ބިޒްނަސް ކްލާސް ފަސިންޖަރުން އަތުން 60 ޑޮލަރުގެ ޑިޕާޗަރ ފީ ނަގާ ބިލު ހުށަހަޅައިފި
ސަރވިސް ޗާރޖު ނަގަމުންދާނީ މިއަހަރުގެ މާޗުމަހުގެ 31ގެ ނިޔަލަށް
އެއަރޕޯޓު
ބިޒްނަސް ކްލާހުގައި ރާއްޖެއިން ބޭރަށް ދަތުރުކުރާ ފަސިންޖަރުން އަތުން ޑިޕަރޗަރ ފީގެ ގޮތުގައި 60 ޑޮލަރު ނަގާގޮތަށް އޮތް "ރާއްޖެއިން ބޭރަށް ފުރާ ފަސިންޖަރުންގެ އަތުން އެއަރޕޯޓް ސަރވިސް ޗާޖް ނެގުމާބެހޭ ޤާނޫނަށް" އިސްލާހު ގެނައުމުގެ ބިލު ރައްޔިތުންގެ މަޖިލީހަށް ހުށަހަޅައިފިއެވެ.
ބިލަށް ހުށަހެޅިފައިވާ އިސްލާހުތަކަށް ބަލާލާއިރު ދިވެހިރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުގެ ގެއަތުން، ޑިޕާރޗަރ ޓެކްސްގެ ނަމުގައި ޓެކުހެއް ނެގުމަށް ވެއެވެ.
އެގޮތުން އިކޮނޮމީ ކްލާހުގައި ރާއްޖެއިން ބޭރަށް ފުރާ ދިވެހި ފަސިންޖަރުންގެ އަތުން 12 އެމެރިކާ ޑޮލަރު ޓެކުހުގެ ގޮތުގައި ނަގާނެއެވެ. އަދި މި ކްލާހުގައި ރާއްޖެއިން ބޭރަށް ދަތުރުކުރާ ބިދޭސީ ފަތުރުވެރިންގެ އަތުން 30 ޑޮލަރު ޓެކުހުގެ ގޮތުގައި ނަގާނެއެވެ.
ބިޒްނަސް ކްލާހުގައި ރާއްޖެއިން ބޭރަށް ދަތުރުކުރާ ދިވެހި ފަސިންޖަރުންގެ އަތުންނާއި ބިދޭސީ ފަތުރުވެރިންގެ އަތުން ނެގުމަށް ހަމަޖެހިފައިވަނީ 60 އެމެރިކާ ޑޮލަރެވެ. އަދި ފަސްޓް ކްލާހުގައި ރާއްޖެއިން ބޭރަށް ދަތުރުކުރާ ފަސިންޖަރުންގެ އަތުން 90 އެމެރިކާ ޑޮލަރު ނެގުމަށް ހަމަޖެހިފައިވާއިރު ޕްރައިވެޓް ޖެޓުގައި ރާއްޖެއިން ބޭރަށް ދަތުރުކުރާ ފަސިންޖަރުންގެ އަތުން 120 އެމެރިކާ ޑޮލަރު ޓެކުހުގެ ގޮތުގައި ނެގުމަށް ވަނީ ހަމަޖެހިފައެވެ.
ބިލާއި ގުޅިގެން ވާހަކަ ދައްކަވަމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ މިހާރު ނަގަމުންދާ ސަރވިސް ޗާޖު އުވާލާ، އޭގެ ބަދަލުގައި ނަގަން ފަށާނީ ޑިޕަރޗަރ ޗާޖު ކަމަށެވެ. އެގޮތުން ސަރވިސް ޗާރޖު ނަގަމުންދާނީ މިއަހަރުގެ މާޗުމަހުގެ 31ގެ ނިޔަލަށެވެ. އަދި ޑިޕަރޗަރ ޓެކްސް އޭޕްރިލް 1 ން ފެށިގެން ނަގަން ފަށާނެ ކަމަށެވެ.
