ބާސެލޯނާގެ ސްޕޯރޓިން ޑިރެކްޓަރު އެރިކް އަބިދާލަށް އެޓީމުގެ ކެޕްޓަން ލިއޮލެން މެސީ ރައްދެއް ދީފި އެވެ.
ދާދީ ފަހުން ސްޕެއިންގެ ނޫހަކަށް ދިން އިންޓަވިއުއެއްގައި އަބިދާލް ބުނީ މިދިޔަ އަހަރުގެ ޑިސެމްބަރު މަހު ރެއާލް މެޑްރިޑާ ދެކޮޅަށް ކުޅުނު އެލް ކްލަސިކޯ މެޗު އެއްވަރުވިއިރު، އެ މެޗަށްފަހު ގިނަ ކުޅުންތެރިން އެޓީމުގެ އޭރުގެ ކޯޗު އޭނެސްޓޯ ވަލްވޭޑޭއާ ދޭތެރޭ ހިތްހަމަނުޖެހިފައިވާ ކަމަށެވެ. އަދި އެއަށްފަހު ޓީމުގެ ބައެއް ކުޅުންތެރިން އެންމެ އެދެވޭ ގޮތުގައި މަސައްކަތް ކޮށްފައިވާ ނުވާ ކަމަށްވެސް ބުންޏެވެ.
މެސީއާއެކު ކުރިން ބާސާއަށް ކުޅުނު އަބިދާލްގެ އެ ވާހަކަތަކަށް ސޯޝަލް މީޑިއާގައި ބާސާގެ ކެޕްޓަން ލިއޮނެލް މެސީ ވަނީ ރައްދު ދީފައެވެ. މެސީ ބުނީ އަބިދާލް އެ ފާހަގަކުރި ގިނަ ކުޅުންތެރިންގެ ނަންތައް ހާމަކުރަން ޖެހޭނެ ކަމަށާއި، ނަން ހާމަނުކުރާނަމަ އެ ތުހުމަތުކުރެވެނީ މުޅި ޓީމަށް ކަމަށެވެ. އަދި ދަނޑުމަތީގައި ހިނގާ ކައްތައްތަކަށް އެންމެ ފުރަތަމަ ޒިންމާ ނަގަން ޖެހޭނީ ކުޅުންތެރިން ކަމަށާއި، މެޗެއްގައި ރަނގަޅަށް ނުކުޅެވިއްޖެ ނަމަ އެ ކުޅުންތެރިއަކަށް އެކަން ފާހަގަކޮށްދޭ ކަމަށެވެ. އަދި ވަކި ކުޅުންތެރިޔެއްގެ ނަން ނުހިމަނާ އެފަދަ ވާހަކަތައް ދެއްކުމުން ދޮގު މައުލޫމާތު ފެތުރި ޓީމު ބަދުނާމުވާ ކަމަށްވެސް މެސީ ވަނީ ބުނެފައެވެ.
ބާސެލޯނާގެ ކުރީގެ ކުޅުންތެރިޔާ ވަލްވާޑޭ އެޓީމަށް ސްޕެނިޝް ލީގު ދެ ފަހަރު އަދި ސްޕެނިޝް ކަޕް އެއް ފަހަރު ކާމިޔާބުކޮށްދިން ނަމަވެސް، މިއަހަރުގެ ޖެނުއަރީ މަހު އޭނާ މަގާމުން ވަކިކުރީ ޖުމުލަކޮށް ނަތީޖާތައް އެއްވަރެއްގައި ނުހިފެހެއްޓޭތީ އާއި ކުޅުން ދަށްވުމުންނެވެ. ވަލްވޭޑޭގެ ބަދަލުގައި ބާސާގެ ކޯޗަކަށް ހަމަޖެއްސި ކީކޭ ސެޓިއެންގެ އިރުޝާދުގެ ދަށުން އެޓީމުން މިހާތަނަށް ކުޅުނު ފަސް މެޗުގެ ތެރެއިން ހަތަރު މެޗުން ވަނީ މޮޅުވެފައެވެ.
