އޭއެފްސީ ކަޕް: ޕްލޭއޮފަށް މާޒިޔާ ދަތުރުކޮށްފި

އޭއެފްސީ ކަޕްގެ ޕްލޭއޮފަށް ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން ދަތުރުކޮށްފިއެވެ.

އޭއެފްސީ ކަޕްގެ ޕްލޭއޮފަށް މާޒިޔާ ދަތުރުކުރީ ޕްރިލިމިނަރީ ބުރުގެ ދެވަނަ ލެގުގައި ބަންގްލަދޭޝްގެ އަބަހާނީ ލިމިޓެޑް ޑާކާއާ 0-0 އިން އެއްވަރުވެ، އަވޭ ގޯލުން ކުރިހޯދައިގެންނެވެ. ބަންގްލަދޭޝްގައި މި ދެޓީމު ބައްދަލުކުރި ފުރަތަމަ ލެގުގެ މެޗު ނިމުނީ 2-2 އިން ދެ ޓީމު އެއްވަރުވެގެންނެވެ.

ގައުމީ ފުޓްބޯޅަ ދަނޑުގައި ބުދަ ދުވަހު ހަވީރު ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނިގެންދިޔައީ އާދައިގެ ކުޅުމެކެވެ. މި ހާފުގައި މާގިނަ ހަމަލާތަކެއް ފެނިގެންގޮސްފައިނުވާއިރު، އެންމެ ފުރަތަމަ ގޯލާ އަމާޒުކޮށް ހަމަލާއެއް އުފެއްދީ އަބަހާނީ އިންނެވެ. މެޗުގެ 27 ވަނަ މިނެޓުގައި އޭރިއާ ތެރެއިން ސާދުއްދީން ފޮނުވާލި ބާރު ހަމަލާ މާޒިޔާގެ ގޯލްކީޕަރު އަޒީޒީ އޯވޭސް ވަނީ ދިފާއުކޮށްފައެވެ.

މެޗުގައި މާޒިޔާއިން އެޓީމުގެ ފުރަތަމަ ހަމަލާ އުފެއްދީ ފުރަތަމަ ހާފުގެ ފަހު މިނެޓުގައެވެ. އޭރިއާ ބޭރުން އިބްރާހީމް މަހުދީ ހުސެއިން (ފޭދޫ އިއްބެ) ބާރު ހަމަލާއެއް ފޮނުވާލިއިރު، އަބަހާނީގެ ގޯލްކީޕަރު ސަހީދުލް އާލަމް ވަނީ އެ ހަމަލާ ދިފާއުކޮށްފައެވެ.

ދެވަނަ ހާފުގައި މާޒިޔާއިން ކުޅުން ރަނގަޅުކުރިއިރު، މި ހާފު ފަށައިގެން 13 ވަނަ މިނެޓުގައި އެޓީމުގެ ބިދޭސީ ފޯވާޑް ކޯނެލިއަސް ސްޓެވާޓް (ކޯނޭ) އަށް ވަނީ ރަނގަޅު ފުރުސަތެއް ލިބިފައެވެ. އެކަމަކު ގޯލު ކުރިމަތީ ހުހަށްހުރެ ކޯނޭ ބޮލުން ފޮނުވާލި ހަމަލާ ދިޔައީ ގޯލާ އަމާޒުނުވެއެވެ. އޭގެ ފަހުން މެޗުގެ 78 ވަނަ މިނެޓުގައި މާޒިޔާއަށް އެންމެ ހުސް ފުރުސަތެއް ލިބުނީ އެޓީމުގެ އަފްޣާނިސްތާނުގެ ޑިފެންޑަރު މުހައްމަދު ޝާރިފަށެވެ. އެކަމަކު ގޯލު ކުރިމަތީ ހުހަށްހުރެ ބޮލުން އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ. އޭގެ ދެ މިިނެޓު ފަހުން މެޗުގައި ލީޑު ނެގުމަށް އަބަހާނީގެ ރުބެލް މިޔާއަށް ވަނީ ހުސް ފުރުސަތެއް ލިބި ބޭކާރުވެފައެވެ.

މެޗުގެ އިތުރުވަގުތުގައި ދެ ޓީމުގެ އޮފިޝަލުންނާއި ކުޅުންތެރިންގެ ދެމެދު ހަމަނުޖެހުން ހިނގިއިރު، ރެފްރީ ވަނީ މާޒިޔާގެ އެސިސްޓަންޓް ކޯޗު އަހުމަދު ސުޒޭރަށް ރަތް ކާޑެއް ދައްކާ ދަނޑުން ފޮނުވާލާފައެވެ.

އޭއެފްސީ ކަޕްގެ ޕްލޭއޮފަށް މާޒިޔާ ދަތުރުކުރިއިރު، ޕްލޭއޮފުގައި މާޒިޔާ ވާދަކުރަން ޖެހުމުގެ ފުރުސަތު ބޮޑީ އިންޑިއަން ސުޕަ ލީގުގެ ޗެމްޕިއަން ބެންގަލޫރު އެފްސީއާ އެވެ. އަދި ޕްލޭއޮފުން ކުރި ހޯދައި މާޒިޔާ ގްރޫޕް ސްޓޭޖަށް ހޮވިއްޖެނަމަ ވާދަކުރަން ޖެހޭނީ ގްރޫޕް އީ ގައެވެ. އެ ގްރޫޕުގައި ހިމެނެނީ ރާއްޖޭގެ ޓީސީ ސްޕޯޓްސް ކްލަބުގެ އިތުރުން އިންޑިއާގެ އައި ލީގުގެ ޗެމްޕިއަން ޗެންނާއީ ސިޓީ އާއި ބަންގްލަދޭޝްގެ ބަޝުންދަރާ ކިންގްސް އެވެ.