''ފެބްރުއަރީ ހަތެއް'' ގައި އެމްޑީޕިގެ ވެރިކަން ވެއްޓުނު ގޮތް ''ސެލެބްރޭޓް'' ކުރާފަދަ މޭރުމުން ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލް ޓްވީޓް ކުރެއްވުމުން ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ރައްދު ދެއްވައިފިއެވެ.

އެމްޑީޕީގެ ފުރަތަމަ ވެރިކަން ވެއްޓިފައިވަނީ 2012 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހުއެވެ. އެމްޑީޕީން ސިފަކުރާ ގޮތުގައި ވެރިކަން ވައްޓާލާފައިވަނީ ''ބަޢާވަތް'' ކޮށްގެންނެވެ. އަދި އެކަމުގައި އެންމެ އިސްރޯލެއް އަދާކޮށްފައިވަނީ އޭރުގެ ނައިބް ރައީސް ޑރ. މުހައްމަދު ވަހީދު ހަސަން ކަމަށް އެ ޕާޓީން ދަނީ ބުނަމުންނެވެ.

އެ ހާދިސާއަށް ނުވަ އަހަރުވުމާއި ގުޅިގެން ކޮމިއުނިކޭޝަން މިނިސްޓަރު މަލީހު ކުރައްވާފައިވާ ޓްވީޓެއްްގައި ވިދާޅުވި، އިސްލާމްދީނާއި، މި ގައުމުގެ މިނިވަންކަމާއި، ސުލްހަ މަސްލަސްކަމާއި، ހަމަޖެހުމާއި، އަދުލު އިންސާފާ، ރައްޔިތުންގެ ކުރިއެރުމާއި، ފަރުދުންގެ މިނިވަންކަމާއި، ޑިމޮކްރެސީގެ އަސާސްތަކަށް ބުރޫއަރާ ކޮންމެ ފަހަރަކު އެކަން ދިފާއުކުރައްވާނެ ކަމަށެެވެ. ޓްވީޓްގައި ނިންމަވާލައްވަމުން މަލީހު ވަނީ މިއަދުގެ ތާރިހު ކަމަށްވާ ''07.02.20'' ލިޔުއްވާފައެވެ.

މަލީހު ކުރެއްވި ޓުވީޓް ރީޓްވީޓް ކުރެއްވުމަށްފަހު އިންތި ވިދާޅުވީ މަލީހު ހެއްދެވީ އިތުރުފުޅެެއް ކަމަށެވެ. އަދި މަލީހު އަކީ އެކަހަލަ އެއްވެސް ވަގުތެއްގައި ނުުކުމެ ވަޑައިގަތް ބޭފުޅެއް ނޫން ކަމަށް ވިދާޅުވެ ޓްވީޓް ނިންމަވާލައްވަމުން އިންތި ވިދާޅުވި މަލީހު ''ބޮޑަށް ވާގިވެރިވެލެއްވިފައި އޮތީ އެންމެ ނުލަފާ ވެރިކަންތަކަށް ކަމަށް'' ކަމަށެވެ.

އެމްޑީޕީގެ އުފެއްދުއްނިއްސުރެ އެ ޕާޓީގެ އެންމެ އިސްސަފުގައި މަސައްކަތް ކުރައްވާ އިންތި، ރައީސް އިބްރާހިމް މުހައްމަދު ސޯލިހުއާއި ރައީސް މުހައްމަދުގެ އިތުރުން ރައީސް ނަޝީދުގެ އިތުރުން އެމްޑީޕީގެ ޓެގްކުރައްވާ ކުރެއްވި ޓްވީޓެއްގައި ވަނީ ސުވާލެއް އުފައްދަވާފައެވެ. އެއީ ''ސަރުކާރުގެ ވަޒީރަކު މި ގޮތަށް ބަޢާވަތް ސެލެބްރޭޓް ކުރައްވާފައިވުމުން އެއީ އަޅުގަނޑުމެން ރައްދު ދިނުމަށް އެރުވިފައިވާ ދައުވަތެއް ކަމަށް ބަލައިގެން ކުރިޔަށް ދާންވީތޯ'' އެވެ.

މިނިސްޓަރު މަލީހުގެ ވާހަކަތައް އިންތި ދޮގުކޮށްފައިވާއިރު، މަލީހުއަކީ ކުރީގެ ރައީސް އަބްދުﷲ ޔާމިންގެ ވެރިކަމުގައި ވަޒީރުކަން ކުރައްވާފައިވާ ބޭފުޅެކެވެ. ރައީސް މުހައްމަދު ނަޝީދުގެ ވެރިކަން ވައްޓާލުމުގައިވެސް މަލީހް މަސައްކަތްކުރެއްވި އެވެ. އެގޮތުން ކުރީގެ ނައިބް ރައީސް އަދި ބަޤާވަތަށްފަހު އެކުލަވާލެވުނު ސަރުކާރުގެ ހޯމް މިނިސްޓަރަކަށް ހުންނެވި ޑރ. މުހައްމަދު ޖަމީލް އަހުމަދާއެކު މަލީހް ގިނަ މަސައްކަތްތަކެއް ކުރައްވާފައިވެއެވެ.

މި ސަރުކާރުގެ ކޮމިއުނިކޭޝަން މިނިސްޓްރީއަށް މަލީހު ވަޑައިގެންނެވީ ކޯލިޝަންގެ ޖުމްހޫރީ ޕާޓީގެ ސްލޮޓެއްގައެވެ. އެކަމަކު އެ ޕާޓީގެ ލީޑަރު ގާސިމް އިބްރާހީމާ ކޯލިޝަންގެ މައި ޕާޓީގެ އެމްޑީޕީގެ ރައީސް މުހައްމަދު ނަޝީދުއާ ދެ ބޭފުޅުން ދޭތެރޭގައި ފަހަކަށް އައިސް ބަހުގެ ހޫނު ހަމަލާތައް ދަނީ ރައްދު ކުރެެވެމުންނެވެ. ބައެއް ފަހަރު ކޯލިޝަން ރޫޅާލަން އެމްޑީޕީން މަސައްކަތްކުރާ ކަމުގެ އަޑުތައްވެސް ފެތުރެއެވެ. އެކަމަކު އެފަދަ ވިސްނުމެއް ނުގެންގުޅުއްވާ ކަމަށް ކޯލިޝަންއަކުން ވެރިކަމަށް ވަޑައިގެންނެވި ރައީސް، އިބްރާހިމް މުހައްމަދު ސޯލިހު ގެންދަވަނީ ވިދާޅުވަމުންނެވެ.