ރާއްޖެ އައި ބަންގްލަދޭޝް މީހެއްގެ އަތުން ދެ ލައްކަ ރުފިޔާގެ މަސްތުވާތަކެތި އަތުލައިގަނެފި
އެތަކެތީގެ މަގުމަތީ އަގު 193,200.00 ރުފިޔާއަށް އަރާ
އެމީހާ އަތުން ފެނުނު މަސްތުވާތަކެތި
ވައިގެ މަގުން ބަންގްލަދޭޝްއިން ރާއްޖެއައި އެ ޤައުމުގެ ރައްޔިތެއްގެ އަތުން މަސްތުވާތަކެތި އަތުލައިގަނެފައިވާ ކަމަށް ކަސްޓަމްސްއިން ބުނެފިއެވެ.
މިކަމާއި ގުޅިގެން ކަސްޓަމްސް އިން ނެރުނު ބަޔާނެއްގައި ވަނީ މަސްތުވާތަކެތި ފެނިފައިވަނީ އާދީއްތަ ދުވަހުގެ ރޭ ރާއްޖެ އައި އުމުރުން 26 އަހަރުގެ ފިރިހެނެއްގެ ލަގެޖް ބަލައި ފާސްކުރިއިރު ކަމަށެވެ.
އެގޮތުން އެމީހާގެ ލަގެޖު ތެރެއިން މަސްތުވާތަކެއްޗަށް ޝައްކުކުރެވޭ ގުޅަތަކެއް ފެނިގެން އެތަކެތި ފުރަތަމަ މަރުހަލާގައި ޓެސްޓްކުރި އިރު، މަސްތުވާތަކެތީގެ ބާވަތެއް ކަމަށްވާ އެމްފެޓަމިން/ޔާބާ އަށް ފޮޒިޓިވްވެފައިވާ ކަމަށެވެ. އަދި އޭނާގެ ލަގެޖުގެ ތެރެއިން ޖުމްލަ 1932 އެމްފެޓަމިން ގުޅަ ފެނިފައިވާ ކަމަށް ކަސްޓަމްސް އިން ބުނެއެވެ.
ކަސްޓަމްސް އިން ބުނީ އެތަކެތީގެ މަގުމަތީ އަގު 193,200.00 (އެއް ލައްކަ ނުވަދިހަ ތިންހާސް ދުއިސައްތަ) ރުފިޔާއަށް އަރާ ކަމަށެވެ. އަދި މިމައްސަލައިގައި ޝާމިލްވާ މީހާއާއި އަތުލައިގަނެވުނު މަސްތުވާތަކެތި މިހާރު މޯލްޑިވްސް ޕޮލިސް ސަރވިސްއާ ޙަވާލުކުރެވިފައިވާ ކަމަށް ކަސްޓަމްސް އިން ބުނެއެވެ.
