ސަރުކާރުގެ ޖަލްސާ ހުށަހެޅި މައްސަލައިގައި މަރީ ބުދަ ދުވަހުގެ ކޮމިޓީއަށް ހާޒިރުކުރަނީ
7 ފެބުރުއަރީ 2020 | ހުކުރު 12:20މިނިވަން މުއައްސަސާތަކަށް ރައްޔިތުންގެ އިތުބާރު ހޯދުމަށް ކުރަންޖެހޭ މަސައްކަތްތައްކުރައްވާނެ ކަމަށް ރޮޒެއިނާ ވިދާޅުވި
ބްރޯޑްކާސްޓިން ކޮމިޝަންގެ ރައީސް މަރިޔަމް ވަހީދާ
ސަރުކާރުގެ ޖަލްސާއެއް ހުށަހެޅުއްވި މައްސަލާގައި ރައްޔިތުން މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީގެ ބުދަ ދުވަހުގެ ޖަލްސާއަށް ބްރޯޑްކާސްޓިން ކޮމިޝަން (ބްރޯޑްކޮމް)ގެ ރައީސް މަރިޔަމް ވަހީދާ (މަރީ) ހާޒިރުކުރުމަށް ނިންމައިފި އެވެ.
ރާއްޖެއެމްވީއަށް މައުލޫމާތުދެއްވަމުން މިނިވަން މުއައްސަސާތަކާއި ބެހޭ ކޮމެޓީގެ މުޤައްރިރު ރޮޒައިނާ އާދަމް ވިދާޅުވީ އެމައްސަލަ ބެލުމަށްޓަކައި އަންނަ ބުދަ ދުވަހު ބާއްވާ ކޮމިޓީގެ ޖަލްސާއަށް މަރީ ހާޒިރުކުރުމަށް ނިންމާފައިވާ ކަމަށެވެ.
ޓޫރިޒަމް މިނިސްޓްރީން ބޭއްވީ "ބުރަބި" ޖަލްސާ މަރީ ހުށައަޅައިދެއްވުމާއި ގުޅިގެން ގިނަ ބަޔަކު ވަނީ އެކި މަންސަތަކުގައި އެކަމާއި ދެކޮޅަށް އަޑު އުފުލާފައެވެ. އަދި މިނިވަން މުއައްސަސާއެއްގެ ރައީސަކު ސަރުކާރުގެ އިވެންޓުތައް ހުށައަޅައިދެއްވުމުން، އެމުއައްސަސާއެއްގެ މިނިވަންކަމާމެދު ސުވާލު އުފެދޭ ކަމަށް ބުނެ ފާދުކިޔާފައިވެއެވެ.
ގިނަ ބައެއްގެ ފާޑުކިޔުން އަމާޒުވުމާއި ގުޅިގެން ކުރިން ރޮޒެއިނާ ކުރައްވާފައިވާ ޓްވީޓެއްގައި ވިދާޅުވީ ޗުއްޓީއަށްފަހު މަޖިލިސް ހުޅުވުމުން މައްސަލަ ކޮމެޓީން ބަލާނެކަމަށެވެ. މިނިވަން މުއައްސަސާތަކަށް ރައްޔިތުންގެ އިތުބާރު ހޯދުމަށް ކުރަންޖެހޭ މަސައްކަތްތައް މިނިވަން މުއައްސަސާ ކޮމެޓީން ފަސް ޖެހުމެއް ނެތި ކުރަމުންގެންދާނެ ކަމަށްވެސް މެންބަރު ރޮޒެއިނާ ވަނީ ވިދާޅުވެފައެވެ.
އެކަމާއި ގުޅިގެން މަރީ ދިފާއު ކުރައްވާ ޓޫރިޒަމް މިނިސްޓަރ ޢަލީ ވަހީދު ވިދާޅުވެފައިވަނީ މަރީ ހުށައަޅައިދެއްވީ ޕާޓީއެއްގެ ޖަލްސާއެއް ނޫންކަމަށާއި، އެހެންކަމުން އެއީ މައްސަލައެއް ކަމުގައި ނުދެކޭ ކަމަށެވެ. އޭގެ އިތުރުން ބްރޯޑްކޮމްގެ ކޯޑް އޮފް ކޮންޑަކްޓާ ޚިލާފުވެފައިވާ ކަމަށްވެސް ޤަބޫލު ނުކުރައްވާ ކަމަށް އަލީ ވަހީދު ވިދާޅުވިއެވެ. މިކަމާއިމެދު ބަޔަކު ނުރުހުން ފާޅުކޮށް ހިތްހަމަނުޖެހި ވާހަކަދެއްކުމާއި ގުޅިގެން އެކަމާއިމެދު ހިތާމަކުރައްވާ ކަމަށްވެސް އަލީ ވަހީދު ވިދާޅުވިއެވެ. އަދި މަރިޔަމް ވަހީދާއަކީ ދުވަހަކުވެސް އެއްވެސް ސިޔާސީ ޕާޓީއެއްގައި ޙަރަކާތްތެރިވެފައިވާ ފަރާތެއް ނޫން ކަމަށާއި، އެހެންކަމުން އެއީ މައްސަލައެއް ކަމުގައި ނުދެކޭ ކަމަށް އަލީ ވަހީދު ވިދާޅުވިއެވެ.
"ބުރަބި" ޖަލްސާ ހުށައަޅައިދެއްވުން މަރީއަށް ގިނަ ބައެއްގެ ފާޑުކިއުން އަމާޒުވެފައި މިވަނީ ކުރިން އެކޮމިޝަންގެ މެންބަރަކަށް ހުންނެވި ފާތިމަތު ޒައިނާ ޕީޕީއެމް ޖަލްސާއެއްގައި ގޮނޑި އެތުރަން ހުންނެވުމާއި ގުޅިގެން މިސަރުކާރަށް ތާއީދުކުރާ ގިނަ ބަޔަކު ފާޑުކިޔާފައި ވުމުންނެވެ. އަދި ޒައިނާ އެ ކޮމިޝަނުން ވަކިކުރަން މަޖިލީހަށް ހުށައެޅި ސަބަބުތަކުގެ ތެރޭގައި މިމައްސަލަވެސް ހިމެނިފައި ވަނިކޮށެވެ.
ޒައިނާ ވަނީ އޭނާ ޙަރަކާތްތެރިވީ އިސް ރަށްވެހިންގެ އިޖްތިމާޢީ ހަފުލާއެއްގައި ކަމަށް ވިދާޅުވެ ޢަމަލުތައް ދިފާޢުކުރައްވާފައެވެ.
