އަންސޫ ފަޓީގެ ދެ ލަނޑާއެކު ބާސާއަށް މޮޅެއް

ޒުވާން ފޯވަރޑް އަންސޫ ފަޓީ ކާމިޔާބުކޮށްދިން ދެ ލަނޑާއެކު ލެވަންޓޭ އަތުން ބާސެލޯނާ މޮޅެއް ހޯދައިފި އެވެ.

ސްޕެނިޝް ލީގުގައި އާދީއްތަ ދުވަހުގެރޭ ކުޅުނު މެޗުން ލެވަންޓޭގެ މައްޗަށް ބާސާ ކުރިހޯދީ 2-1 ގެ ނަތީޖާއަކުންނެވެ. މި މޮޅާއެކު ބާސާއިން ވަނީ ތާވަލުގެ އެއްވަނައިގައި އޮތް ރެއާލްއާ ދެމެދު އޮތް ފަރަގު ތިން ޕޮއިންޓަށް ކުޑަކޮށްފައެވެ. އެއްވަނައިގައި ރެއާލް އޮތީ 22 މެޗުން 49 ޕޮއިންޓާއެކު އެވެ. އަދި ބާސާ ދެވަނައިގައި އޮތީ 22 މެޗުން 46 ޕޮއިންޓާއެކު އެވެ.

ބާސާގެ ދަނޑުގައި ރޭ ކުޅުނު މެޗުގެ ފުރަތަމަ ހާފު ކޮންޓްރޯލް ކޮށްގެން ކުޅުނީ އެޓީމުންނެވެ. އެގޮތުން ބާސާއިން މެޗުގައި ޖެހި ދެ ލަނޑުވެސް ފެނިގެންގޮސްފައިވަނީ މި ހާފުގައެވެ. ކެޕްޓަން ލިއޮނެލް މެސީ ދިން ޕާހަކުން 30 ވަނަ މިނެޓުގައި އުމުރުން 17 އަހަރުގެ އަންސޫ ފަޓީ ބާސާއަށް ލީޑު ނަގައިދިންއިރު، އޭގެ ދެ މިނެޓު ފަހުން ހަމަ މެސީގެ އެހީއާއެކު އަންސޫ ފަޓީ ވަނީ ބާސާއަށް ލީޑު ފުޅާކޮށްދީފައެވެ.

އެކަމަކު ފުރަތަމަ ހާފާ ޚިލާފަށް ދެވަނަ ހާފު ކޮންޓްރޯލް ކުރުނީ ލެވަންޓޭއިންނެވެ. އެގޮތުން މި ހާފުގައި އެޓީމުން ގިނަ ހަމަލާތަކެއް އުފެއްދިއިރު، ބާސާގެ ގޯލްކީޕަރު މާކް-އަންދްރޭ ޓާ ސްޓޭގަން ވަނީ މުހިންމު ސޭވުތަކެއް ވެސް ކޮށްފައެވެ. މެޗުގައި ލެވަންޓޭއިން ޖެހި ހަމައެކަނި ލަނޑު ފަހު މިނެޓުގައި އެޓީމަށް ކާމިޔާބުކޮށްދިނީ ރުބެން ރޮޗީނާއެވެ. އޭނާ މި ގޯލް ޖެހީ އޭރިއާ ބޭރުން ފޮނުވާލި ބާރު ހަމަލާއަކުންނެވެ.

ސްޕެނިޝް ލީގުގައި ދެން ބާސާ މެޗެއް ކުޅޭނީ މި މަހުގެ 10 ވަނަ ދުވަހު އެވެ. އެ ދުވަހު ބާސާ ނުކުންނާނީ ރެއާލް ބެޓިސްއާ ދެކޮޅަށެވެ.