"ވަރްލޑް އެކްސްޕޯ 2020" ގައި ރާއްޖެއިން ބައިވެރިވަނީ

ކޮންމެ ފަސް އަހަރަކުން އެއް އަހަރު ބާއްވާ "ވަރލްޑް އެކްސްޕޯ 2020" ގައި ދިވެހިރާއްޖެއިން ބައިވެރިވުމަށް ހަމަޖެހިފައިވާ ކަމަށް އިކޮނޮމިކް މިނިސްޓްރީން ބުނެފިއެވެ.

މިއަހަރުގެ އޮކްޓޯބަރ މަހުން ފެށިގެން އަންނަ އަހަރުގެ އެޕްރީލް މަހާއި ހަމައަށް ހަމަސްދުވަހުގެ މުއްދަތަށް ދުބާއީގައި ކުރިއަށްދާ މި އެކްސްޕޯ އަށް ދުރާލާ ރާއްޖެއިން ތައްޔާރުވަމުންދާ ކަމަށް މިނިސްޓްރީން މަޢުލޫމާތު ދެއެވެ.

އިކޮންމިކް މިނިސްޓްރީން އިސްނަގައިގެން ތައްޔާރު ވަމުންދާ މި ފެއަރ ގައި މިނިސްޓްރީ އޮފް ޓުއަރިޒަމް، މޯލްޑިވްސް މާރކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އަދި މިނިސްޓްރީ އޮފް އާރޓް އެންޑް ކަލްޗަރ އެންޑް ހެރިޓޭޖުގެ ބައިވެރިވުން ހިމެނޭނެއެވެ.

މި އެކްސްޕޯގައި ބައިވެރިވުމުގެ މަޤްސަދަކީ ރާއްޖޭގެ ޓުއަރިޒަމް ޕްރޮމޯޓް ކުރާނެ ޕްލެޓްފޯމަކަށް ހެދުންކަމަށާއި ރާއްޖޭގެ އިސްވެސްޓްމަންޓް ޕްރޮމޯޓްކުރާނެ ޕްލެޓްފޯމަކަށް ހެދުންކަމަށް މިނިސްޓްރީން މަޢުލޫމާތު ދެއެވެ.

އެކްސްޕޯ އިންތިޒާމު ކުރާ ފަރާތްތަކުގެ ޓާގެޓަކީ 25 މިލިއަން ވިޒިޓަރސް އެކްސްޕޯއަށް އައުން ކަމަށް މިނިސްޓްރީން މަޢުލޫމާތު ދެއެވެ. ކުރިން ވެސް ރާއްޖެއިން ދެހަފަރެއްގެ މަތިން މި އެކްސްޕޯގައި ބައިވެރިވިއެވެ. އެއީ 2015 ވަނަ އަހަރު އިޓަލީގެ މިލާންގައި ބޭއްވި ފެއަރ އާއި 2010 ވަނަ އަހަރު ޗައިނާގެ ޝަންހާއި ގައި ބޭއްވި އެކްސްޕޯގައެވެ.