މިޔަރުގެ މަސްވެރިކަމަށް ހުޅުވާލެވޭނީ އެކަމާ ގުޅޭގޮތުން ފުޅާ ދާއިރާއެއްގައި މަޝްވަރާކުރުމަށްފަހު :މިނިސްޓަރ
10 ފެބުރުއަރީ 2020 | ހޯމަ 18:12މިނިސްޓަރ ވިދާޅުވީ މިޔަރު މަސްވެރިކަމަށް ހުޅުވާލުމަށް ގިނަ ފަރާތްތަކަކުން އެދެމުންދާ ކަމަށް
މިޔަރު ގިނަވެ މަސްވެރިންނަށް އުނދަގޫވަމުން އަންނަކަމަށް މަސްވެރިން ބުނޭ
ރާއްޖޭގައި މިޔަރު ގިނަވެ މަސްވެރިންނަށް އެކަމުގެ އުނދަގޫވަމުންދާތީ އެކަމުގެ ޝަކުވާ ލިބެމުންދާކަމަށާއި ނަމަވެސް މިޔަރުގެ މަސްވެރިކަމަށް ހުޅުވާލެވޭނީ އެކަމާއި ގުޅޭގޮތުން ފުޅާ ދާއިރާއެއްގައި މަޝްވަރާކުރުމަށްފަހު ކަމަށް ފިޝަރީޒް މިނިސްޓަރ ޒަހާ ވަހީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ޖަލްސާގައި މިޔަރުގެ މަސްވެރިކަަމަށް ހުޅުވާލައްވާނެތޯ މެންބަރުން ސުވާލު ކުރެއްވުމުން މިނިސްޓަރ ވިދާޅުވީ މިޔަރު މަސްވެރިކަމަށް ހުޅުވާލުމަށް ގިނަ ފަރާތްތަކަކުން އެދެމުންދާ ކަމަށެވެ. މަސްވެރިންނަށް ދިމާވާ ގޮންޖެހުމެއްގެ ގޮތުން މިވާހަކަ ދެކެވޭކަންވެސް މިނިސްޓަރ ފާހަގަކުރެއްވިއެވެ. މިޔަރުގެ މަސްވެރިކަން މަނާކުރި އިރު ރާއްޖޭގައި މިޔަރުގެ ޙާލަތެއް ބަލާފައި ނުވާކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ ތަފާސް ހިސާބަށް ބިނާވެގެން ނޫނީ މިކަހަލަ ކަމެއް ހުޅުވާ ނުލެވޭނެކަމަށެވެ. ތިމާވެށީގެ ގޮތުން ރާއްޖެއަށް ކުރާނީ ކޮންކަހަލަ އަސަރުތަކެއްތޯ ވެސް ވިސްނަންޖެހޭ ކަމަށް މިނިސްޓަރ ވިދާޅުވި އެވެ. އަދި މިހާރު ކަނޑުފަޅުގެ ދިރާސާއެއް ކުރަމުންދާ ކަމަށާއި މިމަސައްކަތުގައި 690 ގަޑިރުގެ މިޔަރު އުޅޭތޯ ނޫޅޭތޯ ބެލުމަށް ސަރވޭކޮށްފައިވާ ކަމަށެވެ.
މިނިސްޓަރ ވިދާޅުވީ އިންސާނުންގެ ފުށުންވެސް މިޔަރުގެ އުޅުމަށް ބަދަލުތަކެއް އަންނަކަމަށެވެ. އެގޮތުން ބައެއް ރިސޯޓްތަކުން ޑަސްބިންތައް ބަންޑުންޖަހާ މިޔަރަށް ކާންދޭ ކަން މިނިސްޓަރ ފާހަގަކުރެއްވި އެވެ. މަސްވެރިކަމުގެ މެނޭޖްމަންޓް ޕްލޭން އެކުލަވާލަމުންދާއިރު މިކަމާއި ގުޅޭގޮތުން އިތުރަށް ވަކާލާތުކުރަމުންދާނެ ކަމަށް މިނިސްޓަރ ވިދާޅުވިއެވެ.
މިޔަރު ގިނަވެ މަސްވެރިކަން ކުރުމަށް މަސްވެރިންނަށް ގިނަ ގޮންޖެހުންތައް ކުރިމަތިވަމުންދާކަން މަސްވެރިން ފާހަގަކުރަމުންދާތާ ދުވަސް ތަކެއް ވަނީ ވެފައެވެ.
