ލީކްވެގެން އުޅޭ އޯޑިއޯގައި ޖިނާއީ ކުށެއްގެ އަމަލެއް ހިމެނޭތީ ފުލުހުން އެ މައްސަލަ ބަލަނީ
17 ފެބުރުއަރީ 2020 | ހޯމަ 17:24އޯޑިއޯ ލީކް ކޮށްލާފައިވަނީ ހޮނިހިރު ދުވަހުގެރޭ
ޓޫރިޒަމް މިނިސްޓަރ އަލީ ވަޙީދު
ޓުއަރިޒަމް މިނިސްޓަރ އަލީ ވަހީދާ ގުޅިގެން ލީކުކޮށްލާފައިވާ އޯޑިއޯތަކުގައި ޖިނާއީ ކުށެއްގެ އަމަލެއް ހިމެނޭތީ އެކަން މޯލްޑިވްސް ޕޮލިސް ސަރވިސް އިން ބަލަން ފަށައިފިއެވެ.
ޓުރިޒަމް މިނިސްޓަރ އަލީ ވަހީދާއި ޔޫތު މިނިސްޓްރީގެ ސްޓޭޓް މިނިސްޓަރ އައްސަދު އަލީ (އަޑުބަރޭ) އާއި ދެމެދު ބުރާސްފަތި ދުވަހު ދެކެވުނު ވާހަކައެއް ކަމަށްބުނެ ސޯޝަލް މީޑިއާގައި ދައުރުވަމުންދާ އޯޑިއޯތަކާއި ގުޅޭގޮތުން ފުލުހުން ބުނީ، ލީކުވެގެން އުޅޭ އޯޑިއޯތަކާއި ގުޅޭގޮތުން ފުލުހުންނަށް މައްސަލައެއް ހުށައެޅިފައިނުވާ ކަމަށެވެ.
ނަމަވެސް އެ އޯޑިއޯތަކުގެ ތެރޭގައި ޖިނާއީ ކުށެއްގެ އަމަލެއް ހިމެނޭފަދަ އޯޑިއޯއެއް ފާހަގަކުރެވިފައިވާ ކަމަށާއި، ކަމާބެހޭ ފަރާތްތަކާއި ގުޅިގެން އެ އޯޑިއޯއާ ގުޅޭ ކަންކަން އިތުރަށް ބަލަމުންދާ ކަމަށް ފުލުހުން ބުނެފައިވެއެވެ.
ފުލުހުން އެހެން ބުނެފައިވާއިރު، މިނިސްޓަރ އަލީ ވަހީދުކަމަށް ތުހުމަތުކުރެވޭ ފަރާތަކުން އެޑިއުކޭޝަން މިނިސްޓަރ އައިޝަތު އަލީ އާއި، ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރ އައިޝަތު ނަހުލާ އާއި ގުޅޭގޮތުން ވާހަކަދައްކާފައިވާއިރު، ޖިންސީ ފުރައްސާރަ ކުރާ ބީދައިން އެ އޯޑިއޯގައި ވަނީ ވާހަކަ ދައްކާފައެވެ.
ނަމަވެސް ފުލުހުން ބަލަމުންދަނީ ޖިނާއީ ކޮން މައްސަލައެއްކަން މިވަގުތު ހާމަކުރެވެން ނެތްކަމަށް ފުލުހުންގެ މީޑިއާއިން ބުނެފައިވެއެވެ.
އެ އޯޑިއޯތަކާއި ގުޅިގެން ޓޫރިޒަމް މިނިސްޓަރ އަލީ ވަޙީދު ވިދާޅުވީ، އެ އޯޑިއޯތަކަކީ އެކި އަޑު އެކިގޮތަށް ގެނެސް ރޭވިގެން ހިންގާ ވަރަށް ދަށު ދަރަޖައިގެ ހުތުރު ޖަރީމާ އެއްކަމަށެވެ.
