިލީހުގެ ތަޅުމުގައި މެންބަރަކު ދައްކަވާ ވާހަކަތައް ތަޙުޤީޤުކުރަން އެ ތަނަށް ދާން އަންގަމުންދާކަމަށް އާޒިމް ވިދާޅުވި
އެމްޑީޕީގެ ޕީޖީ ގްރޫޕް ލީޑަރ އަލީ އާޒިމް- އޭސީސީއަށް ފާޑުވިދާޅުވެ ވަނީ ވާހަކަދައްކަވާފައި
އެންޓި ކޮރަޕްޝަން ކޮމިޝަން (އޭސީސީ)ން ކޮންމެހެން ބަލަންޖެހޭ މައްސަލަތައް ބެލުން ލަސްކުރަމުންދާކަމަށް ވިދާޅުވެ އެމްޑީޕީގެ ޕާލަމަންޓްރީ ގްރޫޕްގެ ލީޑަރ އަދި މެދުހެންވޭރު ދާއިރާގެ މެމްބަރ އަލީ އާޒިމް އޭސީސީއަށް ފާޑުވިދާޅުވެ ވާހަކަ ދައްކަވައިފި އެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވާހަކަދައްކަވަމުން އަލީ އާޒިމް ވިދާޅުވީ އޭސީސީގައި ނިމިދިޔަ ސަރުކާރުން ވައްކަންކޮށްފައިވާ އެތައް ބައެއްގެ މައްސަލަތައް އެބައޮތް ކަމަށެވެ. ކުރީ ސަރުކާރުގެ މިނިސްޓަރުންނާ ހިސާބުން ފެށިގެން ވައްކަންކޮށްފައި ތިބި އެތައް ބައެއްގެ ރިޕޯޓުތަކެއް، އޭސީސީގައި އެބައޮތް ކަމަށެވެ. އެހެންނަމަވެސް މަޖިލީހުގެ ތަޅުމުގައި މެންބަރަކު ދައްކަވާ ވާހަކަތައް ތަޙުޤީޤުކުރަން އެ ތަނަށް ދާން އަންގަމުންދާކަމަށް އާޒިމް ވިދާޅުވި އެވެ. އާޒިމް ވިދާޅުވީ މިއަށްވުރެ މުހިންމީ މި ރާއްޖެއަށް ވަންނަ ފައިސާ ވަގަށްނެގި މި ދިޔަ ސަރުކާރުގައި ތިބި މީހުންގެ މައްސަލަތައް ބެލުންކަމަށެވެ.
އޭސީސީ އަށް އާޒިމް ފާޑުވިދާޅުވެ ވާހަކަދައްކަވާފައި މިވަނީ ފޭދޫ ދާއިރާގެ މެމްބަރު މުހައްމަދު ނިހާދު މަޖިލީހުގައި ދެއްކެވި ވާހަކައަކާ ގުޅިގެން ތަހުގީގަށް ހާޒިރުވާން އޭސީސީން އަންގާފައި ވަނިކޮށެވެ.
ނިހާދު އެ ކޮމިޝަނަށް ހާޒިރު ކުރަނީ ކުރީގެ ރައީސް އަބްދުﷲ ޔާމީނަށް ހުކުމް ނުކުރަން، އެ މައްސަލަ ފުރަތަމަ ބެއްލެވި ކްރިމިނަލް ކޯޓުގެ އޭރުގެ އިސް ގާޒީ އަހުމަދު ހައިލަމް ރިޝްވަތު ނަންގަވާފައިވާ ކަމަށް ތުހުމަތު ކުރައްވައި، ނިހާދު މަޖިލީހުގެ ތަޅުމުގައި ދެއްކެވި ވާހަކައަކާ ގުޅިގެން ކަމަށް މައުލޫމާތު ލިބެއެވެ.
ނިހާދު އޭސީސީ އަށް ހާޒިރުކުރަން ނިންމުމުން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ބައްދަލުވުން ސިއްރުކޮށްގެން އެ މައްސަލަ ބެލި އެވެ.
އާޒިމް އިތުރަށް ވިދާޅުވީ ރާއްޖެއަށް ފައިސާ ލިބޭ އެކިއެކި ގޮތް ގޮތް ހޯދަންޖެހޭ ކަމަށާއި ރާއްޖޭގެ ރައްޔިތުން ބޭނުންވާ އެތައް ކަންތައްތަކެއް އެބަހުރި ކަމަށެވެ. އެހެންނަމަވެސް، މި ކަންކަން ކުރެވެން އޮތީ މީގެކުރިން ހިނގާފައިވާ ކަންކަން ބަލައިގެން ކަމަށް އާޒިމް ވިދާޅުވި އެވެ.
އާޒިމް ވިދާޅުވީ މި ކަމާ ދޭތެރޭގައި ފުންކޮށް ވިސްނައި، އަދިވެސް މީހުން އަތުން، ރައްޔިތުންގެ އަތުން ފައިސާ ނެގުމުގެ ބަދަލުގައި މި ކަންކަން ހުއްޓުވޭނެ ގޮތްތަކާއި މީގެ ކުރިން ފައިސާ ނަގާފައިވާ މީހުންނަށް އަދަބުދެވޭނެ ގޮތްތައް ނުހަދައި މި ކަންކަން ރަނގަޅުކުރެވެން ނެތްކަމަށެވެ.
