ފެންބޮޑުވެ، ބައެއް ގެތަކަށް ވެސް ދަނީ ފެން ވަންނަމުން
ލ. ފޮނަދޫގައި ފެންބޮޑުވެފައި
ލ. ފޮނަދުއަށް ބޯކޮށް ވާރޭވެހި ބޮޑު ސަރަހައްދެއްގައި ފެންބޮޑުވެއްޖެ އެވެ.
އެރަށުން ވާހަކަ ދެއްކި މީހަކު ބުނި ގޮތުގައި ބައެއް މަގުތަކުގައި ދެ ފޫޓަށް ފެންބޮޑުވެފައިވާއިރު، އެ ސަރަހައްދުތަކުގެ ގެތަކަށް ވެސް ދަނީ ފެން ވަންނަމުންނެވެ.
"މިރޭ ގާތްގަނޑަކަށް 9:30 ހާއިރު ވެހެން ފެށި ވާރޭ އަދި ހުއްޓައެއް ނުލާ. ވަރަށް ބޯކެއް ވާރޭ ވެހުނު،" އޭނާ ބުންޏެވެ.
ކައުންސިލްގެ ނައިބު ރައީސް މޫސާ އަބްދުﷲ ވިދާޅުވީ ރަށުތެރޭގައި ބޮޑުވެފައިވާ ފެންގަނޑު ހިތްކުމުގެ މަސައްކަތް ސިފައިން ކުރަމުންދާ ކަމަށެވެ. އިތުރު ވާހަކައެއް އޭނާ ވިދާޅެއް ނުވެ އެވެ.
މި ފަހަކަށް އައިސް ބޯކެއް ވާރޭވެހި ވައިގަދަވުމުގެ ސަބަބުން ބައެއް ރަށްތަކަށް ބޮޑެތި ގެއްލުންތައް ކުރިމަތިވެފައިވެ އެވެ.
