ރޮނާލްޑޯ ޔުވެންޓަސްއަށް ކާމިޔާބުކޮށްދިން 50 ވަނަ ލަނޑާއިއެކު ޔުވެންޓަސްއަށް މޮޅެއް
2 ފެބުރުއަރީ 2020 | އާދީއްތަ 21:55މި މެޗު ޔުވެންޓަސްއިން ކާމިޔާބުކުރީ 3-0 ގެ ނަތީޖާއަކުން
ޔުވެންޓަސް އަދި ފިއޮރިންޓީނާ ބައްދަލުކުރި މެޗުގެ ތެރެއިން
އިޓާލިއަން ލީގުގައި ޔުވެންޓަސް އަދި ފިއޮރެންޓީނާ ބައްދަލުކުރި މެޗުގައި ރޮނާލްޑޯގެ ދެ ލަނޑުން ޔުވެންޓަސް މޮޅުވެއްޖެއެވެ.
ޔުވެންޓަސްގެ ދަނޑުގައި ކުޅުނު މި މެޗުން ޔުވެންޓަސް މޮޅުވީ 3-0 ގެ ނަތީޖާ އަކުންނެވެ.
މެޗު ފަށައިގެން ޔުވެންޓަސްއިން މޮޅު އެޓޭކިންގ ގޭމެއް ކުޅުނުއިރު މެޗުގެ 14 ވަނަ މިނެޓުގައި ޔުވެންޓަސްގެ ޑިފެންޑަރ ލިއޮނާޑޯ ބޮނޫޗީ އަށް ވަނީ ލަނޑު ޖަހަން ފުރުސަތެއްލިބި ބޭކާރުވެފައެވެ. ޑޮގްލަސް ކޮސްޓާ ނަގައިދިން ހުރަސް ބޮލުން ބޮނޫޗީ ފޮނުވައިލިއިރު މި ހަމަލާ ފިއޮރެންޓީނާގެ ކީޕަރު ވަނީ ހުށިޔާރު ކަމާއިއެކު ދިފާއުކޮށްފައެވެ. މީގެ އިތުރުން ޔުވެންޓަސްގެ ރޮޑްރިގޯ ބެންޓެންކާ ވަނީ އޭރިޔާ ބޭރުން ބާރު ހަމަލާއެއް ފިއޮރެންޓީނާގެ ގޯލަށް ފޮނުވައިލައިފައެވެ. މިހަމަލާ ވެސް ފިއޮރެންޓީނާގެ ކީޕަރު ވަނީ ދިފާއު ކޮށްފައެވެ. މެޗުގެ 40 ވަނަ މިނެޓުގައި ޔުވެންޓަސްއިން ވަނީ ލަނޑު ޖަހާ ލީޑު ނަގައިފައެވެ. އޭރިޔާ ތެރެއިން ފިއޮރެންޓީނާ ކުޅުންތެރިޔެއްގެ އަތުގައި ބޯޅަ ޖެހުމާއިއެކު ލިބުނު ޕެނަލްޓީ ޔުވެންޓަސްއަށް ކާމިޔާބު ކޮށްދިނީ އިތުބާރު ފޯވާޑް ކްރިސްޓިއާނޯ ރޮނާލްޑޯ އެވެ.
މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާއަކުން ޔުވެންޓަސް ކުރީގައި އޮވެގެންނެވެ.
ދެވަނަ ހާފު ފަށައިގެން ޔުވެންޓަސްއިން އެޓީމުން ކުރި އެޓޭކްތައް އިތުރަށް ވަރުގަދަކުރިއިރު އެޓީމުން ވަނީ މެޗުގެ 80 ވަނަ މިނެޓުގައި އިތުރު ލަނޑެއްޖަހާ ލީޑު ފުޅާ ކޮށްފައެވެ. ލިބުނު ޕެނަލްޓީއަކުން މި ލަނޑު ވެސް އެޓީމަށް ކާމިޔާބު ކޮށްދިނީ ރޮނާލްޑޯ އެވެ. މި ލަނޑަކީ ޔުވެންޓަސްގެ ޖާޒީގައި ރޮނާލްޑޯ ކާމިޔާބުކުރި 50 ލަނޑެވެ. ޔުވެންޓަސްގެ ފަހު ލަނޑު މެޗުގެ އިތުރު ވަގުތުގައި އެޓިމަށް ކާމިޔަބުކޮށްދިނީ މަތައިސް ޑެލައިޓް އެވެ.
މި ނަތީޖާ އާއިއެކު ޔުވެންޓަސްއިން ލީގު ތާވަލުގެ އެއްވަނައިގައި އޮތީ ކުޅުނު 22 މެޗުން ލިބުނު 54 ޕޮއިންޓާއިއެކުގައެވެ. ދެވަނައިގައި އޮތް ލާޒިއޯ އަށް 21 މެޗުން 49 ޕޮއިންޓް ލިބިފައިވާއިރު މެޗުން ބަލިވި ފިއޮރިންޓީނާ އޮތީ ލީގު ތާވަލުގެ 14 ވަނައިގައެވެ.
