ކުދި ކުދި ރަށްތަކަށް ދިމާވެފައިވާ އެންމެ ބޮޑު މުސީބާތަކީ ކުނި އިތުރުވުން: ރައީސް ނަޝީދު
3 ފެބުރުއަރީ 2020 | ހޯމަ 14:33އެމްޑީޕީގެ ތަސައްވުރަކީ ގުދުރަތީ ވަސީލަތްތައް ބޭނުންކޮށްގެން ގުދުރަތީ ރަށްތައް ދެމެހެއްޓެނިވި ގޮތުގައި ތަރައްގީކުރާނެ ސިޔާސަތްތަކެއް ނެރުން
ރައީސް ނަޝީދު
ކުދި ކުދި ރަށްތަކަށް ދިމާވެފައިވާ އެންމެ ބޮޑު "މުސީބާތަކީ" ރަށްތަކަށް ދިރިއުޅުމުގެ ނަމުގައި ގެނައި ތަކެތިން އުފެދޭ ކުނިކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބ އަތޮޅު މާޅޮހު އިކޯ ސެންޓަރ ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މަޖިލީހުގެ ރައީސް ވިދާޅުވީ، ކުނި އުކާލާ މިންވަރު އިތުރުވެ ފަރުތަކުގެ މައްޗަށް ކުނި މާބޮޑަށްވެސް ގަދަވެއްޖެކަމަށާއި ރާއްޖޭގެ ރަށްތައް ކުނިން ހަރާބުކޮށްފިކަމަށެވެ. ރާއްޖޭގެ ރައްޔިތުން އުޅޭ ތަނަވަސް އޮމާން ދިރިއުޅުން ގެެއްލޭވަރަށް އެ މައްސަލަ އިތުރެވަފައިވާކަން ފާހަގަކޮށް ރައީސް ނަޝިދު ވިދާޅުވީ، ކުދި ކުދި ރަށްތަކަށް ދިމާވެފައިވާ އެންމެ ބޮޑު މުސީބާތަކީ ރަށްތަކަށް ދިރިއުޅުމުގެ ނަމުގައި ގެނައި ތަކެތިން އުފެދޭ ކުނިކަމަށެވެ.
ރައީސް ނަޝީދު ވިދާޅުވީ މާލޭގައި މިފަދަ ކަމެއް ގާއިމުކުރުމަށް މަސައްކަތްކުރަމުންދާތާ ގިނަ ދުވަސްތަކެއް ވެފައިވާކަމަށާއި އެގޮތުން ތިލަފުށްޓައް ކުނި ގެންގޮސް އެތަނުގައި އަންދަމުން ގެންގޮސް ބޮޑު ރަށެއް އުފެދިފައިވާއިރު އަދިވެސް އެތަނަށް ބަދަލެއް ނާންނަކަމަށެވެ.
މާޅޮހުގައި އިކޯ ސެންޓަރެއް ގާއިމކުރެވިގެން ދިޔައީ ރަށުގެ ރައްޔިތުންނާއި ކައުންސިލަރުންގެ ބުރަ މަސައްކަތުންކަން ފާހަގަކޮށް ރައީސް ނަޝީދު ވިދާޅުވީ އެމްޑީޕީގެ ތަސައްވުރަކީ ގުދުރަތީ ވަސީލަތްތައް ބޭނުންކޮށްގެން ގުދުރަތީ ރަށްތައް ދެމެހެއްޓެނިވި ގޮތުގައި ތަރައްގީކުރާނެ ސިޔާސަތުތަކެއް ނެރުންކަމަށެވެ.
