ދަރުމަވަންތަ ސްކޫލްގެ އާ އިމާރާތް އެޅުމަށް ބަޔަކާ ހަވާލުކޮށްފި
4 ފެބުރުއަރީ 2020 | އަންގާރަ 08:00މިއީ އެއްދަންފަޅިއަށް ހިންގޭނެ ފުރަތަމަ ސްކޫލު
އެއްބަސްވުމުގައި ސޮއިކުރި ރަސްމިއްޔާތުގެ ތެރެއިން
ދަރުމަވަންތަ ސްކޫލްގެ އާ އިމާރާތުގެ މަސައްކަތް ބަޔަކާ ހަވާލުކޮށް، އެއްބަސްވުމުގައި ސޮއިކޮށްފިއެވެ.
އަންގާރަ ދުވަހު އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި ދަރުމަވަންތަ ސްކޫލްގެ އާ އިމާރާތުގެ މަސައްކަތް ހަވާލު ކޮށްފައި ވަނީ އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާ އެވެ.
މި އެއްބަސްވުމުގައި އެޑިޔުކޭޝަން މިނިސްޓްރީގެ ފަރާތުން ސޮއި ކުރެއްވީ މިނިސްޓަރު ޑރ. އައިޝަތު އަލީ އެވެ. އަދި އެސްޖޭ ކޮންސްޓްރަކްޝަނުން ސޮއި ކުރެއްވީ ކުންފުނީގެ ޑިރެކްޓަރު އިބްރާހިމް ޝިހާދެވެ.
ވަށާޖެހޭ ތަޢުލީމެއް ދެވޭ، އެއްދަންފަޅިއަށް ހިންގޭނެ ފުރަތަމަ މޮޑެލް ސްކޫލްގެ މަސައްކަތް އެސް.ޖޭ ކޮންސްޓްރަކްޝަނާ ހަވާލުކުރައްވާފައިވަނީ 364 ދުވަސްތެރޭ ނިންމާގޮތަށެވެ. މިމަޝްރޫއަށް 74.9 މިލިއަން ރުފިޔާ ހަރަދުވާނެއެވެ.
އެއްބަސްވުމުގައި ސޮއި ކުރުމަށްފަހު މިނިސްޓަރު އައިޝަތު އަލީ ވިދާޅުވީ 2022 ގެ ދިރާސީ އާ އަހަރު ދަރުމަވަންތައިގެ އާ ސްކޫލްގައި ކިޔަވައިދެވޭނެ ކަމަށް އުންމީދު ކުރައްވާ ކަމަށެވެ.
ދަރުމަވަންތަ ސްކޫލްގެ އާ އިމާރާތް ޑިޒައިން ކޮށްފައިވަނީ 1000 ދަރިވަރުންނަށް އަދި ކޮންމެ ކްލާސް ރޫމެއްގައި 25 ދަރިވަރުންނަށް ކިޔެވޭނެ ގޮތަށް 41 ކްލާސް ރޫމް ހިމަނައިގެން ކަމަށް އެޑިޔުކޭޝަން މިނިސްޓްރީން މައުލޫމާތުދެއެވެ.
