ވިލިނގިލީގައި ފެންބޮޑުވެ، ގިނަ ގެތަކަށް ފެންވަދެއްޖެ
ވާރޭ ވެހެންފެށީ އިރު އޮއްސުނު ފަހުން
ވިލިނގިއްޔަށް ކުރަމުންދާ ވިއްސާރަ
ބޯކޮށް ވާރޭ ވެހުމުގެ ސަބަބުން ގއ. ވިލިނގިލީގައި ފެންބޮޑުވެ، މީހުން ދިރިއުޅޭ ގޭގެއަށް ފެންވަދެއްޖެއެވެ.
ގއ އަތޮޅު ކައުންސިލްގެ ރައީސް އަހުމަދު ފުއާދު ވިދާޅުވީ، މިހާރު ކުރަމުންދާ ވިއްސާރައިގައި، ހުއްޓުމެއް ނެތި އިރުއޮއްސުނު އިރުން ފެށިގެން އެރަށަށް ވާރޭ ވެހެމުންދާ ކަމަށެވެ. އަދި ބައެއް ގޭގެއަށް ފެން ވަދެފައިވާ ކަމަށް އޭނާ ވިދާޅުވި އެވެ. ގޭގެއަށް ފެން ވަން ނަމަވެސް، ލިބިފައި ވަނީ ކިހާވަރެއްގެ ގެއްލުމެއް ކަމެއް އަދި ބުނަން ދަތި ކަމަށް ފުއާދު ވިދާޅުވި އެވެ.
ވާރޭ ވެހުމުގެ ސަބަބުން މަގުތަކުގެ އެކި ހިސާބުގައި ދެފޫޓަށް ވެސް ފެންބޮޑުވެފައިވާ ކަމަށް އޭނާ ހާމަކުރެއްވި އެވެ. އަދި އެރަށުގެ ކައުންސިލާއި ފުލުހުންނާއި ގުޅިގެން ފެންހިންދުމުގެ މަސައްކަތް މިހާރު ދަނީ ކުރަމުންނެވެ.
ވިލިނގިލީ ކައުންސިލްގެ ރައީސް މުސްތަފާ މުހައްމަދު ވިދާޅުވީ، ހަވީރުއްސުރެ ވާރޭ ވެހެން ފެށި ނަމަވެސް ބޯކޮށް ވާރޭ ވެހެންފެށީ އަންގާރަ ދުވަހުގެ ރޭގެ 08:00 ފެށިގެން ކަމަށާއި މިހާރުވެސް ހުއްޓުމެއްނެތި ވާރޭ ވެހެމުންދާ ކަމަށެވެ. ގާތްގަނޑަކަށް 20 ނުވަތަ 25 ގެއަށް ފެންވަދެފައިވާ އިރު ފެން ހިންދުމުގެ މަސައްކަތް ވަރަށް ބާރަށް ކުރަމުންދާ ކަމަށް އޭނާ ވިދާާޅުވި އެވެ.
ވިލިނގިލީގައި ފެންބޮޑުވެފައިވާ އިރު މޫސުމާ ބެހޭ ގައުމީ އިދާރާއިން ވަނީ ވައިޓް އެލަރޓް ނެރެފައެވެ. ވައިޓް އެލަރޓް ނެރެފައިވަނީ ކ އަތޮޅާއި ސ އަތޮޅާއި ދެމެދުގެ އަތޮޅުތަކަށެވެ.
މިހާރު ރާއްޖޭގެ އެކި ހިސާބުތަކަށް ކުރަމުންދާ ވިއްސާރައިގައި ގަދަވަޔާއި، ގުގުރުމާއެކު ބޯކޮށް ވާރޭވެހޭނެ ކަމަށް މުސުމާ ބެހޭ ގައުމީ އިދާރާއިން ބުނެ އެވެ.
