48 ގަޑިއިރު ތެރޭގައި އެކެނޑިޑޭޓެއްގެ ކެނޑިޑެންސީ ގަބޫލު ކުރިކަން ނުވަތަ ނޫން ކަން އަންގާނެ
އިލެކްޝަންސް ކޮމިޝަންގެ ނައިބް ރައީސް އަހުމަދު އަކްރަމް
އަންނަ އެޕްރީލް މަހުގެ 4 ވަނަ ދުވަހު ބާއްވާ ލޯކަލް ކައުންސިލް އިންތިޚާބުގައި ވާދަކުރާ ކެންޑިޑޭޓުންގެ ނަންތައް މާރޗް މަހުގެ 4 ގައި އިޢުލާން ކުރާނެ ކަމަށް އިލެކްޝަންސް ކޮމިޝަނުން ބުނެފިއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގުރާމުގައި ވާހަކަ ދައްކަވަމުން އީސީގެ ނައިބް ރައީސް އަހުމަދު އަކްރަމް ވިދާޅުވީ ކެންޑިޑޭޓުންގެ ނަންތައް ގުރުއަތުލާ އެނަންތައް ކެނޑިޑެންސީ ނަންބަރާއި އެކުގައި މާރޗް މަހުގެ 4 ގައި އިޢުލާން ކުރައްވާނެ ކަމަށެވެ.
އަދި އިލެކްޝަންސްކޮމިޝަނަށް ކެންޑިޑޭޓަކު ފޯމް ހުށަހަޅާތާ 48 ގަޑިއިރު ތެރޭގައި އެކެނޑިޑޭޓެއްގެ ކެނޑިޑެންސީ އީސީން ޤަބޫލު ކުރިކަން ނުވަތަ ނޫން ކަން އަންގާ ލިޔުން ދޭނެ ކަމަށް އަކްރަމް ވިދާޅުވިއެވެ.
ރަސްމީކޮށް ކެމްޕޭން ހުޅުވާލެވޭނީ ގުރުއަތުލާ ދުވަހުން ފެށިގެން ކަމަށާއި، އެދުވަހާއި ހަމައަށް ކޮންމެ ކެންޑިޑޭޓަކަށްވެސް ނަން ނެގުމުގެ ފުރުޞަތު އޮންނާނެ ކަމަށް އޭނާ ވިދާޅުވިއެވެ.
ނަމަވެސް ނަން ތަރުތީބު ކުރުމަށްފަހުގައި ނަން އަނބުރާ ނުގެންދެވޭނެ ކަމަށް އަކްރަމް ވިދާޅުވިއެވެ.
ލޯކަލް ކައުންސިލް އިންތިޚާބުގައި ވާދަ ކުރުމަށް މިހިނގާ ފެބްރުއައީ މަހުގެ 4 ގައި ހުޅުވާލާފައި ވާއިރު އަދި މިހާތަނަށް އީސީއަށް ފޯމު ހުށަހަޅާފައި ނުވާ ކަމަށް އަކްރަމް ވިދާޅުވިއެވެ.
ލޯކަލް ކައުންސިލް އިންތިޚާބަށް ކުރިމަތި ލިމުގެ ފުރުޞަތު އީސީން ހުޅުވާލާފައި މިވަނީ މި މަހުގެ 20 ވަނަ ދުވަހުގެ ނިޔަލަށެވެ. އަދި އަންހެނުން ތަރައްޤީއަށް މަސައްކަތް ކުރާ ކޮމިޓީގެ އިންތިޚާބަށް ފުރުޞަތު ހުޅުވާލާފައި ވަނީ މިމަހުގެ 24 ވަނަ ދުވަހާއި ހަމައަށެވެ.
އަކްރަމް ވިދާޅުވީ ކައުންސިލް އިންތިޚާބާއި ޑަބްލިއުޑީސީ އިންތިޚާބުގައި އެއްދުވަހެއްގައި ހުޅުވާލި ނަމަވެސް ދެ ތާރީޚެއް ކަނޑައަޅާފައި ވަނީ އީސީން އަންހެނުން ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގައި ސިޔާސީ ޕާޓީތަކަށް ވާދަކުރެވޭކަން މާ ފަހުން އިޢުލާން ކުރުމާއި ގުޅިގެން ކަމަށެވެ.
