ނ ހޮޅުދޫއަށް އުދަ އަރައި ބޮޑެތި ގެއްލުންތަކެއް!

ނ އަތޮޅު ހޮޅުދޫއަށް އުދައަރައި ބޮޑެތި ގެއްލުންތަކެއް ލިބިއްޖެއެވެ.

"ރާއްޖެއެމްވީ"އަށް މައުލޫމާތު ދެއްވަމުން ހޮޅުދޫ ކައުންސިލް ރައީސް މުހައްމަދު ނަސީރު ވިދާޅުވީ، އުދަ އަރަން ފަށާފައިވަނީ އަންގާރަ ދުވަހުގެރޭ 00:00 އިން ފެށިގެން ކަމަށެވެ. އެގޮތުން ރަށުގެ ސަރަޙައްދުތަކުގައި ގާތްގަނޑަކަށް 3 ފޫޓަށް ލޮނުގަނޑު ބޮޑުވެފައިވާ ކަމަށާއި، ވަރަށް ގިނަ ގެތަކަށްވެސް ފެންވަދެފައިވާކަމަށް އޭނާ ވިދާޅުވިއެވެ.

ނަސީރު އިތުރަށް ވިދާޅުވީ، ބައެއް ގޭގޭގައި ފޫޓަކަށްވުރެ ބޮޑަށް ފެންވަދެ، ހިފާގެންގުޅޭ ސާމާނުތަކާއި ފަރުނީޗަރުތަކަށް ބޮޑެތި ގެއްލުންތަކެއް ލިބިފައިވާ ކަމަށެވެ. އަދި ގާތްގަނޑަކަށް 12 ވަރަކަށް ގެއަށް އެއްކޮށް ފެންވަދެފައިވާކަމަށް އޭނާ ވިދާޅުވިއެވެ.

އޭގެ އިތުރުން، މިހާރު ފުލުހުންނާއ، ރަށު ކައުންސިލާއި، ރައްޔިތުން ގުޅިގެން ފެން ހިއްކުމުގެ މަސައްކަތް ކުރަމުންދާކަމަށްވެސް އޭނާ ވިދާޅުވިއެވެ.

ނަސީރު އިތުރަށް ވިދާޅުވީ، ވިއްސާރަ ނޫން ނަމަވެސް ވައިގަދަ ކަމަށާއި، ހުއްޓުމެއް ނެތި އުދަ އަރާފައިވާ ކަމަށެވެ.

ނ ހޮޅުދޫއަށް އުދަ އަރާފައިވާއިރު، ރާއްޖޭގެ ހުރިހާ ހިސާބަކަށް ވައިޓް އެލަރޓް ނެރިފައިވާކަމަށާއި، އުދަ އެރުމުގެ ފުރުޞަތު އެބަ އޮތް ކަމަށް ޤައުމީ މޫސުމާ ބެހޭ އިދާރާއިންވެސް ވަނީ ބުނެފައެވެ. އެގޮތުން އަންގާރަ ދުވަހުގެ ރޭގަނޑު 01:30 އިން 04:30 އަށް ވައިޓް އެލަރޓް ވަނީ ނެރިފައެވެ.