އިސްލާހިއްޔާގައި ހުރި ގުދަނެއްގައި ރޯވެއްޖެ
އަލިފާން ރޯވިތާ މާގިނަ އިރެއް ނުވެ އަލިފާން ވަނީ ނިއްވާލާފައި
އިސްލާހިއްޔާގައި ހުރި ގުދަނުގައި ރޯވެފައި
ކ. މާފުށީގައި ކުޑަކުދިންގެ މަރުކަޒުގެ ގޮތުގައި ބޭނުންކުރި ތަނުގައި ހުރި ގުދަނެއްގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފުން ބުނީ މި ހާދިސާގެ މައުލޫމާތު ލިބިފައިވަނީ ހުކުރު ދުވަހުގެ ހެނދުނު 9:12 ގައި ކަމަށާއި، އެމްއެންޑީއެފުން ވަގުތުން ހަރަކާތްތެރެވެފައިވާ ކަމަށެވެ. އަދި އެ ގުދަނުގައި ރޯވި އަލިފާން މާފުށީގައި ތިބި ކަރެކްޝަންގެ އޮފިސަރުންނާއި ފުލުހުން އަދި އާންމު ރައްޔިތުންގެ އެހީތެރިކަމާއެކު 10:49 ހާއިރު ނިއްވާލާފައިވާކަމަށެވެ.
މި އަލިފާނުގެ ހާދިސާ ފުލުހުން އަންނަނީ ތަހުގީގުކުރަމުންނެވެ. އަދި މިކަމާއި ގުޅޭ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.
ކުދިންގެ އަހުލާގު ރަނގަޅުކޮށް، ބޭނުންތެރި ބަޔަކަށް ހެދުމަށް މީގެ އެތައް އަހަރެއް ކުރިއްސުރެ ސަރުކާރުން ކ. މާފުށީގައި ހިންގި އިސްލާހިއްޔާ ނުވަތަ ތައުލީމާއި މަސައްކަތް އުނގަންނައިދޭ ކުޑަކުދިންގެ މަރުކަޒު އުވާލާފައިވަނީ 2017 ވަނަ އަހަރުއެވެ. އަދި ކުރީގެ ރައީސް އަބްދުﷲ ޔާމީންގެ ވެރިކަމުގައި އިސްލާހިއްޔާ ހިންގާ ބިން ދައުލަތުން ދޫކޮށްލައި، އެތަން މާފުށީ ކައުންސިލާ ހަވާލުކުރިއެވެ.
އިސްލާހިއްޔާ އުވާލާ އެތަނުގައި ތިބި ކުދިން މާލެ އަދި ހުޅުމާލޭގައި ހުންނަ ހިޔާތަކަށް ބަދަލުކުރިއެވެ.
