ޓްރެފިކް ޤަވާއިދަށް އިޞްލާޙު ގެނައުމުގެ ބިލާއެކު މެންބަރު ޔާސިރު ހޫނުފެނަށް!
ޕާކިން ސްޓިކާ ޖޫރިމަނާ އަށް ބަދަލެއް ނާންނަ ކަމަށް ޔާސިރު ވިދާޅުވި
ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުލް ލަތީފް
އެއްގަމު ދަތުރުފަތުރުގެ ޤާނޫނަށް އިޞްލާޙު ގެނައުމުގެ ބިލާއި އެކު ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު ޔާސިރު ޢަބްދުލް ލަޠީފަށް ގިނަ ބައެއްގެ ފާޑު ކިޔާ އޭނާ ހޫނުފެނަށް ވައްޓާލައިފިއެވެ.
ޔާސިރު ހުށަހަޅުއްވާފައިވާ އިޞްލާޙު ގެނައުމުގެ ބިލުގައި، ޤަވާއިދާ ޚިލާފަށް ޕާކު ކުރުމުން ސްޓިކަރ ޖަހާ ކޮންމެ ފަހަރަކު، އެ އުޅަނދުގެ ވެރިފަރާތް 250ރ އިން ޖޫރިމަނާ ކުރެވޭނެ ކަމަށް ބަޔާންކޮށްފައިވެއެވެ.
އެއްގަމު ދަތުރުފަތުރުގެ ޤާނޫނުގައި މިހާރު އޮންނަގޮތުން، ޤަވާއިދާ ޚިލާފަށް ޕާކްކުރުމުން އެ އުޅަނދެއްގައި ޖަހާ ފުރަތަމަ ސްޓިކަރގެ ޖޫރިމަނާ ފީ އަކީ 250ރ އެވެ. އަދި ދެވަނަ ފަހަރު ހަމަ އެ އުޅަނދުގައި ސްޓިކަރއެއް ޖަހައިފިނަމަ ޖޫރިމަނާ ފީއަކީ 500ރ އެވެ. އަދި ތިން ވަނަ ފަހަރު ނުވަތަ ދެން އެ އުޅަނދެއްގައި ޖަހާ ކޮންމެ ސްޓިކަރއެއްގެ ފީއަކީ 750ރ އެވެ.
އެހެންކަމުން، މި އިޞްލާޙުގައިވާ ގޮތުން، އުޅަނދެއްގައި ސްޓިކަރއެއް ޖަހާ ކޮންމެ ފަހަރަކު ޖޫރިމަނާ ކުރެވޭނީ 250ރ އިންނެވެ. އަދި ޤާނޫނުގެ ދަށުން ކުރެވޭ ޖޫރިމަނާއެއް ނުދައްކައިފިނަމަ އެ ފައިސާއެއް ވާނީ އެމީހަކު ދައުލަތަށް ދައްކަންޖެހޭ މަދަނީ ދަރަންޏެއް ކަމަށާއި އެގޮތުން ޝަރީޢަތަށް ހުށަހަޅައިގެން އެ ފައިސާ ހޯދުމުގެ ބާރު މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އަށް ދޭގޮތަށް އެ އިޞްލާޙުގައި ވެއެވެ. މި ބިލު ހުށަހެޅުއްވުމާއެކު މި ބިލާއި މެދު ޢާންމުންގެ ޝަކުވާތައް ވަނީ އެކި ޕްލެޓްޕޯމްތަކުގައި ބަންޑުން ކޮށްލާފައެވެ.
އެގޮތުން އެ ބިލަކީ ރައްޔިތުން ފެލާ ޖަލަށް ލާން ގެނެސްފައިވާ އިޞްލާޙުތަކެއް ކަމަށް ބައެއް ކަމަށް ބައެއް ޢާންމުން ބުނެއެވެ. މީގެ އިތުރުން އެއީ ބަޖެޓަށް ފައިސާ ހޯދުމަށް ކުރާކަމެއްގެ ގޮތުގައިވެސް ބައެއް މީހުންވަނީ ސިފަކޮށްފަ އެވެ. އަދި އަބަދު ދިވެހިން ޖޫރިމަނާގެ ކަންކަމުގެ ތެރޭގައި އުޅެން ޖެހިފައިވާކަމަށްވެސް ބައެއް މީހުން ބުނެފައިވެ އެވެ. ޕާކިން ޖޫރިމަނާއެއްގެ ވާހަކަ ދައްކަމުން އަންނަ އިރު މާލޭގައި ދުއްވާ އުޅަނދުތައް ޕާކުކުރާނެ ތަނެއް ނެތުމުގެ މައްސަލައަކީ ޢާންމުކޮށް ދެކެވޭ ވާހަކައެކެވެ. ނަމަވެސް މިކަމަށް ޙައްލެއް ނުގެނެސް އަނެއްކާވެސް ޖޫރިމަނާ ކުރެވޭނެ ގޮތެއް ހެދުމަކީ ޢާންމުން ސަރުކާރަށް ކުރާ އިތުބާރާއި ކުރާ އުއްމީދުތައް ކުޑަވެގެންދާނެކަމެއް ކަމަށް ގިނަ ބަޔަކު ދެކެއެވެ.
މިބިލާ ގުޅޭގޮތުން ރާއްޖެ އެމްވީ އަށް މަޢުލޫމާތު ދެއްވަމުން ޔާސިރު ވިދާޅުވީ މިހާރު ބިލަށް ގެނައުމަށް ހުށަހަޅާފައިމިވާ އިޞްލާޙުގެ ސަބަބުން އެޕީލް ކުރެވޭ ގޮތް އަލަށް ފަށަނީ ކަމަށެވެ. ޕާކިން ސްޓިކަރ ޖޫރިމަނާ ހަމަ އެއްވަރެއް ކަމަށާއި އެޢަދަދު ބޮޑުނުވާކަމަށް ޔާސިރު ވިދާޅުވި އެވެ. ސްޕީޑާ ޚިލާފަށް ދުއްވުމާއި އެހެން ކުށްތަކުގެ ތަކުގެ އަދަބު މިހާރު ހުށަހަޅާފައިވާ އިޞްލާޙު ތެރެއިން ބޮޑުކުރެވިފައިވާ ކަމަށާއި މިބިލުން ފުލުހުންނަށް އުޅަނދު ހިފަހައްޓާ އުޞޫލު ހަރުދަނާ ކުރެވޭނެ ކަމަށް ޔާސިރު ވިދާޅުވި އެވެ. މީގެއިތުރުން ޔާސިރު ވިދާޅުވީ ޕާކިން ސްޓިކަރ ޖެހުމަކީ ސަރުކާރުން ޢާމްދަނީ ހޯދަންކުރާ ކަމެއްކަމަށް ދެކެވަޑައިނުގަންނަވާ ކަމަށެވެ. އެކަން މަޖިލީހުގައިވެސް މެންބަރުން ފާހަގަކުރެއްވި ކަމަށް ޔާސިރު ވިދާޅުވި އެވެ.
މީގެއިތުރުން ޔާސިރު ވިދާޅުވީ ހުރިހާ ޤައުމެއްގައިވެސް ކުށްތަކަށް ޖޫރިމަނާ ކަނޑައެޅިފައި ހުންނާނެ ކަމަށެވެ. އަދި މިކަމުގެ ކަންބޮޑުވުން ރައްޔިތުންގެ ތެރޭގައި ބޮޑުވެފައިމިވަނީ މިކަމަކީ މަދަނީ ދަރަންޏެއްގެ ގޮތުގައި ރައްޔިތުންނަށް ނޭނގޭތީކަމަށް ޔާސިރު ވިދާޅުވި އެވެ. ޖުމުލަކޮށް މިބިލު ސަރުކާރުން ފޮނުވާފައިވާ ގޮތް ރަނގަޅުކަމަށާއި ކޮމިޓީ މަރުޙަލާގައި މިބިލަށް އިޞްލާޙުގެނެވޭނެ ކަމަށް ޔާސިރު ވިދާޅުވި އެވެ. އަދި މިއިޞްލާޙަށް ޢަމަލުކުރަން ފަށާއިރު ކުރީގެ ޖޫރިމަނާތައް މަޢާފުވާންވާނެ ކަމަށް ޤަބޫލުކުރައްވާ ކަމަށް ޔާސިރު ވިދާޅުވި އެވެ.
ކޮންމެ ކުށެއް ކުރިއަސް އަދަބު ލިބެންޖެހޭނެ ކަމަށް ޔާސިރު ވިދާޅުވި އެވެ. ޓްރެފިކް ވައޮލޭޓް ކުރާ މީހާ އާއި ނުކުރާ މީހާ އެއްހަމަވާނެތޯ ޔާސިރު ވަނީ ސުވާލު އުފައްދަވާފައެވެ. އަދި ކުރިން ޤަވާއިދާ ޚިލާފުވާ މީހާއަށް ކުރާ މީހާ އެދައްކަން މަޖުބޫރު ނުކުރާކަމަށް ޔާސިރު ވިދާޅުވި އެވެ. އެދެއްކުމަށް މަޖުބޫރު ކުރެވެނީ މީހެއްގެ އެހެން އަސާސީ ޙައްޤެއް ހިފަހައްޓައިގެން ކަމަށް ޔާސިރު ވިދާޅުވި އެވެ. މިސާލެއްގެ ގޮތުން ޔާސިރު ނެންގެވީ ކައިވެނި ކުރަންވީމާ ދައްކަންޖެހޭ ފައިސާ ނުދައްކާ ކައިވެނިނުކޮށްދޭ ނުކޮށްދިނުމެވެ.
