ނުކުޅެދުންތެރިކަން ހުންނަ ފަރާތްތަކުގެ އެމްބެސެޑަރ ކަމުން ހިޝާން ދުރުކޮށްފި
2 ފެބުރުއަރީ 2020 | އާދީއްތަ 12:09އޮނަރަރީ މަޤާމުތަކުގައި ތިއްބަވާ ފަރާތްތަކަކީ ނަޒާޙާތްތެރި ބަޔަކަށް ވާން ޖެހޭ
ކުރީގެ ޑިސްއެބިލިޓީ އެމްބެސެޑަރު އަހުމަދު ހިޝާން
ފުލުހުން ބަލަމުންދާ މައްސަލައަކާއި ގުޅިގެން އަހުމަދު ހިޝާންއަށް އަރުވާފައިވާ "އޮނަރަރީ ޑިސްއެބިލިޓީ އެމްބެސެޑަރ" ކަމުން އޭނާ ދުރުކޮށްފިއެވެ.
ފުލުހުން ބަލަމުންދާ މައްސަލައަކާއި ހިޝާންގެ ޕާސްޕޯޓްވެސް ހިފަހައްޓާފައިވާއިރު, އެކަމާ ގުޅޭގޮތުން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިން އާދިއްތަ ދުވަހު ނެރުނު ބަޔާނެއްގައި ބުނީ، އޮނަރަރީ މަޤާމުތަކުގައި ތިއްބަވާ ފަރާތްތަކަކީ ނަޒާޙާތްތެރި އަދި އާންމު ރައްޔިތުންގެ އިތުބާރު އޮންނަ ފަރާތްތަކަކަށް ވާން ޖެހޭނެ ކަމަށެވެ.
ނަމަވެސް ހިޝާންއާއި ގުޅުންހުރި މައްސަލަތަކެއް ބަލަމުންދާ ކަމުގެ މައުލޫމާތު ފުލުހުންގެ ފަރާތުން ޖެންޑަރ މިނިސްޓްރީއަށް ލިބިފައިވާކަމަށް މިނިސްޓްރީން ބުނެއެވެ.
އެކަމާ ގުޅިގެން ބައިނަލްއަޤުވާމީ ނުކުޅެދުންތެރިކަން ހުންނަ މީހުންގެ ދުވަސް ފާހަގަކުރުމުގެ ގޮތުން ނިމިދިޔަ އަހަރުގެ ޑިސެމްބަރު މަހުގެ 3 ވަނަ ދުވަހު ބޭއްވި ރިވެލި މައުރަޒު ހުޅުވުމުގެ ރަސްމިއްޔާތުގައި އޭނާއަށް ދީފައިވާ މަޤާމުން ދުރުކޮށްފައިވާކަމަށް މިނިސްޓްރީން ވަނީ ބުނެފައެވެ.
ހާއްސައެހީއަށް ބޭނުންވާ ކުދިންގެ ހައްގުތައް ކަށަވަރުކުރުމަށް އެތައް މަސައްކަތްތަކެއް ކޮށްފައިވާ ހިޝާންގެ މައްޗަށް ޖިންސީ ގޯނާ ކުރިކަމުގެ ތުހުމަތާއި ނުފޫޒު ފޯރުވިކަމުގެ ތުހުމަތުތަކެއް ސޯޝަލް މީޑިއާގައި ވަނީ ފެންމަތިވެފައެވެ. އަދި ޖެނުއަރީ 31 ވަނަ ދުވަހު ރާއްޖެއިން ބޭރަށް ފުރަން އުޅެނިކޮށް ހިޝާން ހިފަހައްޓާފައިވާކަމަށްވެސް ވަނީ މައުލޫމާތު ލިބިފައެވެ.
ފުލުހުންނަށް ހުށަހެޅިފައިވާ މައްސަލައަކާއި ގުޅިގެން ސުވާލުކުރުމަށް ހިޝާން ވަނީ ފުލުހުންގެ އިދާރާއަށް މީގެކުރިން ހާޒިރުކޮށްފައެވެ.
