މާދަމާގެ ޖަލްސާގައި ސަރުކާރުގެ ފަރާތުން ހުށަހަޅާފައިވާ 14 ބިލެއް

ރައްޔިތުންގެ މަޖިލީހުގެ މިދައުރުގެ ދެވަނަ ޖަލްސާގެ އިބްތިދާޢީ ބަހުސަށް ސަރުކާރުގެ ފަރާތުން ހުށަހަޅާފައިވާ 14 ބިލެއް އެޖެންޑާކޮށްފި އެވެ.

އިބްތިދާޢީ ބަހުސްގެ މަރުހަލާގައި އެންމެ ފުރަތަމަ ބަހުސްކުރުމަށް އެޖެންޑާކޮށްފައިވަނީ ސަރުކާރުގެ ފަރާތުން ކުޅުދުއްފުށި އުތުރު ދާއިރާގެ މެމްބަރ ޔާސިރު އަބްދުއްލަތީފު ހުށަހަޅުއްވާފައިވާ އެއްގަމު ދަތުރު ފަތުރުގެ ޤާނޫނަށް އިސްލާހުގެނައުމުގެ ބިލެވެ. މީގެއިތުރުން ސަރުކާރުގެ ފަރާތުން ގެމަނަފުށި ދާއިރާގެ މެމްބަރ އަހުމަދު ސައީދު ހުށަހަޅުއްވާފައިވާ ފެނާއިރު ނަރުދަމާގެ ބިލްގެ ބަހުސްވެސް މާދަމާގެ ޖަލްސާއަށް ވަނީ އެޖެންޑާކޮށްފަ އެވެ. އިބްތިދާޢީ ބަހުސްގެ މަރުހަލާގައި ކާށިދޫ ދާއިރާގެ މެމްބަރ އަބްދުﷲ ޖާބިރު ހުށަހަޅުއްވާފައިވާ މާލޭގެ ބޯހިޔާވަހިކަމާ ގުޅިގެން ހުރި ކަންބޮޑުވުންތަކަށް ހައްލެއް ހޯދައިދިނުމަށް ގޮވާލާ ހުށަހަޅާ ޤަރާރުވެސް ވަނީ އެޖެންޑާކޮށްފަ އެވެ.

މީގެއިތުރުން މާދަމާގެ ޖަލްސާގައި މަޖިލީހަށް ހުށަހަޅަންޖެހޭ ބިލާއި ޤަރާރުގެ ދަށުން ސަރުކާރުގެ ފަރާތުން ހުށަހަޅާ 4 ބިލަކާއި ކާށިދޫ ދާއިރާގެ މެމްބަރ އަބްދުﷲ ޖާބިރު ހުށަހަޅުއްވާފައިވާ ޤަރާރު ހިމެނެއެވެ. މަޖިލީހުގެ ރައީސްގެ މޭޒުން ހުށަހަޅާ ކަންކަމުގެ ތެރޭގައި މާދަމާގެ ޖަލްސާގެ އެޖެންޑާގައި 5 ކަމެއްވެ އެވެ. އޭގެތެރޭގައި ހިމެނެނީ ސަފީރުންނާއި ގުޅޭގޮތުން ރައީސުލްޖުމްހޫރިއްޔާ ފޮނުއްވާފައިވާ ދެ މައްސަލައަކާއި ދެ މުއާހަދާއަކާއި ގުޅިގެން މަޖިލީހުގެ ރުހުން ހޯދުމުގެ ދެ މައްސަލަ އަކާއި ކޮމަންވެލްތް ޕާލަމެންޓްރީ އެސޯސިއޭޝަންގައި ރާއްޖެ ބައިވެރިވުމާއި ގުޅޭ މައްސަލައެކެވެ.

މާދަމާގެ ޖަލްސާގައި ކޮމިޓީތަކުން ހުށަހަޅާކަންކަމުގެ ތެރޭގައި 6 ކޮމިޓީ ރިޕޯޓެއް އެޖެންޑާކޮށްފައިވެ އެވެ.

މިއަހަރަށް ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ވިދާޅުވީ މިއަހަރުގެ ފުރަތަމަ ދައުރުގެ ތެރޭގައި 56 ބިލެއް، މަޖިލީހަށް ފޮނުވުމަށް ސަރުކާރުން ޤަޞްދުކުރައްވާ ކަމަށެވެ. އެއީ، މިހާރު ޢަމަލުކުރަމުން އަންނަ ބައެއް ޤާނޫނުތައް އިޞްލާޙްކުރުމަށް ހުށަހަޅާ 32 ބިލަކާއި، މުޅިން އަލަށް އުފައްދާ ޤާނޫނުތަކާ ބެހޭ 24 ބިލެއް ކަމަށެވެ. އަދި އެ ބިލްތައް ފާސްކުރުމުގައި މަޖިލީހުގެ ފުރިހަމަ އެއްބާރުލުން ލިބޭނެކަން ޔަގީންކުރައްވާ ކަމަށް ރައީސް ވިދާޅުވިއެވެ.