ވާހަކަ ދެއްކެވީ ދާއިރާގެ ރައްޔިތުންގެ ދިފާއުގައި، އަތޮޅުތެރޭގެ ރައްޔިތުންނަށް ކުޑައިމީސްބަހެއް ދެންނެވުމުގެ މަގްސަދެއްގައި ނޫން: ޝަހީމް
11 ފެބުރުއަރީ 2020 | އަންގާރަ 14:32އަބަދުވެސް އަތޮޅުތަކާއި މޭލެއާއި އޮތް ތަފާތުކުރުން ކުޑަކުރުމަށް މަސައްކަތް ކުރައްވާނަން
ހެންވޭރު ދެކުނު ދާއިރާގެ އެމްޑީޕީ މެންބަރު ޙުސައިން ޝަހީމް (އަނދުން ހުސޭން)
އާދީއްތަ ދުވަހު ރާއްޖެޓީވީގެ ފަލަސުރުޚީ ޕްރޮގުރާމުގައި ވާހަކަ ދެއްކެވީ ދާއިރާއެއް ތަމްސީލުކުރާ މެންބަރެއްގެ ހައިޞިއްޔަތުން ދާއިރާގެ ރައްޔިތުންގެ ކަންބޮޑުވުން ހިއްސާކުރަންކަމަށާއި، އެ ވާހަކަ ދެއްކެވީ އަތޮޅުތެރޭގެ ރައްޔިތުންނަށް ކުޑައިމީސްބަހެއް ދެންނެވުމުގެ މަޤުޞަދެއްގައި ނޫންކަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ އެމްޑީޕީ މެންބަރު އަދި އެމްޑީޕީގެ ޕާރަލަމެންޓަރީ ގްރޫޕުގެ ޑެޕިއުޓީ ލީޑަރު ޙުސައިން ޝަހީމް (އަނދުން ހުސޭން) ވިދާޅުވެއްޖެއެވެ.
މާލޭގެ މީހުން ދިރިއުޅޭ ޖާގައަކީ ''ކޯސްޓް ކިރު ދަޅު'' ވަރުގެ ޖާގައެއްގެ ގޮތުގައި ސިފަކުރައްވާ ޝަހީމް ވިދާޅުވީ، މާލޭގެ ރައްޔިތުންނަކީ އެއަށްވުރެ ކިޔަމަންތެރި، ބަސްއަހާ އަދި ފަޚުރުވެރި ބައެއް ކަމަށާއި، އެކަމަކު ކޮންމެ ސަރުކާރުންވެސް މާލޭގެ ބިން ހިއްކުމަށް ފަހު ރަށްރަށުން މީހުން ގެނެސް މާލޭގައި ވަޒަންވެރިވުމުން މާލޭގެ ރައްޔިތުން ބިންކޮޅެއްވެސް ނުލިބޭ ކަމަށް ވިދާޅުވުމާއި ގުޅިގެން، ގިނަ ބައެއްގެ ފާޑުކިޔުން އަމާޒުވެފައިވާ ދަނޑިވަޅެއްގައި ރާއްޖެއެމްވީއަށް ދެއްވި ޚާއްޞަ އިންޓަވިއުއެއްގައި މެންބަރު ޝަހީމް ވިދާޅުވީ ދެއްކެވި އެއްވެސް ވާހަކައެއް ދެއްކެވީ ސީދާ ގޮތުންވެސް އަދި ނުސީދާ ގޮތުންވެސް އަތޮޅުތެރޭގެ އެއްވެސް ރައްޔިތަކަށް ކުޑައިމީސްބަހެއްް ދެންނެވުމުގެ މަޤުޞަދެއްގައި ނޫންކަަމެވެ. އަދި ދެއްކެވި ވާހަކައިގެ މާނަ އޮޅޭގޮތަށް ސޯޝަލް މީޑިއާގައި ކަންކަން ގޮސްފައި ހުރި ކަން ޤަބޫލުކުރައްވާކަމަށާއި ޕްރޮގުރާމުގައި ވާހަކަ ދެއްކެވީ ދާއިރާއެއް ތަމްސީލުކުރާ މެންބަރެއްގެ ހައިޞިއްޔަތުން ދާއިރާގެ ރައްޔިތުންގެ ކަންބޮޑުވުން ޙިއްސާކުރަންކަމަށްވެސް ޝަހީމް ވަނީ ވިދާޅުވެފައެވެ.
އިތުރަށް އެކަންތައް ތަފުޞީލުކޮށްދެއްވަމުން މެންބަރު ޝަހީމް ވިދާޅުވީ، އބަދުވެސް ބަލަނީ މާލޭގައި ގިނަ ދުވަހު އުޅޭ ފަރާތްތަކަކީ މާލޭ މީހުންގެ ގޮތުގައިކަމަށެވެ. އެގޮތުން މާލެއަކީ ތޮއްޖެހި ރެފިއުޖީ ކޭމްޕެއްގައި ހެން ރައްޔިތު މީހާ ދިރިއުޅެމުން އަންނަ ތަނެއްކަން ފާހަގަކުރައްވައި މެންބަރު ވިދާޅުވީ، ދެއްކެވި ވާހަކައިގައި ފަލަޞްޠީން ސިފަކުރެއްވީ އެގޮތަށް ކަމަށާއި ހިތްނުތަނަވަސްކަން ދިމާވި ސަބަބަކީ ބައެއް ބޭފުޅުން އެކަންތައް ތާރީޚީ ގޮތުން ނަންގަވައިގެން މާނަކުރެއްވީމައިކަމަށެވެ. ޝަހީމް ވިދާޅުވީ ދަފްތަރުގައި އޮތަސް ގެއެއްގައި ރަޖިސްޓްރީވެފައި އޮތަސް އަދި ގިނަ ދުވަހު މާލޭގައި އުޅުނުމީހާއަކީވެސް މާލޭގެ މީހެއްކަމަށެވެ. އަދި އަބަދުވެސް މަސައްކަތް ކުރަމުންދަނީ ތަފާތުކުރުމެއްނެތި ރައްޔިތުންގެ ޙާލަތު ބަދަލުކުރުމަށްކަމަށެވެ.
އިތުރަށް ވާހަކަ ދައްކަވަމުން މެންބަރު ޝަހީމް ވިދާޅުވީ، އަތޮޅުތެރެއިން މާލެ އަންނަ ބޭފުޅުންނަކީ މާލެ ހިތްފަސޭހަވެގެން އަންނަ ބޭފުޅުން ނޫންކަމަށާއި، މާލެ އަންނަން ޖެހެނީ ޒަމާނަތަކެއް ވަންދެން އަތޮޅުތައް ތަރައްޤީކުރުމުގައި ސަރުކާރުތަކުން އިހުމާލުވެ ރަށްރަށުން އެދެވޭ ޚިދުމަތް ނުލިބޭތީކަމަށެވެ. އަދި ސަރުކާރުގެ މެންބަރެއްގެ ހައިޞިއްޔަތުން އަބަދުވެސް އަތޮޅުތަކާއި މޭލެއާއި އޮތް ތަފާތުކުރުން ކުޑަކުރުމަށް މަސައްކަތް ކުރައްވާނެކަމުގެ ޔަޤީންކަން މެންބަރު ވަނީ ދެއްވާފައެވެ. މީގެއިތުރުން ދާއިރާއެއް ތަމްސީލު ކުރާ މެންބަރެއްގެ ހައިޞިއއްޔަތުން ދާއިރާގެ ރައްޔިތުންގެ ކަންބޮޑުވުންތައް ޙިއްސާކުރުމުގައި ފަހަތަށް ނުޖެހޭނެކަމަށްވެސް މެންބަރު ވަނީ ވިދާޅުވެފައެވެ.
