ސަރުކާރު ހައިރާންވާވަރުގެ ނަތީޖާއެއް ނެރޭނަން: އާދަމް ޝަރީފް
8 ފެބުރުއަރީ 2020 | ހޮނިހިރު 05:38ނިކުންނަނީ އެމްޑީޕީއާ ވާދަކުރާކަށެއް ނޫން: އާދަމް ޝަރީފް
އާދަމް ޝަރީފް، ރާއްޖެ ޓީވީއަށް ދެއްވި އިންޓަވިއުގެ ތެރެއިން
ލޯކަލް ކައުންސިލް އިންތިޚާބުގައި ސަރުކާރުން ހައިރާންވާ ވަރުގެ ނަތީޖާ އެއް އިދިކޮޅުން ނެރޭނެ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވެއްޖެއެވެ.
ލޯކަލް ކައުންސިލް އިންތިޚާބާ ދިމާކޮށް ޕީޕީއެމުން ވަނީ އެ ޕާޓީގެ ޕްރައިމަރީ ހުކުރު ދުވަހު ބާއްވާފައެވެ. އެ ޕާޓީން ބުނެފައިވާ ގޮތުން ޕްރައިމަރީގައި ވަރަށް ގިނަ ފަރާތްތަކަކުން ވަނީ ވޯޓުލާފައެވެ.
ޕްރައިމަރީ ކުރިޔަށް ދިޔަ ގަޑީގައި، ދަރުބާރުގޭގައި ހުންނަވާ ރާއްޖެ.އެމްވީ އަށް ދެއްވި އިންޓަވިއުއެއްގައި ޕީއެންސީ ނައިބް ރައީސް އާދަމް ޝަރީފް ވިދާޅުވީ، އުއްމީދު ކުރި ވަރަށްވުރެވެސް ގިނަ ޢަދަދެއްގެ މެންބަރުން ނިކުމެ ޕާޓީގެ ޕްރައިމަރީގައި ވޯޓުލާފައިވާ ކަމަށާއި، އެއިން އަންގައިދެނީ ޕާޓީގެ އެތެރޭގެ ޑިމޮކްރަސީ ވަރުގަދަވެ ރައްޔިތުން އެކަން ބަލައިގަނެފައިވާ މިންވަރު ކަމަށެވެ.
މަޑުއްވަރީ ދާއިރާގެ މެންބަރު ވިދާޅުވީ، މި ފަހަރުގެ ލޯކަލް ކައުންސިލް އިންތިޚާބުގައި ސަރުކާރު ކަންބޮޑުވާ ވަރުގެ ނަތީޖާ އެއް ނެރެވޭނެ ކަމަށް ޤަބޫލުފުޅުކުރައްވާ ކަމަށެވެ.
ރައީސް ޢަބްދުﷲ ޔާމީނުގެ ސަރުކާރުގައި ޑިފެންސް މިނިސްޓަރުކަންވެސް ކުރައްވާފައިވާ އާދަމް ޝަރީފް ވިދާޅުވީ ގޮތުގައި މި ފަހަރަކީ، އެމްޑީޕީގެ ފިކުރަށް ނޫނެކޭ ބުނެ ޕީޕީއެމް ނުވަތަ ރައީސް ޔާމީނުގެ ފިކުރަށް އާއެކޭ ބުނެ، ޤައުމު އެހެން މިޞްރާބަކަށް ގެނެސްދިނުމަށްޓަކައި ''ރަން ފަސް އަހަރު'' ގެ ކުރިއެރުމާއި އެކީގައި މިއަދު ހިނގަމުންދާ ކަންތައް ބަދަލުކޮށްލަން ޤައުމު ހަމަ މަގަށް އެޅުވުމަށްޓަކައި މަސައްކަތް ކުރަންވީ ވަގުތެވެ.
ރައީސް އިބްރާހިމް މުޙައްމަދު ޞާލިޙާއި، ރައީސް މުޙައްމަދު ނަޝީދު ގެންދަވަނީ، ޕީޕީއެމުން ކައުންސިލް އިންތިޚާބުގައި ވާދަކުރަންވީ ކީއްވެގެންތޯ ކަމަށް ވިދާޅުވެ ތަކުރާރުކޮށް ސުވާލު އުފައްދަވައި ފާޑު ވިދާޅުވަމުންނެވެ. އެ ވާހަކަތަކަށް ރައްދު ދެއްވަމުން އާދަމް ޝަރީފް ވިދާޅުވީ، ދެ ރައީސުން ދައްކާ ވާހަކަތަކުން ހާމަވަނީ އެ ބޭފުޅުންނަށް މަލްޓި ޕާޓީގެ ޑިމޮކްރަސީގެ ހަމަތައް އެއްވެސް ވަރަކަށް މޭރުންވެފައި ނެތްކަން ކަމަށެވެ.
އޭނާ ވިދާޅުވީ، ޕީޕީއެމުން ކައުންސިލް އިންތިޚާބަށް ނިކުންނާނީ އެމްޑީޕީއާ ވާދަކުރާކަށް ނޫންކަމަށެވެ. އެ ޕާޓީން ނިކުންނަނީ ޤައުމުގައި ގެއްލިގެންދާ އިސްލާމީ ވަޙުދަތާއި، ޤައުމުގެ މިނިވަންކަމާއި އިސްތިޤުލާލު އަދި އުފެދިގެންދާ ތަފާތު ބިރުވެރިކަމުން ޤައުމު ސަލާމަތްކުރުމަށް ކަމަށެވެ.
ލާމަރުކަޒީ ޤާނޫނަށް ގެނައި އިޞްލާޙާއެކު ބާއްވާ ފުރަތަމަ ލޯކަލް ކައުންސިލް އިންތިޚާބު އޮންނާނީ އެޕްރީލް މަހުގެ ހަތަރު ވަނަ ދުވަހުއެވެ. ކައުންސިލް އިންތިޚާބަށް ކުރިމަތިލުމުގެ ފުރުޞަތު ފެބްރުއަރީ މަހުގެ ހަތަރު ވަނަ ދުވަހު ހުޅުވާލާފައިވާއިރު، 20 ވަނަ ދުވަހުގެ ނިޔަލަށް ފޯމުތައް ހުށައެޅޭނެ ކަމަށް އިލެކްޝަން ކޮމިޝަނުން ވަނީ ބުނެފައެވެ.
އިލެކްޝަންސް ކޮމިޝަނުން ލަފާކުރާ ގޮތުން މި ފަހަރުގެ އިންތިޚާބުގައި 6،000 އަށް ވުރެ ގިނަ ކެނޑިޑޭޓުން ވާދަކުރާނެއެވެ. އޮފިޝަލުންގެ ގޮތުގައި ހަތް ހާހަކަށް ވަރަކަށް މީހުން ޙަރަކާތްތެރިވާއިރު، އިންތިޚާބުގައި ޖުމުލަ 545 ވޯޓު ފޮށި ބަހައްޓަން ހަމަޖެހިފައިވާ ކަމަށް އީސީން ވަނީ ބުނެފައެވެ.
