ޑްރައިވަރ ޤާސިމްގެ މަރު: އަދުހަމްގެ މައްޗަށް ކުރާ ދައުވާގެ އަޑުއެހުމެއް މާދަމާ

ޓެކްސީ ޑްރައިވަރު، 59 އަހަރުގެ ގާސިމް ހަސަންގެ މަރުގެ މައްސަލައިގެ ޝަރީއަތުގެ އަޑުއެހުމެއް ބުދަ ދުވަހު ކްރިމިނަލް ކޯޓުގަައި ތާވަލުކޮށްފިއެވެ.

މި މައްސަލައިގައި ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ އުފުލާފައިވަނީ ޅ ހިންނަވަރު ބޮޑުހިޔާގޭ އަދުޙަމް މުޙައްމަދުގެ މައްޗަށެވެ. އެގޮތުން މި މައްސަލައިގެ އިބްތިދާޢީ އަޑުއެހުމެއް އަންގާރަ ދުވަހުވެސް ބާއްވާފައިވާއިރު، އަދުހަމްގެ ވަކީލަށް މައްސަލައާއި ގުޅޭ ލިއެކިއުންތައް ލިބިފައިނުވާތީ ޝަރީއަތް ކުރިއަށް ގެންދެވިފައެއް ނުވެއެވެ.

މި މައްސަލައިގެ ދެން އޮތް ޝަރީއަތް ތާވަލު ކޮށްފައިވަނީ ބުދަ ދުވަހުގެ ހެނދުނު 10:30 އަށެވެ.

މި މައްސަލައިގައި އަންގާރަ ދުވަހު ބާއްވާފައިވަނީ މައްސަލައާއި ގުޅިގެން ބޭއްވި ފުރަތަމަ އަޑުއެހުމެވެ. އެގޮތުން އަމިއްލައަށް ވަކީލަކު އައްޔަނު ކުރުމުގެ ގާބިލްކަން ނެތުމުން އަދުހަމްގެ ދައުލަތުން ވަނީ އަދުހަމަށް ވަކީލަކު ހަމަޖައްސައިދީފައެވެ.

މި މައްސަލަ އަވަހަށް ނިންމުމަށް ދެފަރާތުންވެސް އެދިފައިވާއިރު، އަދުހަމް ވަނީ ޤާސިމް މަރާލުމުގެ ކުށަށް އިއުތިރާފު ވެފައެވެ. އެގޮތުން ގާސިމް މަރުވީ، މަރާލުމުގެ ގަސްތުގައި ދިން ހަމަލާއަކުން ނޫން ކަމަށާއި، ވަޅިން ހަމަލާދިނީ، ގާސިމް ހަޅޭއްލަވަން ފެށުމުން، އެކަން ހުއްޓުވުމުގެ ގޮތުން ކަމަށް އަދުހަމާ ހަވާލާދީ ފުލުހުން މީގެ ކުރިން ބުނެފައިވެއެވެ.

އޭގެ އިތުރުން، އަދުހަމްއާއެކު ފުލުހުން އިއުތިރާފްގެ އެއްބަސްވުމެއްވެސް ހަދާފައިވާކަން ދައުލަތުންވެސް ވަނީ ފާހަގަކޮށްފައެވެ.

އަދި މައްސަލައިގެ ބާވަތުން މައްސަލައާއި ގުޅޭ ބައެއް ލިޔެކިޔުންތައް ސިއްރު ކުރުމުގެ އަމުރަކަށް ދައުލަތުގެ ވަކީލުން އެދިފައިވާއިރު، މައްސަލަ ބައްލަވާ ގާޒީ ވަނީ ދައުލަތުން އެދުނު ގޮތަށް އެ އަމުރު ނެރެދެއްވާފައެވެ. އޭގެ ތެރޭގައި ހިމެނެނީ ގާސިމްގެ ފޮޓޯ ހިމެނޭ ބައެއް ލިޔުންތަކާއި ސިއްރު ހެކިންގެ ބަޔާންތައް ކަމަށް ބައެއް ނޫސްތަކުން ރިޕޯޓްކޮށްފައިވެއެވެ.

އަދުހަމަކީ މަސްތުވާތަކެތީގެ މައްސަލަތަކާއި ވައްކަމާއި ފޭރުމާއި މާރާމާރީގެ އިތުރުން ތަފާތު އެކިއެކި މައްސަލަތަކުގެ ރެކޯޑް އޮތް މީހެއް ކަމަށާއި، ގާސިމް މަރާލި ދުވަހު ވެސް އޭނާ މަސްތުވުމަށާއި ޒަރޫރީއެކިއެކި ބޭނުންތަކަށް ފައިސާ ހޯދުމަށް ފޭރުމަށް މަސައްކަތް ކުރި ކަމަށް ފުލުހުން މީގެ ކުރިން ބުނެފައިވެއެވެ. އަދި މާލެއިންނާއި ހުޅުމާއިން ބަޔަކާއެކު މަސްތުވާތަކެތި ބޭނުންކޮށްފައިވާ ކަމަށްވެސް ފުލުހުން ބުނެއެވެ.

އޭގެ އިތުރުން، ވައްކަމާ ގުޅޭ އިތުރު މައްސަލައެއްގައި ދާދި ފަހުން އަދުހަމުގެ މައްޗަށް ވަނީ 1 އަހަރާއި 12 ދުވަހުގެ ޖަލު ހުކުމެއްވެސް އިއްވާފައެވެ.