ޗައިނާގައި ކޮރޯނާވައިރަސްގައި މަރުވި މީހުންގެ ޢަދަދު 490 އަށް އަރައިފި
5 ފެބުރުއަރީ 2020 | ބުދަ 08:02ކޮރޯނާވައިރަސްއަށް މިހާރު ޕޮޒިޓިވްވެފައިވާ މީހުންގެ ޖުމުލަ ޢަދަދަކީ 24،324
ކޮރޯނާވައިރަސްއަށް ފަރުވާދޭ ވަގުތީ ހޮސްޕިޓަލެއް
ޗައިނާގެ ނެޝަނަލް ހެލްތު ކޮމިޝަނުން ކޮރޯނާވައިރަސްގެ ތަފާސް ހިސާބުތައް ޢާންމުކޮށް ރޭ ނެރުނު ބަޔާނުގައި ވަނީ ރޭ އިރުއޮއްސުމާއި ހަމަޔަށް އެޤައުމުގައި މަރުވި މީހުންގެ ނިޞްބަތަކީ ޖުމުލަ 490 ކަމަށެވެ. އަދި ކޮރޯނާވައިރަސްއަށް މިހާރު ޕޮޒިޓިވްވެފައިވާ މީހުންގެ ޖުމުލަ ޢަދަދަކީ 24،324 ކަމަށްވެސް އެކޮމިޝަނުގެ ބަޔާނުގައި ވެއެވެ.
ޗައިނާގެ އިތުރުން ދެން މިބަލިމަޑުކަމުގައި މީހަކު މަރުވެފައިވަނީ ފިލިޕީންސްއިންނެވެ. އެއީ އެންމެ މީހެކެވެ. އަދި ދުނިޔޭގެ 27 ޤައުމަކުން 151 މީހުން މިހާރުވަނީ މިބައްޔަށް ޕޮޒިޓިވް ވެފައެވެ.
ޗައިނާއާއި ދުނިޔޭގެ ކަމާއި ގުޅުން ހުރި ފަންނީ ބޭފުޅުން މިހާރު އެންމެ ފުރަކޮށް މަސައްކަތްކުރަމުން ދަނީ މި ބަލި އިތުރަށް ފެތުރުނަނުދީ، މި ބައްޔަށް ދޭނެ ފަރުވާއެއް ނުވަތަ ވެކްސިން އެއް އީޖާދު ކުރުމަށެވެ. ފާހަގަކޮށްލަންޖެހޭ އެއްކަމަކީ މިބަލިން ފަރުވާ ލިބި ފަސޭހަވާ މީހުންގެ ނިޞްބަތް ކުރިޔާ އަޅާބަލާއިރު، ގިނަވެފައި މަރުވާ މީހުންގެ ނިޞްބަތް ދަށްވުމެވެ. ކޮރޯނާވައިރަސްގައި މަރުވާމީހުންގެ ނިޞްބަތް މިހާރު ހުރި 2.4 އިން ސައްތައިގައި ހިފެހެއްޓިފަައެވެ.
ދުނިޔޭގެ ޞިއްޙަތު ޖަމްޢިއްޔާއިން ވަނީ، ކޮރޯނާވައިރަސް ފެތުރެމުންދާތީ، ބައިނަލްއަޤުވާމީ ކުއްލި ޞިއްޙީ އެމަރޖެންސީއެއް އިޢުލާންކޮށްފައެވެ. އަދި މިދަނޑިވަޅުގައި އެއްވެސް ޤައުމަކުން ވިސްނުމެއް ނެތި ކަމާގުޅުން ހުރި ޞައްޙަ ހެކި ނެތި އެެެއްވެސް ކަމެއް ނުކުރުމަށް ނުވަތަ ފިޔަވަޅެއް ނޭޅުމަށް ޑަބްލިއުއެޗްއޯއިން ވަނީ ގޮވާލާފައެވެ. އަދި މިކަމުގައި ބޭނުންވާ ފަންނީ އެހީތެރިކަން ފޯރުކޮށްދޭނެކަމުގެ ޔަޤީންކަން އެޖަމްޢިއްޔާއިން ވަނީ ދީފައެވެ.
