ހުޅުމާލޭގައި ކަތުރު ފަނީގެ މައްސަލަ ބޮޑުވެފައިވާ ފްލެޓުތަކުން ކަތުރުފަނި ނައްތާލައިފިއެވެ.

ކަތުރު ފަނީގެ މައްސަލައަށް އަވަސް ޙައްލެއް ހޯދައިދިނުމަށް ހައުސިން މިނިސްޓްރީން ވަނީ 703 ފްލެޓް ޞަރަޙައްދުގެ އިމާރާތުގެ ބޭރު ސްޕްރޭ ކޮށްފައެވެ.

މިމަސައްކަތާއި ބެހޭގޮތުން ހައުސިން މިނިސްޓްރީގެ ސީނިއަރ އެގްޒެކްޓިވް ޑިރެކްޓަރު ދާވޫދު އިބްރާހިމް ވިދާޅުވީ ނުވަ ބިލްޑިންގ އެއްގައި 14 އެޕާޓްމެންޓެއްގައި ކަތުރުފަނި އަޅާފައިވާކަމުގެ ޝަކުވާ މިނިސްޓްރީއަށް ލިބުނު ކަމަށެވެ.

އެގޮތުން ހައުސިން މިނިސްޓްރީގެ ޓީމުތަކުން ސަރވޭކޮށް މިހާރު 12 އެޕާޓްމެންޓަކުން ކަތުރުފަނި ނައްތާލާފައިވާ ކަމަށް ދާވޫދު ވިދާޅުވިއެވެ. ދާވޫދު ވިދާޅުވީ އަންގާރަ ދުވަހު ކުރިއަށް ގެންދިޔައީ އެއިމާރާތްކުގެ ބޭރަށް ޓްރީޓްމަންޓް ކުރުމުގެ މަސައްކަތް ކަމަށާއި، އަންގާރަ ދުވަހުގެ ރޭ ހުރހައި މަސައްކަތެއް އެއްކޮށް ނިންމާލާފައިވާކަމަށެވެ. އަދި ވިދާޅުވީ ކުރިއަށް އޮތްތާގައި ކަތުރުފަނި ނައްތާލުމުގެ މަސައްކަތް ކުރަންޖެހިއްޖެ ޙާލަތެއްގައި ވެސް އެމަސައްކަތް ކުރާނެ ކަމަށާއި މިހާރު އެއިންތިޒާމުތައް ހަމަޖެހިފައިވާ ކަމަށެވެ.

ދާވޫދު ވިދާޅުވީ އުޞޫލާ އެގޮތަށް ހުރިހާ ރައްޔިތުންނަށް ވެސް ހައުސިން މިނިސްޓްރީގެ ފަރާތުން އެއްބާރުލުން ދެމުންދާ ކަމަށެވެ.

ކަތުރުފަނި އެންމެ ބޮޑަށް އެޅި ފްލެޓްގެ ވެރިފަރާތްކަމަށްވާ ޢަބްދުލްޤާދިރު ޤާސިމް ބުނީ ކަތުރުފަނީގެ އުދަނގޫ ވަރަށް ބޮޑުވި ކަމަށާއި، ނަމަވެސް ހައުސިން މިނިސްޓްރީގެ ސަމާލުކަމަށް މިމައްސަލަ ގެނައުމުން މިނިސްޓްރީގެ ޓީމުން އަވަސް ޙައްލެއް ހޯދައިދިން ކަމަށެވެ. އަދި މިނިސްޓްރީގެ ޓީމުން ކޮށްދިން މަސައްކަތަށް ޢަބްދުލްޤާދިރު ވަނީ ތަކުރާރުކޮށް ޝުރުވެރިވެފައެވެ.