ށ. ނަރުދޫއަށް ބޯކޮށް ވާރޭ ވެހި ފެންބޮޑުވުމުގެ ސަބަބުން ބައެއް ގެތަކަށް ގެއްލުންވެއްޖެ އެވެ.
ނަރުދޫ ކައުންސިލްގެ ޕްލޭނިން އޮފިސަރ އަޙްމަދު މާހިރު ރާއްޖެ އެމްވީއަށް މަޢުލޫމާތު ދެއްވަމުން ވިދާޅުވީ ހުކުރު ދުވަހުގެރޭ އިރާކޮޅު އެރަށަށް ވާރޭ ވެހެންފެށި ގޮތަށް ހުއްޓާލީ ހޮނިހިރު ދުވަހުގެ ހެނދުނު ކަމަށެވެ.
އާބާދީގައި 630 މީހުން ދިރިއުޅޭ ނަރުދުއަށް ބޯކޮށް ވާރޭ ވެހުމުގެ ސަބަބުން މަގުތަކުގައި ފެންބޮޑުވެ ފަސް ގެއަކަށް ފެންވަދެފައިވާ ކަމަށް މާހިރު ވިދާޅުވިއެވެ.
އެ ގެތަކުގައި ހިފާ ގެންގުޅޭ ތަކެއްޗާއި ފަރުނީޗަރަށްވެސް ފެނުގެ އަސަރު ފޯރާފައިވާ ކަމަށް ވެސް އޭނާ ވިދާޅުވިއެވެ.
ކައުންސިލް އިދާރަގައި ހުރި ޕަންޕް ސިސްޓަމެއް ބޭނުން ކޮށްގެން ކައުންސިލާއި އެމްއެންޑީއެފް ގުޅިގެން ފެންހިންދުމުގެ މަސައްކަތް މިހާރު ކުރަމުންދާ ކަމަށް މާހިރު ވިދާޅުވިއެވެ.
