މުއައްސަސާތަކާއި ޖަމިއްޔާތައް ގުޅިގެން ހޭލުންތެރިކަމުގެ ޕްރޮގްރާމެއް ފަށަނީ
17 ފެބުރުއަރީ 2020 | ހޯމަ 08:33ޕްރޮގްރާމް ކުރިއަށްގެންދަނީ 4 ބަޔަކަށް ބަހާލައިގެން
މުއައްސަސާތައް ގުޅިގެން ބޭއްވި ނޫސްވެރިންގެ ބައްދަލުވުން
ދައުލަތުގެ މުއައްސަސާތަކާއި ޖަމިއްޔާ ޖަމާއަތްތައް ގުޅިގެން ގައުމީ ހޭލުންތެރިކަމުގެ ޕްރޮގްރާމެއް ހިންގަން ނިންމައިފިއެވެ.
މި ޕްރޮގްރާމެއް ގުޅޭގޮތުން ނޫސްވެރިންނަށް މައުލޫމާތުދިނުމަށް ބޭއްވި ބައްދަލުވުމުގައި އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ އިލެކްޝަންސް ކޮމިޝަނުން އިސްނަގައިގެން ފަށާ މި ޕްރޮގްރާމުގައި ދައުލަތުގެ ހުރިހާ މުއައްސަސާތައް ބައިވެރިވާނެ ކަމަށެވެ. އޭނާ ވިދާޅުވީ މި ހަރަކާތް ހިންގަނީ 4 ބަޔަކަށް ބަހާލައިގެން ކަމަށާއި، އެގޮތުން ފުރަތަމަ ފިޔަވަހި ކުރިއަށްދާނީ ޖެނުއަރީން މާޗްއަށް ކަމަށެވެ. އަދި ދެވަނަ ބައި ކުރިއަށްދާނީ އެޕްރީލް އިން ޖޫން އަށް އަދި 3 ވަނަ ބައި ޖުލައި އިން ސެޕްޓެމްބަރަށް އަދި 4 ވަނަ ބައި ކުރިއަށްދާނީ އޮކްޓޯބަރުން ޑިސެމްބަރަށް ކަމަށެވެ.
ޝަރީފް ވިދާޅުވީ ފުރަތަމަ ބައިގައި ހިންގާ ޕްރޮގުރާމު ޚާއްސަ ކުރެވިފައިވަނީ އިންތިހާބުތަކާއި ގުޅޭގޮތުން ރައްޔިތުން ހޭލުންތެރިކުރުމަށް ކަމަށެވެ. އަދި ކުރިއަށް އޮތީ ލޯކަލް ކައުންސިލް އިންތިހާބުގެ ދުވަސްވަރަށްވުމުން މި ޕްރޮގުރާމުގެ ފުރަތަމަބައިގައި އިންތިހާބުތަކާއި ގުޅިގެން ރައްޔިތުންނަށް ބޭނުންވާ މައުލޫމާތު ހިއްސާ ކުރުމުން އިންތިހާބުގެ ކަންކަން ކުރިއަށް ގެންދިއުމަށް ވެސް ބޮޑެތި ފަސޭހަތަކެއް ވެގެންދާނެކަމަށެވެ.
ޝަރީފް ވިދާޅުވީ މުއައްސަސާތަކާއި، ޖަމިއްޔާ ޖަމާއަތްތަކުގެ ބައިވެރިވުމާއިއެކު، 12 ދާއިރާއަކުން މައުލޫމާތު ދިނުމަށް ރާވާފައިވާ ކަމަށެވެ. އަދި މިއީ ޑިމޮކްރަސީއަށް ރައްޔިތުން ހޭލުންތެރި ކުރުމާއި، ގައުމުގެ ސަލާމަތާއި ރައްޔިތުންގެ ރައްކާތެރިކަމާއި ގުޅުންހުރި މައުލޫމާތުތަކާއި، އަންހެނުންނާއި، ކުޑަކުދިންގެ ރައްކާތެރިކަމާއި ގުޅޭ މައުލޫމާތުތައް ދިނުންފަދަ މުހިންމު ބައިތަކެއް ހިމެނިގެންދާނެކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ މިއީ ސިލްސިލާ ގޮތެއްގައި ހުރިހާ އެންމެން ގުޅިގެން ހިންގާ ގައުމީ ބޮޑު ޕްރޮގުރާމެއް ކަމަށާއި، މިޕްރޮގުރާމުގެ ސަބަބުން ރައްޔިތުން ބޭނުންވާ މުހިންމު ގިނަ މައުލޫމާތުތަކެއް ދެވިގެންދާނެ ކަމަށެވެ. ޝަރީފް ވިދާޅުވީ ޕްރޮގްރާމްތައް ހިންގުމަށް މުއައްސަސާތަކަށް ލިބިފައިވަނީ ކުޑަ ބަޖެއްޓެއް ކަމަށާއި، ނަމަވެސް މި ޕްރޮގްރާމްގެ ސަބަބުން އެކަމަށް ލުޔެއް ލިބި މުއައްސަސާތަކުގެ އެހީތެރިކަމާއެކު ޕްރޮގްރާމްތައް ހިންގުމަށް ފަސޭހަވެގެންދާނެ ކަމަށެވެ.
ގައުމީ ހޭލުންތެރިކަމުގެ ޕްރޮގްރާމް ރަސްމީކޮށް ފެށުމަށް ހަމަޖެހިފައިވަނީ މި މަހުގެ 20 ވަނަ ދުވަހުއެވެ. މި ޕްރޮގްރާމް ކުރިއަށްދާނީ 12 މަހަށެވެ. އަދި މި 12 މަހުގައި ކުރާނެ ކަންކަން މިހާރު ރާވާފައިވާ ކަމަށް އިލެކްޝަންސް ކޮމިޝަނުން ބުނެއެވެ.
